ބިންހެލުމެއްގެ އަސަރުކޮށްގެން ސޯސަން މަގުގައި ހުންނަ ހެލްތު މިނިސްޓްރީގެ ރޯޝަނީ ބިލްޑިންގުގައި މަސައްކަތް ކުރާ މުވައްޒަފުން އެ އިމާރާތުން ނެރެފި އެވެ.
އެ އިމާރާތުގައި މަސައްކަތް ކުރާ ހުރިހާ މުވައްޒަފުން މިހާރު ވަނީ އެތަނުން ނެރެފަ އެވެ. ބައެއް މުވައްޒަފުން ތިބީ މިވަގުތު ސޯސަން މަގުގައި މަޑުކޮށްގެނެވެ.
"ވަރަށް ބޮޑަށް އިމާރާތް ތެޅުނުކަން އިހުސާސްވި،" އެ އިމާރާތުގައި އެވަގުތު ހުރި މީހަކު މި ނޫހާ ވާހަކަ ދައްކަމުން ބުންޏެވެ.
ބިންހެލުމުގެ ސަބަބުން އިމާރާތް ތެޅުމުގެ އަސަރު ރޯޝަނީ ބިލްޑިންގުގެ ހުރިހާ ފަންގިފިލާއަކަށް ކުރި ކަމަށް މުވައްޒަފުން ބުންޏެވެ.
"ބޯ އަނބުރާހެން ހީވީ. އެންމެނަށް ވެސް އެހެންވި. މާ ފަހުން އެނގުނީ. ހުރިހާ ފްލޯތަކަށް ވެސް ހީވީ ހަމަ ބޯ އަނބުރާހެން. ވަރަށް ބޮޑަށް އިހުސާސްވި،" އެ އިމާރާތުގައި މަސައްކަތް ކުރި އެހެން މީހަކު ބުންޏެވެ.
މޯލްޑިވްސް މީޓިއޮރޮލޮޖިކަލް ސާވިސް އިން ބުނީ އެއީ ރާއްޖެއާ 2854 ކިލޯމީޓަރު ދުރުން އިންޑޮނީޝިއާގެ ސުމާޓްރާގެ ކަނޑު އަޑިއަށް އައި 6.0 މެގްނިޓިއުޑުގެ ބާރުގަދަ ބިންހެލުމެއް ކަމަށެވެ.
"ބިންހެލުމެއް ސުމަތުރާއަށް 08:29 ގައި އައިސްފައިވޭ، ރާއްޖެއަށް ވެސް [ބިންހެލުމުގެ އަސަރު] އިހުސާސްކުރެވުނު. މިބިންހެލުމުން ސުނާމީއެއް އުފެދޭނެކަމަށް ނުބެލެވޭ،" މެޓު އޮފީހުން ބުންޏެވެ.
