ކޯޕެންހޭގަން، ޑެންމާކް (ޖުލައި 25) - މަންކީޕޮކްސްއާ ދެކޮޅަށް ސްމޯލްޕޮކްސް ވެކްސިން ބޭނުން ކުރުމުގެ ހުއްދަ ޔޫރަޕިއަން ކޮމިޝަނުން ދީފި އެވެ.
މަންކީޕޮކްސް ފެތުރެމުން ދާތީ ދުނިޔޭގެ ސިއްހަތު ޖަމިއްޔާ (ޑަަބްލިއުއެޗްއޯ) އިން ވަނީ ސިއްހީ ކުއްލި ނުރައްކަލެއް އޮތް ކަމަށް އިއުލާނުކޮށްފަ އެވެ.
"ކުންފުނީގެ ސްމޯލްޕޮކްސް ވެކްސިން، އިމްވަނެކްސް، މާކެޓް ކުރުމުގެ ހުއްދަ ޔޫރަޕިއަން ކޮމިޝަނުން ދީފި. އެއީ މަންކީޕޮކްސްއާ ދެކޮޅަށް ރައްކާތެރިކަން ލިބޭނެތީ،" އެ ވެކްސިން އުފެއްދި ބެވޭރިއެން ނޯޑިކް ކުންފުނިން ބުންޏެވެ.
"އެ ހުއްދަ ތަންފީޒު ކުރެވޭނީ އީޔޫގެ ހުރިހާ މެމްބަރު ދައުލަތްތަކާއި އައިސްލޭންޑް، ލިޗްޓެންސްޓެއިން އަދި ނޯވޭގައި."
އިމްވަނެކްސްއަށް އީޔޫއިން ފުރަތަަމަ ހުއްދަ ދިނީ 2013 ވަނަ އަހަރު ސްމޯލްޕޮކްސް ނުވަތަ ކަށިވިދުރިއާ ދެކޮޅަށެވެ. ސްމޯލްޕޮކްސް އާއި މަންކީޕޮކްސްގެ އެއްގޮތްކަމުގެ ސަބަބުން މި ވެކްސިން މަންކީޕޮކްސް ނުވަތަ މަކުނުވިދުރިއާ ދެކޮޅަށް ބޭނުންކުރެވޭނެ ކަމަށް ކުރިން ވެސް އޮތީ ބެލެވިފަ އެވެ.
ސްމޯލްޕޮކްސް ދުނިޔެއިން ނައްތާލީ 1980 ގަ އެވެ. މަންކީޕޮކްސްއަކީ އެއަށްވުރެ ނުރައްކާ ކުޑަ އަދި ގައިން ގަޔަށް އަރާ ވަރު ވެސް މަދު ބައްޔެކެވެ.
މަންކީޕޮކްސްއަކީ ދޭތެރެ ދޭތެރެއިން އެފްރިކާގެ ބައެއް ގަައުމުތަކުން ފެންނަ ބައްޔެކެވެ. ނަމަވެސް އާއްމުކޮށް މި ބަލި ނުފެންނަ ގައުމުތަކުން، މި އަހަރުގެ މިހާތަނަށް 16،000 އަށް ވުރެ ގިނަ ކޭސް ރިޕޯޓުކޮށްފައިވެ އެވެ.
އެމެރިކާ އާއި ޔޫރަޕްގައި މި ބަލި ބޮޑަށް ފެތުރެމުން ދަނީ އެއް ޖިންސުން ގުޅުން ހިންގާ ފިރިހެނުންގެ މެދުގަ އެވެ. އެކަމަކު މި ބަލި ކޮންމެ މީހަކަށް ވެސް ޖެހުމުގެ ފުރުސަތު އޮވެ އެވެ.
