މި މަހު ރާއްޖޭގައި ފަށާ އިންޓަނޭޝަނަލް ބޮޑީބޯޑިން ކޯޕަރޭޝަން (އައިބީސީ)ގެ ބޮޑީބޯޑިން ވޯލްޑް ޓުއާގެ އެއް ލެގު ކަމަށްވާ "ވިޒިޓް މޯލްޑިވްސް ޕްރޯ 2022" ގެ ޕާޓްނަރުން އިއުލާނުކުރިއިރު، މުބާރާތުގެ އޮންލައިން މީޑިއާ ޕާޓްނަރަކަށް "އަދަދު" ނޫސް ހަމަޖައްސައިފި އެެވެ.
ރާޅުގަނޑު ސަރަހައްދުގައި، ވިޒިޓް މޯލްޑިވްސް ޕްރޯ 2022 ބޮޑީބޯޑިން މުބާރާތް ކުރިއަށްދާނީ މި މަހު 29 އިން އަންނަ މަހު ހަތް ވަަނަ ދުވަހުގެ ނިޔަލަށެވެ. މި މުބާރާތާ ދިމާކޮށް ގިނަ އިވެންޓްތަކެއް ކުރިއަށް ގެންދިއުމަށް ރޭވިފައިވާއިރު، ގިނަ ސްޕޮންސަރުންތަކެއް ވެސް މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ)އާ އެކު ހަރަކާތްތެރިވާނެ އެވެ.
މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރްސީ)ގެ އޮފީހުގައި މިއަދު ބޭއްވި ސްޕޮންސަރުން އިއުލާނުކުރުމުގެ ހާއްސަ އިވެންޓް ޝަރަފްވެރިކޮށްދެއްވީ އެމްބީބީއޭގެ ރައީސް އަބްދުﷲ އަރީފް (ފުކޫ) އާއި އެމްއެމްޕީއާރްސީގެ މެނޭޖިން ޑިރެކްޓަރު ތޮއްޔިބު މުހައްމަދު އެވެ.
ޓައިޓަލް ސްޕޮންސަރު، ޑެސްޓިނޭޝަން ޕާޓްނަރު، ވިޒިޓް މޯލްޑިވްސްގެ މެނޭޖިން ޑިރެކްޓަރު ތޮއްޔިބު (ވ) އާއި އެމްބީބީއޭގެ ރައީސް ފުކޫ.-- ފޮޓޯ: މުހައްމަދު ޝާބިން/ އަދަދު
އޭޝިއާ ސަރަަހައްދުގައި ބޭއްވޭ ފުރަތަމަ އައިބީސީ ޓުއާގެ ލެގު ރާއްޖޭގައި ހޯސްޓްކުރުމުގެ ތައްޔާރީތައް މިހާރު ކުރިއަށްދާއިރު، އެ ކަންކަމާ ބެހޭގޮތުން އެންމެ ފަހުގެ މައުލޫމާތު އާންމުންނާ ހަމައަށް ފޯރުކޮށްދިނުމުގައި އެމްބީބީއޭގެ ވެސް ޕާޓްނަރެއްގެ ގޮތުގައި މަސައްކަތް ކުރަނީ "އަދަދު" ނޫހެވެ.
މިދިޔަ އަހަރު ރާއްޖޭގައި ބޭއްވި ސާފް ޗެމްޕިއަންޝިޕް ފުޓްބޯޅަ މުބާރާތުގެ ވެސް ޕާޓްނަރެއްގެ ގޮތުގައި މަސައްކަތް ކުރި "އަދަދު" ނޫހަކީ، އެމްބީބީއޭގެ އިތުރުން، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)، ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)، މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ) އަދި ކްރިކެޓް ބޯޑް އޮފް މޯލްޑިވްސް (ސީބީއެމް)ގެ ވެސް ޕާޓްނަރެކެވެ.
ވިޒިޓް މޯލްޑިވްސް ޕްރޯ 2022ގެ ޕާޓްނަރުންނަށް އެމްބީބީއޭގެ ރައީސް ފުކޫ ވަނީ ވަރަށް ބޮޑަށް ޝުކުރު އަދާކުރައްވަައިފަ އެވެ. އަދި ދުނިޔޭގެ އެންމެ މަތީ ލެވަލްގެ ބޮޑީބޯޑަރުން ބައިވެރިވާ މި މުބާރާތް، ކާމިޔާބު ކަމާ އެކު ކުރިއަށް ގެންދަން ހުރިހާ ޕާޓްނަރުންގެ އެހީތެރިކަން ބޭނުންވާނެ ކަމަށް ފުކޫ ވަނީ ވިދާޅުވެފަ އެވެ.
