ދިވެހިރާއްޖެއަށް ޔުކްރެއިނުން ކަނޑައަޅާފައި ހުރި އެމްބެސަޑަރު އީގޯ ޕޮލީކާ އޭނާގެ މަގާމުން ވަކިކޮށްފިި އެވެ.
ރާއްޖޭގެ އިތުރުން އިންޑިއާއަށް ވެސް ކަނޑައަޅާފައި ހުންނަ ސަފީރު އީގޯ ރޭގެ ވަގުތެއްގައި މަގާމުން ވަކި ކުރީ އެ ގައުމުގެ ރައީސް ވޮލޯޑިމީރް ޒެލެންސްކީ ނެރުއްވި ރިޔާސީ ގަރާރެއްގެ ދަށުންނެވެ.
އޭގެ އިތުރުން ޔުކްރެއިނުން ޖަރުމަނާއި ޗެކް ރިޕަބްލިކް އާއި ނޯވޭ އާއި ބަންގްލަދޭޝާއި ނޭޕާލާއި ސްރީ ލަންކާއަށް ކަނޑައަޅާފައި ހުންނެވި ސަފީރުން ވެސް ވަނީ މަގާމުން ވަކިކޮށްފި އެވެ.
ރާއްޖޭގެ އެމްބެސަޑަރުކަމުގެ މަގާމަށް އީގޯ ވަޑައިގެންނެވީ މެއި 31، 2017 ގައި ކުރީގެ ރައީސް އަބްދުﷲ ޔާމީންގެ ވެރިކަމުގަ އެވެ.
ރަޝިޔާއިން ބާރުގެ ބޭނުންކޮށްގެން ހިފަމުން އަންނަ ޔޫކްރެއިނުން ބައެއް ގައުމުތަކަށް ކަނޑައަޅާފައި ހުރި އެމްބެސެޑަރުން ވަކި ކުރެއްވުމަށްފަހު ޒެލެންސްކީ ދެއްވި ވީޑިއޯ މެސެޖެއްގައި ވިދާޅުވެފައި ވަނީ އެމްބެސަޑަރުން ވަކި ކުރީ ހާއްސަ ސަބަބުތަކާ ހުރެ ނޫން ކަމަށާއި އެއީ "އާންމު އުސޫލުގެ ތެރެއިން" ނިންމެވި ނިންމެވުމެއް ކަމަށެވެ.
ޔޫކްރެއިން ހިފުމަށް ދުނިޔޭގެ އެންމެ ބާރުގަދަ އަދި ނިއުކްލިޔާ ހަތިޔާރު ތަރައްގީކޮށްފައިވާ މަދު ގައުމުތަކުގެ ތެރޭގައި ހިމެނޭ ރަޝިޔާއިން ހަމަލާދޭން ފެށީ ފެބްރުއަރީ 20، 2022 ގަ އެވެ. އޭގެ ފަހުން ހަނގުރާމައަށް 100 އަށް ވުރެ ގިނަ ދުވަސް ފާއިތުވިއިރު، ޔުކްރެއިނުގެ މުހިންމު އަދި ބޮޑު ހުރިހާ ސިޓީއެއް ކަހަލަ ގޮތަކަށް ރަޝިޔާއިން ވަނީ ހިސޯރުކޮށްފަ އެވެ.
ރަޝިޔާއިން ދެމުންދާ ހަމަލާގެ ސަބަބުން މިހާތަކަށް ޔޫކްރެއިނުގެ އާންމުންގެ ތެރެއިން 4253 މީހަކު ވަނީ މަރުވެފަ އެވެ. އަދި އާންމުންގެ 5141 މީހަކު ވަނީ ޒަހަމްވެފަ އެވެ. އާންމުން މައިގަނޑު ގޮތެއްގައި މަރުވެފައި ވަނީ ބާރުގަދަ ގޮވާ ތަކެތި ރަޝިޔާއިން ހަނގުރާމައިގައި ބޭނުން ކުރުމުގެ ސަބަބުންނެވެ.
