ރާއްޖޭގެ ބޮޑުބަޔަކަށް މިއަދު މޫސުން ގޯސްވެފައިވާތީ ކަނޑުދަތުރުކުރުމުގައި މޫސުމަށް ސަމާލުވާން ފުލުހުން އިލްތިމާސްކޮށްފި އެވެ.
ފުލުހުން މިއަދު ނެރުނު ބަޔާނެއްގައި ބުނީ ކަނޑު ދަތުރުފަތުރު ކުރުމުގައި ސަލާމަތާއި ރައްކާތެރިކަން ކަށަވަރުކުރުމާ އަދި ކަނޑުދަތުރުފަތުރުގެ ގާނޫނާއި ގަވާއިދުތަކާ އެއްގޮތަށް އަަމަލުކުރުމަށް އިލްތިމާސްކުރާ ކަމަށެވެ.
ރައްކާތެރިކަމުގެ ފިޔަވަޅެއްގެ ގޮތުން، އެ ބަޔާނުގައި ލަފާދީފައިވާ އެއް ކަމަކީ އުޅަނދުފަހަރަށް އެކަށީގެންވާ ވަރަށް ވުރެ އިތުރަށް މީހުންނާއި މުދާ ނޭރުވުމެވެ. ސަލާމަތާއި ރައްކާތެރިކަން ކަށަވަރުކުރުމަށް ޓަކައި އުޅަނދުފަހަރުގައި ހުންނަން ޖެހޭ މުވާސަލާތީ ވަސީލަތްތަކާއި ލައިފްޖެކެޓް ހުރިކަން ޔަގީން ކުރަން ވެސް ފުލުހުންގެ ބަޔާނުގައި އިލްތިމާސްކުރި އެވެ.
"...އަދި ދަތުރަކަށް ފެށުމުގެ ކުރިން މޫސުމާ ބެހޭ އެންމެ ފަހުގެ މައުލޫމާތު ހޯދައި، ކަނޑުގަދަ ނަމަ ދަތުރުނުކުރުމަށްވެސް އިލްތިމާސްކުރަން،" ފުލުހުންގެ ބަޔާނުގައި ބުންޏެވެ.
ރާއްޖޭގެ ބޮޑު ބަޔކަށް މިރޭ ވެސް މޫސުން ގޯސްވާނެ ކަމަށް މޯލްޑިވް މީޓިރިއޮލޮޖީ ސާވިސް އިން ވަނީ ލަފާކޮށްފަ އެވެ. މެޓް އޮފީހުން އެންމެ ފަހުން ނެރުނު ވައިޓް އެލާޓްގައިވާ ގޮތުން ހއ. އަތޮޅުން ފެށިގެން ލ. އަތޮޅާ ހަމައަށް މިރޭ 9:00 އާ ހަމައަށް ވެސް މޫސުން ގޯސްވާނެ ކަމަށް ލަފާކުރެވެ އެވެ.
