ރާއްޖޭގައި އޭލެވެލް ހަދާ ދަރިވަރުންނަށް ދެމުން ގެންދާ އެޑެކްސަލް އިމްތިހާންގެ ބަދަލުގައި ކޭމްބްރިޖް އިމްތިހާން ދޭން އެޑިޔުކޭޝަން މިނިސްޓްރީން ނިންމައި އެކަން އިއުލާނުކުރީ އިއްޔެ އެވެ.

އޭ-ލެވަލް އިމްތިހާނު ބަދަލުކުރުމާ ގުޅިގެން މިނިސްޓްރީން ބުނީ އަންނަ އަހަރުން ފެށިގެން މަތީ ސާނަވީ ގްރޭޑުތަކުގައި، އެއީ ގްރޭޑު 11 އަދި 12 ގައި، ކިޔަވައިދޭނީ މިހާރު ވެސް އޯލެވަލްގައި ކިޔަވައިދޭ ކޭމްބްރިޖް ސިލަބަހަށް ކަމަށެވެ.

މިބަދަލާ ގުޅިގެން މިނިސްޓްރީއަށް އަމާޒުވަމުންދާ ފާޑުކިިޔުންތަކަށް ރައްދުދެމުން އެޑިޔުކޭޝަނުން އިއްޔެ ބުނީ މިއީ ކުއްލިއަކަށް ނިންމި ނިންމުމެއް ނޫންކަން ސާފުކޮށްދެމުން މިކަމަށް މަޝްވަރާކުރާތާ އަހަރުތަކެއް ވެފައިވާ ކަމަށް ބުނެފަ އެވެ.

އެގޮތުން، މީޑިއާތަކާ ހިއްސާކުރި މެސެޖެއްގައި އެޑިޔުކޭޝަނުން ބުނި ގޮތުގައި މިއީ އޯލެވަލްގައި ކޭމްބްރިޖް އިމްތިހާނު ހެދުމަށް ފަހު އޭލެވަލްގައި އެޑެކްސެލް މާއްދާތައް ކިޔަވަން ޖެހުމުން ދަރިވަރުންނަށް ދިމާވާ ދަތިތައް ހައްލުކުރުމާ ގުޅޭގޮތުން 2019 ވަނަ އަހަރުގެ ކުރީކޮޅުގައި ބޭއްވުނު ކަރިކިޔުލަމް ރިވިއު ސިމްޕޯސިއަމްގަައި ސްކޫލުތަކުގެ ޕްރިންސިޕަލުންނާއި، ލީޑިން ޓީޗަރުންނާއި އަދި ޓީޗަރުންނާއެކު ކުރެވުނު މަޝްވަރާތަކުގެ އަލީގައި ނިންމި ނިންމުމެކެވެ.

މި ބަދަލު ގެންނަން ނިންމި އެހެން ސަބަބުތައް ފާހަގަކުރަމުން އެޑިޔުކޭޝަނުން ބުނީ ކޭމްބްރިޖް އިމްތިހާނަކީ ބައިނަލްއަގުވާމީ މުޖުތަމައަށް ހާއްސަ އިސްކަމެއްދޭ، އަދި ބައިނަލްއަގުވާމީ ދަރިވަރުންނަށް ހާއްސަ އިމްތިހާނެއް ކަމަށެވެ. އަދި ކޭމްބްރިޖްގެ އޭ-ލެވަލްއަކީ ލީނިއާ އިމްތިހާނަކަށް ވުމުން ކިޔަވައިދިނުމަށާއި އިމްތިހާނަށް ރަނގަޅަށް ތައްޔާރުވުމަށް އެކަށީގެންވާ ވަގުތު ލިބި، ދަރިވަރުން އުނގެނޭ މަފްހޫމްތައް އެކަތިއަނެކައްޗާ ގުޅުވުމަށް މާބޮޑަށް ފަސޭހަވެ، ދަރިވަރުންގެ ޖުމުލަ ނަތީޖާ ރަނގަޅުވެ މުޖުތަމަޢަށް ލޯ ހުޅުވޭމިންވަރު ބޮޑުކަން ފާހަގަކުރެވިފައިވާ ކަމަށެވެ.

އޭގެ އިތުރުން މިއީ އިމްތިހާނުގެ ކަންކަން ރާވައި ހިންގަން ޑިޕާޓްމަންޓް އޮފް ޕަބްލިކް އެގްޒެމިނޭޝަންސް އަދި ސްކޫލުތަކަށް އެތައް ފަސޭހަތަކެއް ލިބިގެން ދާނެ ކަމެއްގެ ގޮތުގައި މިނިސްޓްރީއަށް ފާހަގަވާ ކަމަށް ވެސް ބުންނެވެ.

ކޭމްބްރިޖް އިމްތިހާނަށް ބަދަލުކުރުމާ ގުޅުވާ މިނިސްޓްރީއަށް އަމާޒުވީ އަނެއް ފާޑުކިޔުމަކީ ކޭމްބްރިޖަކީ އެޑެކްސެލްއަށް ވުރެ ފެންވަރު ދަށް ނުވަތަ ފެންވަރުގައި ތަފާތުތަކެއް އުޅޭ އިމްތިހާނެއް ކަމަށް ބައެއް މީހުން ބުނުމެވެ. މިކަމާ ގުޅުވާ އެޑިޔުކޭޝަނުން ބުނީ ފެންވަރުގައި ތަފާތެއް ހުރިކަަމަށް ފާހަގަކުރެވިފައި ނުވާ ކަމަށާއި މި ދެ އިމްތިހާނުގެ ނަތީޖާއަކީ ވެސް ބައިނަލްއަގުވާމީ ފެންވަރުގައި ބަލައިގަންނަ ނަތީޖާތަކެއް ކަމަށެވެ.

