ޕޯސްޓު މެދުވެރިކޮށް އެތެރެކުރަން އުޅުނު މަސްތުވާތަކެތި ހިމެނޭ ފޮށިގަނޑެއް ނަގަން ދިޔަ މީހަކު ހައްޔަރުކޮށް ބަންދަށް 30 ދުވަސް ކްރިމިނަލް ކޯޓުން ޖަހައިފި އެވެ.
މޯލްޑިވްސް ކަސްޓަމްސްގެ ސާވިސް އިން އިއްޔެ ބުނި ގޮތުގައި ޕޯސްޓުން އެތެރެކުރަން މަސައްކަތްކުރި 1.674 ކިލޯގެ މަސްތުވާތަކެތި މިދިޔަ މަހުގެ 25 ވަނަ ދުވަހު އަތުލައިގެންފައިވާ ކަމަށެވެ.
އެ ޕެކޭޖުން ފެނުނު ހަތަރު ޕެކެޓުގެ ތެރެއިން ދެ ޕެކެޓުގައި ހުރި ތަކެތި މަސްތުވާތަކެތީގެ ބާވަތެއް ކަމަށްވާ ކެޓަމިންއަށް ޕޮޒިޓިވްވެފައިވާ ކަމަށާއި އަނެއް ދެ ޕެކެޓުގައި ހުރި ތަކެތި ކޮކެއިންއަށް ޕޮޒިޓިވްވި ކަމަށް ކަސްޓަމްސް އިން ބުނެފައިވެ އެވެ.
މި މައްސަލައިގެ ތުހުމަތުގައި ފުލުހުން ވަނީ އެ ޕޯސްޓު ބަލައި ދިޔަ 23 އަހަރުގެ އަންހެނަކު އެ ދުވަހު ހައްޔަރުކޮށްފަ އެވެ.
އޭނާގެ ބަންދުގެ މުއްދަތު އިތުރުކުރަން އިއްޔެ ކްރިމިނަލް ކޯޓަށް ހާޒިރުކުރުމުން ކޯޓުން ވަނީ އޭނާ ގެ ބަންދަށް 30 ދުވަސް ޖަހައިފަ އެވެ.
ބަންދު މަޖިލީހުގައި ފުލުހުން އިއްޔެ ބުނެފައިވާ ގޮތުގައި އޭނާގެ ކުޑަކަމުދާތަކެތި ވަނީ މަސްތުވާތަކެތީގެ ބާވަތަކަށް ޕޮޒިޓިވްވެފަ އެވެ.
ޖަރުމަނުން އެތެރެކުރި މި ޕެކޭޖުގައި ހުރި މަސްތުވާތަކެތީގެ މަގުމަތީ އަގު ފަސް މިލިއަން ރުފިޔާއަށް އަރަ އެވެ.
