ޔޫރަޕަށް ގޭސް ފޮނުވަން ރަޝިއާ އިން ޖަރުމަނަށް އަޅާފައިވާ މައި ހޮޅި، ނޯޑް ސްޓްރީމް 1، އަލުން ހުޅުވަން ދީފައިވާ މުއްދަތު ހަމަވިއިރު ވެސް ނުހުޅުވި އެވެ.
ރަޝިއާ ސަރުކާރުގެ ހަކަތައާ ބެހޭ މައި ކުންފުނި ގޭޒްޕްރޮމްއިން ބުނެފައިވަނީ ތިން ދުވަހުގެ މަރާމާތަށް ފަހު ހޮނިހިރު ދުވަހު ގޭސް ހޮޅި ހުޅުވާނެ ކަމަށެވެ. ނަމަވެސް އެ ކުންފުނިން މިހާރު ބުނަނީ ގޭސް ހޮޅީގެ ޓާބައިނެއްގައި ތެޔޮ ލީކްވުމެއް އުޅޭ ކަމަށާއި އެކަން ހައްލު ނުކޮށް ގޭސް ދޫކުރުމަކީ ރައްކާތެރި ކަމެއް ނޫން ކަމަށެވެ.
ނަމަވެސް، ގޭސް ހޮޅި އަލުން ހުޅުވޭނެ ތާރީހެއް އެ ކުންފުނިން ނުދެ އެވެ.
ރަޝިއާ-ޔޫކްރޭން ހަނގުރާމައާ ގުޅިގެން ހުޅަނގުގެ ގައުމުތަކުން ރަޝިއާ އަށް ދަތިކުރުމުގެ ފިޔަވަޅުތައް އަޅައިފަ އެވެ.
ރަޝީއާއިން ޔޫރަޕަށް ގޭސް ފޮނުވުން ބަންދުކޮށްލުމާ ގުޅިގެން ޔޫރަޕްގެ ބައެއް ގައުމުތަކުން ބުނެފައި ވަނީ ހަނގުރާމައިގެ ހަތިޔާރެއްގެ ގޮތުގައި ރަޝިއާއިން ގޭސް ބޭނުން ކުރާ ކަމަށެވެ.
ރަޝިއާ-ޔޫކްރޭން ހަނގުރާމަ ފެށިފަހުން ދުނިޔޭގެ ބާޒާރުގައި ހަކަތައިގެ އަގުތައް ވަނީ އުފުލި، މުދަލުގެ އަގު ބޮޑުވެފަ އެވެ.