އަންނަ އަހަރުން ފެށިގެން ކޭމްބްރިޖް ސިލަބަސް ފެށި ނަމަވެސް މި އަހަރު މަތީ ސާނަވީ ގްރޭޑް 11 ގައި ކިޔެވުން ފަށާ ދަރިވަރުންގެ އިމްތިހާނުތަކަށް އެއްވެސް ބަދަލެއް ނާންނާނެ ކަމަށް މިނިސްޓްރީން ވަނީ އަންގާފަ އެވެ.

އިމްތިހާނަށް އަމަލުކުރަން ފަށާނެ ޝެޑިއުލް

• 2023-2024 ވަނަ އަހަރު ކެމްބްރިޖް އިންޓަނޭޝަނަލް އޭ-އެސް އިމްތިހާނު ބޭއްވުން
• 2024 ވަނަ އަހަރުގެ އޮކްޓޫބަރު/ ނޮވެމްބަރުގައި އިމްތިހާނު ބޭއްވުން
• 2024-2025ވަނަ އަހަރު ކެމްބްރިޖް އިންޓަނޭޝަނަލް އޭ-އެސް އިމްތިހާނު ބޭއްވުން
• 2025ވަނަ އަހަރުގެ އޮކްޓޫބަރު/ ނޮވެމްބަރުގައި އިމްތިހާނު ބޭއްވުން

ބައެއް މުހިންމު ހަބަރުތައް

• އެމްއެމްޕީއާރުސީގެ ހިޔާނާތުގެ ފައިސާ ދައުރުކުރަން ބޭނުންކުރުމާ ގުޅިގެން ފްރީޒްކޮށްފައިހުރި އެސްއޯއެފް ކުންފުނީގެ އެކައުންޓްތަކާއި އެ ކުންފުންޏާ ގުޅުންހުރި އެހެން އެކައުންޓްތައް ދޫކޮށްލުމަށް ސިވިލް ކޯޓުން އަމުރުކުރީ އިއްޔެ އެވެ.

• އިންސާފު ހޯދުމަށްކަމަށް ބުނެ ޖިނާއީ މައްސަލަތަކުގައި ތުހުމަތު ކުރެވޭ މީހުންނާމެދު ގާނޫނުތަކާ ހިލާފު އަނިޔާވެރި އަމަލުތައް ހިނގުން ހުއްޓާލުމަށް ފުލުހުން އިލްތިމާސްކުރީ އިއްޔެ އެވެ.

• ރައީސް އޮފީހުގެ ތަރުޖަމާނަކަށް ފޮރިން މިނިސްޓްރީގެ ކުރީގެ ކޮމިއުނިކޭޝަން ޑިރެކްޓަރު މުހައްމަދު މިއުވާން ހަމަޖެއްސީ އިއްޔެ އެވެ.

ދުވަހުގެ ކޯޓޭޝަން

ރާއްޖޭގެ އުތުރުގައި މިހާރު އިންޑިއާގެ ރަށެއްގެ ގޮތުގައި އޮތް މަލިކަކީ އެއްވެސް އިރެއްގައި ރާއްޖޭގެ ރަށެއް ނޫން ކަމަށް ޕްލޭނިން މިނިސްޓަރު މުހައްމަދު އަސްލަމް ވިދާޅުވުމާ ގުޅިގެން "އަދަދު" އާ ވާހަކަ ދައްކަމުން ހެރިޓޭޖް މިނިސްޓްރީގެ ރިސާޗް އެނަލިސްޓް އަދި ޒުވާން ތާރީހު އިލްމުވެރިޔާ އަހުމަދު އަލާ ދީދީ ވިދާޅުވީ:

ރާއްޖޭގެ ސަރަހައްދު ބަޔާން ކުރާ އިރު މަލިކައްޑޫ މިދެމެދު، އެހެން ވެސް އެބަހުރި ލިޔެފައި. އެހެރީ ފަތްފަތްކޮޅުތަކުގައި ވެސް ފެންނަން. ހޮޅީން ރާއްޖެ އަރާ ރާއްޖެ އަޅުވެތިކުރުމާ ހަމައަށް މަލިކު އޮތީ ދިވެހީންގެ އަތްދަށުގައި. އެހެން އޮވެފައި 1752 ގައި ރާއްޖޭގެ އަތްދަށުން މަލިކު އަަސްލުގައި މި ނެއްޓުނީ،

ދުވަހުގެ ފޮޓޯ

ދިވެހި ޕްރިމިއާ ލީގުގެ ކޮލިފިކޭޝަންގެ ފުރަތަމަ ބުރުގައި ސުޕަ ޔުނައިޓެޑް ސްޕޯޓްސް (ސަސް) އަދި ދެވަނަ ޑިވިޝަނުގެ ޗެމްޕިއަން ބުރު ސްޕޯޓްސް ކްލަބް ބައްދަލުކުރި މެޗުގެ ތެރެއިން. މި މެޗު 2-0 ކާމިޔާބުކުރީ ސަސް. --- ފޮޓޯ: އަބްދުﷲ އިޔާން/އަދަދު