ސަރުކާރުން ލޯނު ނެގުމުގެ ކުރިން އެ ލޯނު ނަގަން ރައްޔިތުންގެ މަޖިލީހުގެ ހުއްދަ ހޯދަން ޖެހޭ ގޮތަށް ދައުލަތުގެ މާލިއްޔަތު ގާނޫނަށް އިސްލާހު ގެނައުމަށް މަހިބަދޫ ދާއިރާގެ މެންބަރު އަހްމަދު ތޯރިގް ހުށަހެޅުއްވި ބިލު މަޖިލީހުގެ ތަޅުމުން މިއަދު ބޭރުކޮށްލައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އެ ބިލު ބަލައިގަތުމާމެދު ގޮތެއް ނިންމުމަށް ނެގި ވޯޓުގައި 41 މެންބަރުން ވަނީ ބިލު ބަލައިގަންނަން ނުފެންނަ ކަމަށް ވޯޓު ދެއްވާފަ އެވެ. ބިލު ބަލައިގަންނަން ފެންނަ ކަމަށް ވޯޓު ދެއްވީ ފަސް މެންބަރުންނެވެ.
ތޯރިގް ހުށަހެޅުއްވި އެ ބިލުގެ މަގްސަދެއްގެ ގޮތުގައި ވަނީ ކޮވިޑް-19 އާއި ރަޝިއާ/ޔޫކްރެއިން ހަނގުރާމައިގެ ސަބަބުން ދުނިޔޭގެ އިގްތިސޯދު ދަށްވެފައިވާ ހާލަތެއްގައި ކޮންމެހެން ނަގަން ޖެހޭ ލޯނެއް ނޫނީ ނުނަގާކަން ކަށަވަރު ކުރުމެވެ.
އެ ބިލުގައިވާ ގޮތުން ސަރުކާރުން ނަގާ ލޯނެއް، ގެރެންޓީއެއް އަދި ކޮންމެ ބާވަތެއްގެ ދަރަންޏެއްގެ ސަބަބުން އިގްތިސޯދަށް ކުރާ އަސަރު ދިރާސާކޮށް ފިނޭންސް މިނިސްޓަރު ރިޕޯޓް ތައްޔާރު ކުރަން ޖެހޭނެ އެވެ.
މިނިސްޓަރު ތައްޔާރު ކުރާ ދިރާސާ ރިޕޯޓް ރައްޔިތުންގެ މަޖިލީހަށް ފޮނުވަން ޖެހޭނެ ކަމަށާއި އެ ދަރަންޏެއް ނެގޭނީ މަޖިލީހުގެ ޖަލްސާއަކަށް ހާޒިރުވެ އެ ކަމަށް ނެގޭ ވޯޓުގައި ބައިވެރިވާ މެންބަރުންގެ އަގުލަބިއްޔަތުން ކަމަށް ވެސް ބިލުގައިވެ އެވެ.
