ދުނިޔޭގެ އެކި ގައުމުތަކުގައި މިހާރު ފެތުރެމުންދާ މަންކީޕޮކްސްއަކީ އާންމު ސިއްހަތަށް ހުރި ނުރައްކަލެއްގެ ގޮތުގައި ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ކަނޑައަޅައިފި އެވެ.
އާންމު ސިއްހަތަށް ހުރި ނުރައްކަލެއްގެ ގޮތުގައި މަންކީޕޮކްސް ކަނޑައަޅާފައި މިވަނީ މި ބަލި ފެންނަ މިންވަރު ވަރަށް ބޮޑުތަނުން އިތުރުވެފައިވާ ދަނޑިވަޅެއްގަ އެވެ. މި ނިންމުން ނިންމާފައި ވަނީ މި ބަލި ފެނުމާ އެކު ސިއްހަތު ޖަމިއްޔާއިން އެކުލަވާލި އިމަޖެންސީ ކޮމިޓީގެ ދެވަނަ ބައްދަލުވުމަށް ފަހު އެވެ.
ދުނިޔޭގެ 75 ގައުމަކުން މިހާތަނަށް މަންކީޕޮކްސްގެ 16،000 އަށްވުރެ ގިނަ ކޭސް ވަނީ ރިޕޯޓުކޮށްފަ އެވެ. އަދި، މި ބަލީގައި މިހާތަނަށް ފަސް މީހަކު ވަނީ މަރުވެފަ އެވެ.
ދެ ބައްޔަކާ ގުޅިގެން މިވަގުތު ވެސް ދުނިޔޭގައި އޮތީ ސިއްހީ ކުއްލި ނުރައްކަލުގެ ހާލަތު އިއުލާނުކޮށްފަ އެވެ. އެއީ ކޮވިޑް-19 އަދި ޕޯލިއޯ އާ ގުޅިގެންނެވެ.
މިވަގުތު މި ބަލި ފެތުރުމުގެ އެންމެ ބޮޑު ފުރުސަތެއް އޮތީ ޔޫރަޕުގަ އެވެ. ދުނިޔޭގެ އެހެން ގައުމުތަކުން މި ބަލި ފެތުރުމުގެ ނުރައްކާ އެހާ ބޮޑު ނޫން ކަމަށް ޑަބްލިއުއެޗްއޯ އިން ބުނެ އެވެ.
