ސިފައިންނާއި ފުލުހުންގެ ހިދުމަތް ވަކިކޮށް، ފުލުހުންނަކީ ވަކި މުއައްސަސާއެއްގެ ގޮތުގައި ތައާރަފްކުރިތާ 18 އަހަރު ވިއިރު، އޭރު ރާއްޖޭގައި ހުރި ކުށްކުރުމުގެ މައްސަލަތަކަށް އަދިވެސް އެބަހުރިކަން އެއީ ގަބޫލުކުރަން ޖެހޭ ހަގީގަތެއް ކަމަށް ޕޮލިސް ކަމިޝަނަރު މުހައްމަދު ހަމީދު ވިދާޅުވީ އިއްޔެ އެވެ.

ފުލުހުންގެ މުއައްސަސާ ވަކިކުރިތާ 18 އަހަރު ފުރުން ފާހަގަކުރަން އިސްކަންދަރުކޮށީގައި އިއްޔެ ބޭއްވި ރަސްމިއްޔާތެއްގައި ހަމީދު ވިދާޅުވީ މައްސަލަތައް ހައްލުނުވި މައްސަލަތަކުގެ ތެރޭގައި މަސްތުވާތަކެތީގެ މައްސަލަ އާއި ގޭންގް ކުށްތައް ހިމެނޭ ކަމަށެވެ.

"އަދިވެސް އަޅުގަނޑުމެން ގަބޫލުކުރަން ޖެހޭ ހަގީގަތަކީ މީގެ 18 އަހަރުކުރިން ފުލުހުންގެ ހިދުމަތް ގާއިމްކުރި އިރު ހުރި ކުށްތަކާއި އެނޫން ކަންތައްތައް ވެސް އިތުރު ހައްލެއެއް ނުލިބި ވަނީ އެއް ދުވަހުން އަނެއް ދުވަހަށް ގޯސްވެފައި،" ހަމީދު އިއްޔެ ވިދާޅުވި އެވެ.

އޭނާ ވިދާޅުވި ގޮތުގައި މަސްތުވާތަކެއްޗާއި ގޭންގްކުށްތަކާ މެދު މީގެ 18 އަހަރު ކުރިން ރައްޔިތުންގެ ހުރި ކަންބޮޑުވުންތައް އަދިވެސް އެގޮތުގައި އެބަހުރި ކަަމަށެވެ. އެހެން ނަމަވެސް އޭނާ ވިދާޅުވީ ފުލުުހުންގެ ހިދުމަތަށް މިދިޔަ 18 އަހަރުގެ ތެރޭގައި ތަަރައްގީ އާއި ކުރިއެރުންތައް ލިބިފައިވާ ކަމަށެވެ. ކުރިއެރުން ލިބި ދާއިރާތަކުގެ ތެރޭގައި ތަހުގީގުކުރުމުގެ ދާއިރާ އާއި މުޅި ރާއްޖެއަށް ހިދުމަތް ފަތުރައިލުމުގެ ދާއިރާ ހިމެނޭ ކަމަށް އޭނާ ވިދާޅުވި އެވެ.

"އިންފޮމޭޝަން ޓެކްނޮލޮޖީ، ފޮރެންސިކް އަދި މި ނޫންވެސް ދާއިރާތަކަށް އައިސްފައިވާ ކުރިއެރުމަކީ މިއަދު އަޅުގަނޑުމެން އެންމެން ވެސް އަދި މީގެ ކުރިން މި މުއައްސަސާގައި ހަރަކާތްތެރިވި ފަރާތްތައް ވެސް ފަހުރުވެރިވާނެ ކުރިއެރުންތައް،" ހަމީދު ވިދާޅުވި އެވެ.

އެ ތަރައްގީ ހޯދުމުގައި ކުރިން މަސައްކަތްކުރި ފަރާތްތަކާއި މިހާރު މަސައްކަތްކުރާ ފަރާތްތައްތަކުން ކޮށްދީފައިވާ މަސައްކަތްތަކަކީ އޭނާ ވިދާޅުވި ގޮތުގައި ހަނދާން ނައްތާލައިގެން ވާނެ ހިދުމަތެއް ނޫނެވެ. ފުލުހުންގެ ހިދުމަތުގައި މަސައްކަތްކޮށްފައިވާ އަދި މިހާރު ވެސް ދެމިތިބި އެންމެނަށް އޭނާ ޝުކުރުއަދާކުރެއްވި އެވެ.

