ގއ. ދާންދޫގެ މިނި ކަށިގަނޑެއް ފެނިއްޖެ އެވެ.
އެ ރަށު ކައުންސިލުގެ ރައީސް މުހައްމަދު އާސިފް ވަނީ އެރަށުން އިންސާނެއްގެ ކަށިގަނޑެއް ފެނިގެން އުޅޭކަން "އަދަދު" އަށް ކަށަވަރުކޮށްދެއްވާފަ އެވެ.
އޭނާ ވިދާޅުވީ، ފެނިފައި ވަނީ އެންމެ ކަށިގަނޑެއް ކަމަށާއި، އެ ކަށިގަނޑު ފެނިގެން ފުލުހުންނަށް ރިޕޯޓު ކުރީ އާންމު މީހެއް ކަމަށެވެ.
އަދި އެ ކަށިގަނޑު ފެނުނު ސަރަހައްދު ބަލާ ފާސްކޮށްފައިވާއިރު، އިތުރު ކަށިގަނޑެއް ނުފެންނަ ކަމަށެވެ. އާސިފް އިތުރަށް ވިދާޅުވީ މިހާރު އެ ކަށިގަނޑު ވަނީ ފުލުހުންނާ ހަވާލުކޮށްފައި ކަމަށެވެ.
"މި ރަށުގެ ނަރުދަމާގެ މަސައްކަތް ވެސް ކުރިއަށް އެބަދޭ. ވެދާނެ ކޮނުމުގެ ތެރެއިން ފެނުނު ކަށިގަނޑަކަށް ވެސް،" އާސިފް ވިދާޅުވި އެވެ.
އެ ކަށިގަނޑަކީ މިނި ކަށިކޮޅެއްކަން ޔަގީންކޮށްދިން ޑޮކްޓަރާ ހަވާލާދީ އާސިފް ވިދާޅުވީ އެއީ ކަނާތު ފައިގެ ހުޅަށްވުރެ މަތީގައި ހުންނަ ކަށިގަނޑު ކަމަށެވެ.
ދާންދުއިން ފެނުނު މިނި ކަށިގަނޑު ފުލުހުންނާ ހަވާލުކޮށްފައިވާއިރު، މިކަމުގައި އަދި ފުލުހުންގެ ބަހެއް ލިބިފައެއް ނުވެ އެވެ.
