މާލޭގެ ބައެއް މިސްކިތްތަކުގައި ނަމާދު ކުރާ އަޑު މަޑުކުރަން އެންގީ، ނަމާދު ކުރާ ވަގުތު ލައުޑު ސްޕީކަރު ޖައްސާފައި ހުރުމުން ބައެއް އާންމުންގެ ޝަކުވާ އެކަމާ ގުޅިގެން ލިބުމުން ކަމަށް އިސްލާމިކް މިނިސްޓްރީން މިއަދު ބުނެފި އެވެ.
ބަންގި ގޮވުމަށް ފަހު، ނަމާދުކުރާ ވަގުތު ލައުޑު ސްޕީކަރު ނިއްވާލަން އަންގާފައިވާ ކަމަށް އިސްލާމިކް މިނިސްޓްރީގެ މީޑިއާ އޮފިޝަލް އިސްމާއިލް އަފްރާހް މިއަދު މި ނޫހަށް ވިދާޅުވި އެވެ.
"ބައެއް މިސްކިތްތަކުގެ އިމާމުންނަށް އަންގާފައިމިވަނީ ބާރަށް އެގޮތަށް [ނަމާދު ކުރާ ވަގުތު] އަޑު ހުރެގެން ޝަކުވާ ލިބިފައިވާތީ ހަމައެކަނި އެ މިސްކިތްތަކުގެ އިމާމުންނަށް،" އޭނާ ވިދާޅުވި އެވެ.
އަފްރާހު ވިދާޅުވި ގޮތުގައި މިނިސްޓްރީން އަބަދުވެސް އަމަލު ކުރަމުން އަންނަ އުސޫލަކީ ނަމާދު ކުރާ ވަގުތުގައި ވެސް ބޭރަށް އަޑު އިވޭ ގޮތަށް ހުރުން ކަމަށެވެ.
"އެހެންނަމަވެސް ޝަކުވާ އާންމުކޮށް އައިސްފައި މި ހުންނަނީ [ނަމާދު ކުރާ ވަގުތު] ލައުޑު ސްޕީކަރަށް އަޑު ދީފައި ހުންނާތީވެ، ބަންގި ގޮވަން އާންމުކޮށް ލައުޑު ސްޕީކަރު މި ބޭނުން ކުރަނީ، ނަމާދު ކުރާއިރު މި ހުންނަނީ ވަށައިގެން ހުންނަ ސްޕީކަރުތައް،" އޭނާ ވިދާޅުވި އެވެ.
މިއީ އާންމު އެންގުމެއް ނޫން ކަމަށް ވެސް އަފްރާހު ވިދާޅުވި އެވެ.
ނަމަވެސް، މިގޮތަށް އަންގާފައިވަނީ މާލޭގެ ކިތައް މިސްކިތަށް ކަމާއި އެއީ ކޮންކޮން މިސްކިތްތަކެއް ކަން އޭނާ ވިދާޅުވެފައެއް ނުވެ އެވެ.