ބައެއް މުހިންމު ހަބަރުތައް

• ކުރީގެ ރައީސް އަބްދުﷲ ޔާމީން އިސްވެ ހުންނަވާ ކުރިއަށް ގެންދަވާ "އިިންޑިއާ އައުޓް" ހަރަކާތަށް ތަރުހީބެއް ނެތް ކަމަށާއި ރައީސް އިބްރާހީމް މުހައްމަދު ސޯލިހަށް ދެވަނަ ދައުރެއް ކާމިޔާބު ކުރެވޭނެ ކަމަށް އިންޑިއާ މީޑިއާއަކަށް ދެއްވި އިންޓަވިއުއެއްގައި ފޮރިން މިނިސްޓަރު އަބްދުﷲ ޝާހިދު ވިދާޅުވީ އިއްޔެ އެވެ.

• ތަކުރާރުކޮށް އެކި ފަހަރުމަތިން ވައްކަމުގެ މައްސަލަތަކުގައި ހައްޔަރުކޮށްފައިވާ މީހަކު ފަނޑިޔާރެއްގެ ކުރިމައްޗަށް ހާޒިރުކޮށްގެން މެނުވީ ބަންދުން ދޫނުކުރަން ކްރިމިނަލް ކޯޓުން ފުލުހުންގެ މައްޗަށް އަމުރުކޮށްފައިވާކަން ރިޕޯޓުކުރީ އިއްޔެ އެވެ.

• ވެލާނާ އިންޓަނޭޝަނަލް އެއާޕޯޓުން ބަޔަކު ހައްޔަރުކުރުމާ ގުޅޭގޮތުން "ދިޔަރެސް" ނޫހުގައި ޝާއިއުކުރި ހަބަރުގެ މައްސަލަ ބަލަން މޯލްޑިވްސް މީޑިއާ ކައުންސިލް (އެމްއެމްސީ) އިން ތާވަލުކުރީ އިއްޔެ އެވެ.

ދުވަހުގެ ކޯޓޭޝަން

އަންނަ އަހަރުގެ ރިޔާސީ އިންތިހާބާ ގުޅޭގޮތުން ދެކެވަޑައިގަންނަވާ ގޮތް ހާމަކުރައްވަމުން ފޮރިން މިނިސްޓަރު އަދި އދ. ގެ އާންމު މަޖިލީހުގެ ރައީސް އަބްދުﷲ ޝާހިދު ވިދާޅުވީ:

ރައީސް ސޯލިހް އަލުން އިންތިހާބު ކުރާނެ، ރާއްޖޭގެ ރައްޔިތުން ވަނީ އެމަނިކުފާނުގެ ރަނގަޅު މަސައްކަތްތަކުގެ ހެޔޮ ނަތީޖާއެއް ލިބިފައި، އެމަނިކުފާނުގެ ގާބިލް ލީޑާޝިޕް ދިވެހިން ބަލައިގަންނާނެ،

ދުވަހުގެ ފޮޓޯ

ސެޕްޓެމްބަރު 1، 2022 - ގަތަރުގައި އޮންނަ ފީފާ ވޯލްޑް ކަޕްގެ ފޯރި ރާއްޖޭގައި ގަދަކުރުމުގެ ގޮތުން ކޮކާކޯލާ ކޮމްޕެނީން ހާއްސަ ޕްރޮމޯޝަނެއް ލޯންޗުކުރުން. މި ޕްރޮމޯޝަނުގައި އަގުހުރި އިނާމުތަކެއް ވެސް ލިބޭ --- ފޮޓޯ: އަބްދުﷲ އިޔާން/އަދަދު

ދިރާސާތަކުން ކިޔާލުމަށް

"ޕްރިޒަން ރެޑިކަލައިޒޭޝަން އިން ދަ މޯލްޑިވްސް"

މިއީ ރާއްޖޭގެ ޖަލުތަކުގައި ހަރުކަށި ފިކުރު ފެތުރިފައިވާ މިންވަރު ދެނެގަތުމަށާއި އަދި އެ ފިކުރުގެ ބިރުވެރިކަން އޮތް މިންވަރު ހާމަކޮށްދިނުމުގެ ގޮތުން ކަމާބެހޭ އިދާރާތަކާއި ގުޅިގެން ޓްރާންސްޕޭރެންސީ މޯލްޑިވްސް އިން 2022 ވަނަ އަހަރު ކޮށްފައިވާ ދިރާސާއެކެވެ.