މޯލްޑިވްސް ޕްރޯގެ ޓައިޓަލް ސްޕޮންސަރު ކަމާއި ޑެސްޓިނޭޝަން ޕާޓްނަރުގެ ރޯލު އަދާކުރަނީ ވިޒިޓް މޯލްޑިވްސް (އެމްއެމްޕީއާރްސީ) އެވެ. ޔޫތު މިނިސްޓްރީގެ އެހީތެރިކަމާ އެކު ކުރިއަށްގެންދާ ވިޒިޓް މޯލްޑިވްސް ޕްރޯ 2022ގެ އެކޮމަޑޭޝަން ޕާޓްނަރަކީ މަރުކަބް ޕްލާޒާ އެވެ. އޮފިޝަލް އިވެންޓްސް މުބާރާތުގެ އިވެންޓް ޕާޓްނަރަކަށް ހަމަޖެއްސިއިރު، ދިރާގު ހަަމަޖައްސާފައިވަނީ ޑިޖިޓަލް ޕާޓްނަރުގެ ގޮތުގަ އެވެ.
ކޭޓަރިން ޕާޓްނަރަކީ މޫޗަސް ގްރާސިއަސް އެވެ. ޕްރިންޓިން ޕާޓްނަރެއްގެ ގޮތުގައި ޕްރިންޓް ލެބް ހަމަޖެއްސިއިރު، ސަންކެއާ ޕާޓްނަރަކީ މުލަ މޯލްޑިވްްސް އެވެ.
މުބާރާތުގެ ޑިޖިޓަލް ޕާޓްނަރަކަށް ހަމަޖެއްސި ދިރާގުގެ އެސިސްޓަންޓް މެނޭޖާ ބްރޭންޑް، ނާއި (ކ) އާއި އެމްބީބީއޭގެ ރައީސް ފުކޫ.-- ފޮޓޯ: މުހައްމަދު ޝާބިން/ އަދަދު
ސަޕޯޓިން ޕާޓްނަރުންގެ ގޮތުގައި ވެސް އަށް ފަރާތެއް ހަރަކާތްތެރިވާނެ އެވެ.
އޭގެ ތެރޭގައި ހިމެނެނީ، މިއުޒިޝަން ޔޫނިއަން އޮފް މޯލްޑިވްސް، މާފުށި ވޯޓާ ސްޕޯޓްސް، އެކްސްޓްރީމް ފިޓްނަސް، ސްޓެލްކޯ، މާލެ ސިޓީ ކައުންސިލް، މޯލްޑިވްސް ޕޮލިސް ސާވިސް، މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އަދި ނެޝަނަލް ބޯޓިން އެސޯސިއޭޝަން އޮފް މޯލްޑިވްސް (އެންބީއޭއެމް) އެވެ.
ބައިނަލްއަގުވާމީ މަތީ ފެންވަރުގެ މުބާރާތަކަށް ވާތީ ރާޅު ގަނޑު ސަރަހައްދުގައި މި މަހު 29 އިން އަންނަ މަހު 7 ވަނަ ދުވަހުގެ ނިޔަލަށް މުބާރާތް ބާއްވާއިރު، އެތަނުގައި ޖިމްގެ ހިދުމަތް ފޯރުކޮށްދޭނީ އެކްސްޓްރީމް ފިޓްނަސް އިން ކަމަށް އެމްބީބީއޭ އިން މައުލޫމާތު ދެ އެވެ.
މީގެ އިތުރުން މުބާރާތް ނިމުމުން މާލެ އަތޮޅު ރާޅު ސްޕޮޓްތައް ބަލާލުމަށް ބޭއްވޭ ހާއްސަ އިވެންޓެއްގެ އިންތިޒާމްތަކުގައި އެމްބީބީއޭ އަށް އެހީތެރިކަން ފޯރުކޮށްދޭނީ ބޯޓިން އެސޯސިއޭޝަނުންނެވެ.
ވިޒިޓް މޯލްޑިވްސް ޕްރޯ 2022 އަށް ރާއްޖެ އަންނަ ބައިނަލްއަގުވާމީ ތަރިންނާ ގުޅިގެން، ދިވެހި ބޮޑީބޯޑަރުންނާއި ކުޑަކުދިންނަށް ވެސް ހާއްސަ ހަރަކާތްތަކެއް ރޭވިފައިވާ ކަމަށް ބޮޑީބޯޑިން އެސޯސިއޭޝަނުން ވަނީ ބުނެފަ އެވެ.
