މާލެ އެކުވެނި ޓްރެކު ކައިރީގައި ރޭ ހިނގި ނުރައްކާތެރި އެކްސިޑެންޓުގައި މަރުވި މަރިޔަމް އަމާނީ ރަޝީދުގެ ޖަނާޒާ ބާއްވައިފި އެވެ.
ގިނަ ބަޔެއްގެ ސަމާލުކަން ހުއްޓިފައިވާ މި އެކްސިޑެންޓްގައި އަމާނީ މަރުވިއިރު، އޭނާގެ ހަށިގަނޑު ވަޅުލާން ގެންދިޔައިރު ވެސް އާއިލާ އާއި ގާތް ތިމާގެ މީހުން އަދި ގިނަ ރައްޓެހިން ތިބި އެވެ. އެ އެންމެންގެ މޫނުމަތިން އަމާނީގެ މި ކުއްލި ވަކިވުމުގެ "ސިހުން ކެނޑިގެން" ނުދެ އެވެ. އެ މީހުން ތިބީ އަމާނީގެ ކުއްލި ވަކިވުން ގަބޫލުކުރަން ދަތިވެފަ އެވެ.
ކަށުނަމާދަށް ފަހު އަމާނީގެ ހަށިގަނޑު ވަޅުލާން ގެންދިޔަ މަންޒަރު ބަލަން ހުރި އޭނާގެ ދައްތަ އަށް ވެސް ބުނެވުނީ "ދެން އަމާނީއެއް ނުފެންނާނެ"އޭ މިހެނެވެ. ކޮއްކޮގެ ކުއްލި ވަކިވުން ގަބޫލުކުރަން ދަތިވެ، އޭނާ ވެސް ހުރީ ލޮލުން ކަރުނަ ނުހިކޭ ހާލުގަ އެވެ.
އަމާނީއާ އެކު އެކްސިޑެންޓުވި ކާރުގައި އޭނާގެ ގާތް ރައްޓެހިން ތިބިއިރު، އެ މީހުންގެ ހާލު ވަރަށް ގޯހެވެ. އައިސީޔޫގައި ވެންޓިލޭޓަރު ގުޅައިގެން ފަރުވާ ދެމުންދާއިރު، އެމީހުންގެ އާއިލާއިން ވެސް އަމާނީގެ ޖަނާޒާގައި ބައިވެރިވެ، އޭނާގެ އާއިލާ އަށް ހިތްވަރުދެމުން ދިޔަކަން ފެނިގެންދިޔަ އެވެ.
ރޭ އެކުވެނި ޓްރެކް ކައިޜީ ހިނގި އެކްސިޑެންޓުގައި މަރުވި އަމާނީގެ ޖަނާޒާގެ ތެރެއިން -- ފޮޓޯ: މުހައްމަދު ޝާބިން/ އަަދަދު
ގއ. މާމެންދު އަށް އުފަން އުމުރުން 24 އަހަރުގެ އަމާނީ މަރުވީ އެކްސިޑެންޓުގައި ސީރިއަސް އަނިޔާތަކެއް ލިބުމުގެ ސަބަބުންނެވެ. އަމާނީގެ ކޮނޑާއި ކަނދުރާ ބިންދައިގެން ދިއުމުގެ އިތުރަށް ވާތްފަރާތުން ބޮލުގެ ނާށިގަނޑަށާއި ލޮލަށް ވެސް އެތައް ގެއްލުމެއް ލިބިފައި ވެއެވެ.
އެކްސިޑެންޓު ހިނގީ ކިހިނެތް؟
ޖުމްލަ ހަ މީހަކަށް އަނިޔާވި މި އެކްސިޑެންޓު ހިނގި މަންޒަރު ފެންނަ ސީސީޓީވީ ފޫޓޭޖު މިހާރު ވަނީ ސޯޝަލް މީޑިއާގައި އާންމުވެފަ އެވެ. އެއީ ކުޅިވަރު އެކުވެނި ދަނޑާ ދިމާލުން ބޭރު، ބޮޑުތަކުރުފާނު މަގުގައި ހުރި ސީސީޓީވީގެ ފޫޓޭޖެކެވެ.
ސީސީޓީވީގެ ފުޓޭޖުން ފެންނަ ގޮތުގައި ބޯކޮށް ވާރޭވެހެމުން ދަނިކޮށް ކާރު އައީ ބޮޑުތަކުރުފާނު މަގުން އިރަށެވެ. އެ ވަގުތު ބަސް ދަތުރުކުރަމުން ދިޔައީ ބަސް ޓާމިނަލާ ދިމާލަށް ހުޅަނގަށެވެ. ބާރު ސްޕީޑުގައި ދުއްވާފައި ދަނިކޮށް ރަތް ކާރުގެ ކޮންޓްރޯލް ނެއްޓި ދެ ފަހަރަކު އެނބުރުމަށް ފަހު ގޮސް އެންމެ ފުރަތަމަ ޖެހުނީ ބަހުގެ ކުރިން ދުއްވާފައި ދިޔަ ހުދު ކާރެއްގަ އެވެެެ. އެ ކާރުގެ ފަހަތު ބަމްޕަރަށް ގެއްލުންވި ނަމަވެސް ރަތްކާރު ކޮންޓްރޯލް ވާގޮތެއް ނުވި އެވެ.
ރަތް ކާރު ކޮންޓްރޯލް ކުރެވުނީ، ބާރު ސްޕީޑުގައި ގޮސް ބަހުގެ ކުރީކޮޅުގައި ޖެހުމުންނެވެ. ބަހުގައި ޖެހި، ކަރު މައިތިރިވުމާ އެކު އެއިން ދުން އަރަން ފަށާ މަންޒަރު ސީސީޓީވީ ފޫޓޭޖުން ފެނެ އެވެ. ފޮޓޯތަކުން ފެންނަ ގޮތުގައި ކާރުގެ ފަހަތަށް ވަނީ ބޮޑެތި ގެއްލުންތަކެއް ލިބިފަ އެވެ. އަދި، ބަހުގެ ވިންޑްޝީލްޑް ވެސް ވަނީ ތަޅައިގެން ގޮސްފަ އެވެ.
