މިނިވަން ދުވަަހުގެ ރަސްމީ ޖަލްސާ އާއި އެ ދުވަސް ފާހަގަ ކުރުމަށް ސަރުކާރުގެ އޮފީސްތަކުން ތައްޔާރުކުރަން ނިންމި ފުޅަނދުބުރު، ހަރަދު ކުޑަ ކުރުމުގެ ފިޔަވަޅެއްގެ ގޮތުން މިއަހަރު ނުބާއްވާ ގޮތަށް ނިންމައިފި އެވެ.
އެ މިނިސްޓްރީގެ ކޮމިއުނިކޭޝަންސް ޑިރެކްޓަރު ހަފްސީ އަބްދުﷲ "އަދަދު" އަށް ވިދާޅުވީ ރައީސުލްޖުމްހޫރިއްޔާ އޮފީހުގެ ލަފާގެ މަތިން، ހަރަދު ކުޑަކުރުމުގެ ގޮތުން ދިދަ ނެގުމުގެ ރަސްމިއްޔާތެއް ބޭއްވުމުގެ އިތުރުން އެހެން ކަމެއް ނުކުރާނެ ކަމަށެވެ.
ހަރަދު ކުޑަކުރުމުގެ ގޮތުން މިނިވަން ދުވަހުގެ ހަރަކާތްތައް ކެންސަލް ކޮށްފައި މިވަނީ ދެ އަހަރުގެ މެދުކެނޑުމަށްފަހު މިއަހަރު ފުޅަނދުބުރު ބާއްވަން ރޭވުމަށްފަހު އެވެ. ސަރުކާރުން ޝަރަފުވެރިކަމުގެ އިނާމު އެރުވުމަށް ބާއްވާ ހާއްސަ ޖަލްސާ މީގެ ކުރިން އެއް ފަހަރު ކޮވިޑާ ގުޅިގެން ވެސް ކެންސަލްކޮށްފައިވެ އެވެ.
ދިދަ ނެގުމުގެ ރަސްމިއްޔާތު ބާއްވާނީ އަންނަ އަންގާރަ ދުވަހުގެ ހެނދުނު 6:00ގައި ޖުމްހޫރީ މައިދާނުގަ އެވެ.
ދައުލަތް ހިންގުމުގެ ހަރަދު ކުޑަކުރަން ގިނަ ފިޔަވަޅުތަކެއް އަޅަން ފިނޭންސް މިނިސްޓްރީން ނިންމާފައި ވަނީ މިދިޔަ ޖޫން 19، ގަ އެވެ. އެ ފިޔަވަޅުތައް އަޅަން ނިންމީ ދުނިޔޭގެ އިގުތިސޯދަށް މިހާރު ކުރިމަތިވެފައިވާ ހީނަރުކަމުގެ ތެރެއިން ތެލާއި ކާބޯތަކެތީގެ އަގުތައް އުފުލެމުންދާތީ، ހަރަދުތައް ފޫބައްދަން ދަތިވެފައިވާތީ އެވެ.
ޖުމްލަ ހަތް ދާއިރާއަކުން ހަރަދުތައް ކުޑަކުރަން އަންގާފައިވާއިރު، އޭގެ ތެރޭގައި އާ މަގާމެއް ނުއުފެއްދުމާއި މުސާރައިގެ އޮނިގަނޑަށް ބަދަލު ނުގެނައުމާއި މިހާރު ދޭން ފަށާފައިނުވާ އާ އެލަވަންސެއް ދޭން ފެށުން މަޑުޖައްސާލުމަށް ވަނީ އަންގައިފަ އެވެ. އަދި މިނިސްޓްރީގެ ހުއްދަ ނުހޯދައި ޕްރޮމޯޝަން ނުދިނުމާއި ރަސްމީ ގަޑިއަށް ފައްތައިގެން އިތުރުގަޑީގައި މަސައްކަތްތައް ކުރަންނުޖެހޭ ގޮތަށް މަސައްކަތްތައް ރޭވުމަށް ވެސް އެ އިއުލާނުގައި އަންގާފައިވެ އެވެ.
ހަރަދު ކުޑަކުރަން އަންގާ ފިނޭންސް މިނިސްޓްރީން ކުރި އިއުލާނުގައި އިތުރަށް ވަނީ ރާއްޖޭން ބޭރަށް ދައުލަތުން އެއްވެސް ހަރަދެއް ކޮށްގެން ކުރާ ރަސްމީ ދަތުރުތައް މިވަގުތަށް ހުއްޓާލުމާއެކު ރާއްޖެތެރެއަށް ކޮންމެހެން ކުރަންޖެހޭ ދަތުރުތައް ވެސް މިނިސްޓްރީގެ ހުއްދަ ހޯދަންޖެހޭ ގޮތަށް ބަދަލުކޮށްފަ އެވެ.
މީގެ އިތުރުން، ކެޕިޓަލް ހަރަދާއި، އޮފީސް ހިންގުމަށްދާ ހަރަދުތަކާއި ތަމްރީންތަކަށްދާ ހަރަދުތައް ވެސް 5،000ރ. އަށް ވުރެ އިތުރުވާ ނަމަ، މިނިސްޓްރީގެ ހުއްދަ ހޯދައިގެން މެނުވީ ނުކުރުމަށް ވަނީ އަންގައިފަ އެވެ.
