ރާއްޖޭގެ ފޮރިން ސާވިސްއަށް ހިނގާ ހަރަދު މާބޮޑު ކަމަށް ވިދާޅުވެ، ފޮރިން ސާވިސްގެ އޮޑިޓެއް ހަދަން ރައްޔިތުންގެ މަޖިލީހުގެ ނައިފަރު ދާއިރާގެ ޕީޕީއެމް މެމްބަރު އަހުމަދު ޝިޔާމް މިއަދު ގޮވާލައްވައިފި އެވެ.
ބައެއް ގައުމުތަކަށް ސަފީރުން އައްޔަން ކުރުމާ ބެހޭ ގޮތުން މަޖިލީހުގެ ހާރިޖީ ގުޅުންތަކާ ބެހޭ ކޮމިޓީން ނިންމި ގޮތުގެ ރިޕޯޓަށް މަޖިލީހުގެ މިއަދުގެ ޖަލްސާގައި ކުރި ބަހުސްގައި ޝިޔާމް ވިދާޅުވީ ސިވިލް ސާވިސް އަށް ކުރާ ވަރަށް ވުރެ ބޮޑު ހޭދައެއް ފޮރިން ސާވިސް އަށް ހިނގާ ކަން މިހާރު އެނގޭ ކަމަށެވެ.
ދައުލަތުން މުސާރަދޭ އެންމެ ގިނަ މުވައްޒަފުން ތިބި ސިވިލް ސާވިސް އަކީ ފޮރިން ސާވިސްއާ އަޅާ ބަލާއިރު މާ ގިނަ މަސައްކަތްތައް ކުރާ އަދި މާގިނަ ވަސީލަތްތައް ބޭނުންވާ ދާއިރާ އެކެވެ. ޝިޔާމް ތުހުމަތު ކުރެއްވި ގޮތުގައި ބައެއް ވަޒީރުންނާއި ރައްޔިތުންގެ މަޖިލީހުގެ މެމްބަރުންގެ އާއިލާތަކުގެ މެމްބަރުންނަށް ވީތީ ބައެއް މީހުންނަށް ފޮރިން ސާވިސްގެ ވަޒީފާތައް ދީފައި އެބަހުއްޓެވެ.
"އަޅުގަނޑު ގޮވައިލަން މިއަދު ފޮރިން ސާވިސްގެ އޮޑިޓެއް ހައްދަވަން. ސިވިލް ސާވިސްއަށް ވުރެ ބޮޑު ހޭދައެއް މިއަދު ކުރާކަން އަޅުގަނޑުމެންނަށް އެބަ އެނގޭ ފޮރިން ސާވިސްއަށް،" ޝިޔާމް ވިދާާޅުވި އެވެ.
ޝިޔާމް މިމޭރުމުން ވާހަކަ ދެއްކެވީ ފޮރިން ސާވިސްއަށް ގިނައިން ހަރަދުކުރާ ކުރުން ދިފާއުކުރައްވައި އެމްޑީޕީގެ ބައެއް މެމްބަރުން މިއަދުގެ ޖަލްސާގައި ވާހަކަ ދެއްކެވުމުންނެވެ. އޭގެ ތެރެއިން ބައެއް މެމްބަރުންގެ ނަންތައް ވިދާޅުވެ އޭނާ ރައްދު ދެއްވި އެވެ.
ފޮރިން ސާވިސްއަށް ކުރާ ހަރަދު ދިފާއުކުރައްވައި ހެންވޭރު ދެކުނު ދާއިރާގެ މެމްބަރު ހުސައިން ޝަމީމް (އަނދުން ހުސައިން) ވިދާޅުވީ އިދިކޮޅު ބައެއް މެމްބަރުން ވާހަކަ ދެއްކެވީ ފޮރިން ސާވިސްއަށް ކުރާ ހޭދައާ އަޅާ ބަލާއިރު ދައުލަތަށް ލިބޭ އެއްޗަކާއި ވާ ފައިދާތައް އޮޅޭ ގޮތަށް ކަމަށެވެ.
އޭނާ ވިދާޅުވީ ފޮރިން ސާވިސް މުވައްޒަފުންނަށް މިހައިތަނަށް ދެމުން އަންނަނީ ކުރީގެ ސަރުކާރުން ކަނޑައަަޅާފައިވާ މުސާރަޔާއި އިނާޔަތްތައް ކަމަށެވެ.
"[ފޮރިން ސާވިސް މުވައްޒަފުންނަށް] އިތުރު އިނާޔަތްތަކެއް މި ސަރުކާރުން ގިނަކޮށްފައި ދީފައެއް ނެތް،" ހުސައިން ވިދާޅުވި އެވެ.
ރާއްޖޭގެ އެެމްބަސީތަކުގައި ތިބޭ މުވައްޒަފުން ކުރާ މަސައްކަތުން ބައިނަލްއަގުވާމީ މުޖުތަމައުގައި ރާއްޖެއަށް އިތުބާރު ހޯދައިދޭ ކަމަށް ވެސް އޭނާ ވިދާޅުވި އެވެ.
