ތިމާވެއްޓާ ބެހޭ މިނިސްޓްރީގެ ސްޓޭޓް މިނިސްޓަރު އަލީ ސޯލިހު މަރައިލަން މިއަދު މީހަކު ދިން ހަމަލާއިން އޭނާ ސަލާމަތްވީ ވަރަށް ހަނި ގޮތަކަށް ކަން އެ މަންޒަރު ފެންނަ ވީޑިއޯއަކުން އެނގިއްޖެ އެވެ.
މިހާރު ސޯޝަލް މީޑިއާގައި އާއްމުވެފައިވާ ވީޑިއޯއަކުން ފެންނަ ގޮތުގައި ސައިކަލެއްގެ މަތީގައި އިން އަލީއަށް ހަމަލާދިން މީހާ ގައިގާ ހުރިހާ ބާރެއް ލާފައި ވަޅިއަޅަން މަސައްކަތްކުރީ އަލީގެ ކަރުގަ އެވެ. ފުރަތަމަ ފަހަރު އޭނާ ވަޅި މަޅައިލުމުން އަލީ ދިފާއުވީ ހަމަލާދިން މީހާއާ ދުރަށް އަރިވެގެންނެވެ. ދެވަނަ ފަހަރަށް އޭނާ ހަމަލާ ދިނީ ވީޑިއޯއިން ފެންނަ ގޮތުގައި އަލީގެ ކުރިމަތިން ވަރަށް ކައިރިއަށް ޖެހި ހުރެ އެވެ.
ކަރުގައި ވަޅި އަޅަން އުޅުމުން އަލީ އޭނާގެ ވައަތް ހުރަސްކޮށް އެ ހަމަލާއިން ސަލާމަތްވެ، ސައިކަލް ދޫކޮށްލާފައި ދުވެފައި ދާތަން ވީޑިއޯއިން ފެނެ އެވެ.
އެވަގުތު މަގުމަތީގައި ތިބި މީހުންގެ ތެރެއިން ބައެއް މީހުން، ހަމަލާދިން މީހާއާ ދިމާލަށް ދިޔަކަން ވީޑިއޯއިން އެނގެ އެވެ.
"ނާންނާތި އެއް ... ވެސް، އަތް ލައިފިއްޔާ ކަތިލާނަން،" ހަމަލާދިން މީހާ އެވަގުތު ބުނާ އަޑު އިވެ އެވެ.
އަލީ ސޯލިހަށް ހަމަލާދިން މީހާ މިހާރު ވަނީ ފުލުހުން ހައްޔަރުކޮށްފަ އެވެ. އެއީ ސަލްމާން މިސްކިތުގެ މިމްބަރަށް އަރައި ހަޅޭއްލެވި މައްސަލައެއްގައި މީގެ ކުރިން ހައްޔަރު ކުރި މީހާ އެވެ.
އަލީ "އަދަދު" އަށް ވިދާޅުވީ އޭނާއަށް ހަމަލާދިނީ ހުޅުމާލޭ މަގުމަތިން ކަމަށާއި ހަމަލާދިން މީހާ މަސައްކަތް ކުރީ ކަރުގައި ވަޅި އަޅަން ކަމަށެވެ.
"އަޅުގަނޑު ހުރީ ސައިކަލުގައި. އޭނާ ވެސް ސައިކަލުގައި ފަހަތުން އައިސް ފުރަތަމަ ހަޅޭއްލެވީ. ފަހުން ދަބަހުން ވަޅިއެއް ނަގައި ހަމަލާދިނީ،" އަލީ ސޯލިހު ކިޔައިދިނެވެ.
އޭނާ ވިދާޅުވީ ހަމަލާދިން މީހާގެ ވަޅި އޭނާގެ ކަރަށް އަމާޒުނުވީ އަތް ނެގުމުން ކަމަށެވެ. ނަމަވެސް އަތަށް ގެއްލުންވި ކަމަށާއި މިހާރު އެކަމަށް ހޮސްޕިޓަލުން ފަރުވާ ހޯދާފައިވާ ކަމަށް އޭނާ ވިދާޅުވި އެވެ.
"ވަޅި ނަގާ ހޫރާލިތަނާ އަޅުގަނޑު އޭނާގެ ގަޔާ ދިމާލަށް ސައިކަލު ދުއްވާލާފަ، ސައިކަލުން ފައިބައިގެން ދުވެ، ފިލީ. ޕިކަޕަކަށް ގޮސް އެރީ،" އެ ވަގުތު ކަންތައް ހިނގި ގޮތް އަލީ ސޯލިހު ތަފްސީލުކޮށްދެއްވަމުން އަލީ ވިދާޅުވި އެވެ.
ފުލުހުން ބުނީ އަލީ ސޯލިހަށް ތޫނު އެއްޗަކުން ހަމަލާދިން މައްސަލަ މިއަދު 13:26 ގައި ފުލުހުންނަށް ހުށަހަޅާފައިވާ ކަމަށާއި އެ މައްސަލައާ ގުޅިގެން ދިވެހި ފިރިހެނަކު ހައްޔަރުކޮށްފައިވާ ކަމަށެވެ. އަލީއަށް ހުޅުމާލެ ހޮސްޕިޓަލްގައި ފަރުވާ ދެމުން އަންނަ ކަމަށް ވެސް ބުންޏެވެ.
