މިދިޔަ އަހަރު މަރުވެފައިވާ މީހަކު ފުލުހަށް ހާޒިރުނުވެ ހޯދަން ވެގެން އިއްޔެ އިއުލާން ކުރެވިގެން އެ ކަމަށް އެ މީހާގެ އާއިލާގެ ކިބައިންނާއި ރައްޔިތުންގެ ކިބައިން ފުލުހުން ވަނީ އިއްޔެ މާފަށް އެދިފަ އެވެ. އެކަމާ ގުޅިގެން ބޮޑެތި ފާޑުކިޔުންތަކެއް އެ އިދާރާއަށް ދަނީ އަމާޒުވަމުންނެވެ.

ދެ ހާސް ވިހި ވަނަ އަހަރު ހުށަހެޅުނު މައްސަލައެއްގައި ހާޒިރުވާން އެންގި އދ. ދަނގެތި، ޝައުކަތުﷲ އަލީ މަރުވެ އޭނާގެ ކަށު ނަމާދު ވަނީ މިދިޔަ އަހަރުގެ ޖޫން މަހުގެ 19 ވަނަ ދުވަހު ކޮށްފަ އެވެ.

ފުލުހުންގެ ތަހުގީގަށް ހާޒިރުވާން އަންގައި ކުރި އިއުލާނުގައިވާ ގޮތުން އެއީ ޖުލައި 27، 2020 ގައި ފުލުހަށް ހުށަހެޅި މައްސަލައެކެވެ. އިއުލާނުގައި ވަނީ އޭނާ ސެޕްޓެމްބަރު 2 ވަނަ ދުވަހުގެ މެންދުރު ހާޒިރު ވުމަށެވެ.

ފުލުހުން ވަނީ އިއްޔެ އެކަން އެނގުމުން ވަގުތުން އެ އިއުލާން ނަގައިފަ އެވެ.

އެކަމާ ގުޅިގެން ފުލުހުން އިއްޔެ ކުރި ޓްވީޓެއްގައި ބުނެފައިވާ ގޮތުން، އެ މީހާ ފުލުހުންގެ ތަހުގީގަށް ހާޒިރުވުމަށް އަންގައި އިއުލާނު ކުރެވިފައި ވަނީ އިދާރީ އޮޅުމަކުންނެވެ.

"މި ފުރުސަތުގައި، ނިޔާވެފައިވާ މީހާގެ އާއިލާއާއި އާންމުންގެ ކިބައިން، ދިވެހި ފުލުހުންގެ ހިދުމަތުގެ ފަރާތުން ނިހާޔަތަށް މައާފަށް އެދެމެވެ،" ފުލުހުން އިއްޔެ ކުރި ޓްވީޓްގައިވެ އެވެ.

އެ ފަދަ ކަމެއް ތަކުރާރުވިޔަ ނުދިނުމަށް ޓަކައި އަޅަން ޖެހޭ ފިޔަވަޅުތައް އަޅާނެ ކަމުގެ ޔަގީންކަން ވެސް ފުލުހުން ކުރި އެ ޓްވީޓްގައިވެ އެވެ.

ބައެއް މުހިންމު ހަބަރުތައް

• އިސްލާމިކް މިިނިސްޓްރީގެ ކުރީގެ ޕާމަނަންޓް ސެކްރެޓަރީ މުސްއަބް އަބްދުﷲއަށް ސިވިލް ސާވިސް ކޮމިޝަން (ސީއެސްސީ) އިން 1.18 މިލިއަން ރުފިޔާ ދިނުމަށް ހައި ކޯޓުން އަމުރުކުރީ އިއްޔެ އެވެ.

• ފަނޑިޔާރުންގެ ތެރެއިން ދިރިއުޅޭނެ އަމިއްލަ ތަނެއް ނެތް ފަނޑިޔާރުންނަށް އެފަދަ ތަނެއް ހޯދޭނެ މަގު ފަހިކޮށްދިނުމުގެ ގޮތުން، ސަރުކާރުން ނުވަތަ އަމިއްލަ ފަރާތްތަކުން ހިންގާ ބޯހިޔާވަހިކަމުގެ މަޝްރޫއުތަކުގެ ދަށުން ދޫކުރާ ބިމާއި ފްލެޓަށް ކުރިމަތިލެވޭނެ ގޮތަށް ފަނޑިޔާރުންގެ ގާނޫނަށް އިސްލާހު ގެނައުމުގެ ބިލު މަޖިލީހަށް ފޮނުވާފައިވާކަން ރިޕޯޓުކުރީ އިއްޔެ އެވެ.

• ކުރިއަށް އޮތް ރިޔާސީ އިންތިހާބުގައި ރައްޔިތުންގެ ކުރި މައްޗަށް ގެންނަ ކުރެހުންތަކާއި ޕްލޭންތަކާ އެއްގޮތަށް އަމަލުތައް ބަހައްޓާ، ކަންކަން ކުރާނީ ކޮން ބައެއްތޯ ފުންކޮށް ވިސްނުމަށް ރައީސް އިބްރާހިމް މުހައްމަދު ސޯލިހު އެދިވަޑައިގަތީ އިއްޔެ އެވެ.

ދުވަހުގެ ކޯޓޭޝަން

އެސްއޯއީތަކުން ބޯހިޔާވަހިކަމުގެ މަޝްރޫއުތައް ހިންގުމާ ސަރުކާރުން ދެކޮޅު ނަމަވެސް ސްޓެލްކޯއިން ކުރިއަށްގެންދާ އެފަދަ މަޝްރޫއުތައް ހުއްޓާލުމުގެ ވިސްނުމެއް ނުގެންގުޅުއްވާކަން ހާމަކުރައްވަމުން އެ ކުންފުނީގެ އެމްޑީ އަހްމަދު ޝަރީފް ވިދާޅުވީ:

އަޅުގަނޑުމެން އެއްވެސް ވަރަކަށް ސަރުކާރުގެ ބޯހިޔާވަހިކަމުގެ ޕޮލިސީ ތެރެއަކަށް އަޅުގަނޑުމެން ޕެނިޓްރޭޓެއް ނުވަން، އަޅުގަނޑުމެން އަޅުގަނޑުމެންގެ ސްޓާފުންނަށް ބޯހިޔާވަހިކަން ފޯރުކޮށްދިނުމުގެ މަސައްކަތްތަކެއް މި ކުރަނީ، އެއީ ދެން ސްޓެލްކޯއިން އަބަދުވެސް ކުރަން ރާވާފައި އޮތް ކަމެއް އެ ކަމަކީ،

ދުވަހުގެ ފޮޓޯ

މ. އަތޮޅަށް ކުރައްވަމުން ގެންދަވާ ދަތުރުފުޅުގައި މ. ވޭވަށަށް ވަޑައިގެންނެވުމުން އެ ރަށުން މަރުހަބާ ދެންނެވުމަށް ނުކުމެ ތިބި ރައްޔިތުންގެ ތެރެއިން ކުޑަކުއްޖަކާ ރައީސް ސޯލިހު ސަލާމް ކުރައްވަނީ. މިއީ ފާއިތުވެދިޔަ 10 އަހަރު ތެރޭ ވޭވަށަށް ރައީސް ކަމުގައި ހުންނެވި ބޭފުޅަކު ޒިޔާރާތްކުރެއްވި ފުރަތަމަ ފަހަރު --- ރައީސް އޮފީސް