ރޭ އެކުވެނި ޓްރެކު ސަރަހައްދުން ބޮޑުތަކުރުފާނު މަގުގައި ހިނގި އެކްސިޑެންޓުގައި އަނިޔާވި މީހުންގެ ތެރެއިން ހަތަރު މީހަކަށް އައިސީޔޫގައި ފަރުވާދެމުންދާ ކަމަށް އައިޖީއެމްއެޗުން މިއަދު ބުނެފި އެވެ.
އައިޖީއެމްއެޗުގެ އޮފިޝަލަކު "އަދަދު"އަށް ބުނީ، އެކްސިޑެންޓުގައި އަނިޔާވި މީހުންގެ ތެރެއިން އެ ހޮސްޕިޓަލަށް ގެންދިޔައީ ފަސް މީހުން ކަމަށެވެ. އޭގެ ތެރެއިން އެކަކު މަރުވެފައިވާއިރު، ދެން ތިބި ހަތަރު މީހުންނަށް ފަރުވާ ދެމުން ދަނީ އައިސީޔޫގައި ކަމަށް އޭނާ ބުންޏެވެ.
އަދި އައިސީޔޫގައި ފަރުވާ ދެމުންދާ މީހުންގެ ތެރެއިން ތިން މީހުން ތިބީ ވެންޓިލޭޓަރުގައި ކަމަށް ވެސް ހޮސްޕިޓަލުން ބުނެ އެވެ. އޭގެ ތެރެއިން ބައެއް މީހުންގެ ސިކުނޑި އާއި ފުއްޕާމެއަށް ލޭ އެޅި، އެތެރެހައްޓަށް ވެސް ބޮޑެތި ގެއްލުންތައް ލިބިފައިވާ ކަމަށް އެނގިފައިވެ އެވެ.
އެ އެކްސިޑެންޓުގައި އަނިޔާ ލިބުނު މީހުންގެ ތެރެއިން މަރުވީ ގއ. މާމެންދުއަށް އުފަން މަރިޔަމް އަމާނީ ރަޝީދެވެ. އެ އެކްސިޑެންޓުގައި އުމުރުން 24 އަހަރުގެ އަމާނީގެ ކޮނޑާއި ކަނދުރާ ބިންދައިގެން ދިއުމުގެ އިތުރަށް ވާތްފަރާތުން ބޮލުގެ ނާށިގަނޑަށާއި ލޮލަށް ވެސް އެތައް ގެއްލުމެއް ލިބިފައި ވެއެވެ. އަދި ކާކުކަން ވަކިކުރަން ނޭނގޭ ވަރަށް އޭނާގެ މޫނު އޮތީ ދުޅަވެފަ އެވެ.
އެކްސިޑެންޓު ހިނގީ ކިހިނެތް؟
ޖުމްލަ ހަ މީހަކަށް އަނިޔާވި މި އެކްސިޑެންޓު ހިނގި މަންޒަރު ފެންނަ ސީސީޓީވީ ފޫޓޭޖު މިހާރު ވަނީ ސޯޝަލް މީޑިއާގައި އާންމުވެފަ އެވެ. އެއީ ބޮޑުތަކުރުފާނު މަގު ޓްރެކާ ދިމާލުން ހުރި ސީސީޓީވީގެ ފޫޓޭޖެވެ.
ސީސީޓީވީގެ ފުޓޭޖުން ފެންނަ ގޮތުގައި ބޯކޮށް ވާރޭވެހެމުން ދަނިކޮށް ކާރު އައީ ބޮޑުތަކުރުފާނު މަގުން އިރަށެވެ. އެވަގުތު ބަސް ދަތުރުކުރަމުން ދިޔައީ ބަސް ޓާމިނަލާ ދިމާލަށް ހުޅަނގަށެވެ. ބާރު ސްޕީޑުގައި ދުއްވާފައި ދަނިކޮށް ރަތް ކާރުގެ ކޮންޓްރޯލް ނެއްޓި ދެފަހަރަކު އެނބުރުމަށްފަހު ގޮސް އެންމެ ފުރަތަމަ ޖެހުނީ ބަހުގެ ކުރިން ދުއްވާފައި ދިޔަ ހުދު ކާރެއްގައެވެެެ. އެ ކާރުގެ ފަހަތު ބަމްޕަރަށް ގެއްލުންވި ނަމަވެސް ރަތްކާރު ކޮންޓްރޯލް ވާގޮތެއް ނުވި އެވެ.
ރަތް ކާރު ކޮންޓްރޯލް ކުރެވުނީ، ބާރު ސްޕީޑުގައި ގޮސް ބަހުގައި ޖެހުމުންނެވެ. ބަހުގައި ޖެހި، ކަރު މައިތިރިވުމާއެކު އެއިން ދުން އަރަން ފަށާ މަންޒަރު ސީސީޓީވީ ފޫޓޭޖުން ފެނެ އެވެ.
ފޮޓޯތަކުން ފެންނަ ގޮތުގައި ކާރުގެ ފަހަތަށް ވަނީ ބޮޑެތި ގެއްލުންތަކެއް ލިބިފަ އެވެ. އަދި، ބަހުގެ ވިންޑްޝީލްޑް ވެސް ވަނީ ތަޅައިގެން ގޮސްފަ އެވެ.
