ކޮވިޑުން ދިފާއުވުމަށް ޖަހާ ވެކްސިނުގެ ހަތަރު ވަނަ ޑޯޒް، މިހާތަނަށް ޖަހާފައި ވަނީ 405 މީހުން ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނެފި އެވެ.
ރާއްޖޭގައި ކޮވިޑުން ދިފާއުވުމަށް އިތުރު ޑޯޒެއް ޖަހަން ފަށާފައި ވަނީ މިދިޔަ މަހުގެ 22ގަ އެވެ. އެއީ 12 އަހަރާއި 17އަހަރާއި ދެމެދުގެ ކުދިންނަށް ކޮވިޑް ވެކްސިންގެ ތިން ވަނަ ޑޯޒަކާއި 18 އަހަރުން މަތީ މީހުންނަށް ކޮވިޑް ވެކްސިންގެ ހަތަރު ވަނަ ޑޯޒެކެވެ.
އެޗްޕީއޭން އެންމެ ފަހުން އާންމު ކޮށްފައިވާ ވެކްސިންގެ ތަފާސްހިސާބުތަކަށް ބަލާއިރު، ފުރަތަމަ ޑޯޒް 398،910 މީހުން ޖަހާފައިވެ އެވެ. އެއީ ރާއްޖޭގެ އާބާދީގެ 88.10 ޕަސެންޓު މީހުންނެވެ.
ދެވަނަ ޑޯޒް 384،595 މީހުން ޖަހާފައި ވާއިރު އެއީ އާބާދީގެ 84.94 ޕަސެންޓް މީހުންނެވެ. އަދި ބޫސްޓާ ތިންވަނަ ޑޯޒް ޖަހާފައި ވަނީ އާބާދީގެ 36.34 ޕަސެންޓެވެ. އެއީ 164،555 މީހުންނެވެ. އަދި ބޫސްޓާގެ ދެވަނަ ޑޯޒް ޖެހީ 405 މީހުންނެވެ. އެއީ އާބާދީގެ 0.09 ޕަސެންޓް މީހުންނެވެ.
އީދު ބަންދުގައި ވެކްސިން ސެންޓަރުތައްވެސް ބަންދު
ކޮވިޑް ދިފާއު ވެކްސިން ޖެހުމުގެ ހިދުމަތް މިހާރު ދެމުންދަނީ މާލޭގެ ތިން ސެންޓަރެއްގަ އެވެ. އެއީ ހުޅުމާލެ ހޮސްޕިޓަލް، ދަމަނަވެށި އަދި ދަރުމަވަންތަ ހޮސްޕިޓަލުންނެވެ.
އީދު ބަންދުގައި ސަރުކާރު ބަންދުވުމާ ގުޅިގެން މިމަހުގެ 10ވަނަ ދުވަހުން ފެށިގެން 16 ވަނަ ދުވަހާ ހަމައަށް ވެކްސިން ސެންޓަރުތައް ބަންދުވާނެ ކަމަށް އެޗްޕީއޭން ބުނެ އެވެ. މިހާރު އޮންނަ ގޮތުންވެސް، ހަފްތާ ބަންދުގައި ވެކްސިން ސެންޓަރުތައް ބަންދުވާނެ އެވެ.
ދެން ކޯވިޑް ވެކްސިން ދޭން ފަށާނީ މިމަހުގެ 17 ވާ އާދިއްތަ ދުވަހު އެވެ.
