ގއ. ދާންދޫގައި އީދުމަޅި ރޯކުރަން އުޅުނު ދެ ޒުވާނަކު ފިހިއްޖެ އެވެ.
ދާންދޫ ކައުންސިލް ރައީސް މުހައްމަދު އާސިފު "އަދަދު"އަށް ވިދާޅުވީ އެ ހާދިސާ ހިނގާފައި ވަނީ މިރޭ ކަމަށެވެ. އަދި އެ ދެ ޒުވާނުންގެ ތެރެއިން އެކަކަށް ހޮސްޕިޓަލުގައި އެޑްމިޓްކޮށް ފަރުވާ ދެމުން އަންނަ އިރު އިތުރު ޒުވާނަކު ފަރުވާއަށްފަހު ދޫކޮށްލާފައިވާ ކަމަށްވެސް އޭނާ ވިދާޅުވި އެވެ.
އޭގެ ތެރެއިން އެއް ޒުވާނެއްގެ އަތުގެ އެކި ތަންތަން ފިހިފައި ވާއިރު އަނެއް ޒުވާނާގެ ފައިގެ އެކި ތަންތަން ވަނީ ފިހިފަ އެވެ.
"އީދު މަޅިޖަހަން ޕެޓްރޯލް އަޅަން ތިއްބާ އެހެން ކުއްޖަކު ދުރުން އައިސް އެކުދިން އެތާ ތިބިކަން ނޭނގި އަލިފާން ރޯކޮށްލެވުނީ،" އާސިފް ވިދާޅުވި އެވެ.
އީދު މަޅި ޖެހުމުގެ ތެރޭގައި ފިހުނު އިތުރު ޒުވާނެއް--
އީދު މަޅިޔަކީ ހާއްސަކޮށް ހުވަދު އަތޮޅުގައި ކުރާ ކަމެކެވެ.
އީދުގެ ކުޅިވަރުތައް ފެށިއްޖެ ކަމުގެ ހަބަރު ދެނީ އީދުމަޅި ރޯކުރުމުންނެވެ. ދުނބުރި ގަހާއި ކަށިގެޔޮ ގަހުގެ ގޮފިތަކާ އެކު އުސްކޮށް ހަދާ އީދުމަޅި ރޯކުރަނީ އީދު ވިލޭރެ އަށް އިރުއޮއްސުމުގެ ކުރިންނެވެ. އެ މަންޒަރު ބެލުމަށް ރަށުގެ ކުދިބޮޑު އެންމެން މަގުތަކަށް ނުކުންނާނެ އެވެ. ބުރަ މަސައްކަތުން ހަދާ އީދުމަޅި އަނދާ ހުލިވަމުންދާ އިރު، އެ އަލިފާނުގެ އަލިކަމުގައި އެއްބަޔަކު މަޖާ ނަގަމުންދާނެ އެވެ.
އީދުމަޅި ފެށިގެން އައީ ކިހިނެތްކަން ނޭނގޭ ނަމަވެސް އެ ހަރަކާތަކީ ކާބަފައިންގެ ފަރާތުން ވާރުތަވެފައިވާ އީދު ކުޅިވަރެއް އެ ރަށްރަށުގެ މީހުން ބުނެ އެވެ.
