ރޭ އިރާކޮޅު މާލެ އެކުވެނި ޓްރެކް ކައިރިން ހިނގި އެކްސިޑެންޓަކީ، އެތައް ބަޔަކަށް ސިހުން ގެނުވި އެކްސިޑެންޓެކެވެ. ކޮންޓްރޯލުން ނެއްޓިގެން އައި ކާރެއް ބަހެއްގައި ޖެހި ހިނގި އެ އެކްސިޑެންޓުގައި މިހާތަނަށް އެކަކު މަރުވެފައިވާއިރު، ކާރުގައި ދެން ތިބި ތިން މީހުންގެ ހާލު ވަރަށް ގޯހެވެ. އެކްސިޑެންޓުގައި މަރުވީ ގއ. މާމެންދުއަށް އުފަން މަރިޔަމް އަމާނީ ރަޝީދެވެ.
މާމެންދުއަށް އުފަން ނަމަވެސް އަމާނީ ދިރިއުޅެމުން ދިޔައީ ބ. ތުޅާދޫގައި އޭނާގެ އާއިލާ ބައެއް ކައިރީގަ އެވެ. އޭނާ މާލެ އައީ ޑޮކްޓަރަށް ދައްކަން ކަމަށް ވާއިރު، އޭނާ ދިޔައީ މާދަމާ އަނބުރާ ރަށަށް ދިއުމަށް ތައްޔާރުވަމުންނެވެ. ނަމަވެސް މާލެ އައިސް، ރައްޓެހިންނާއެކު ދުއްވާލަން ނިކުތް ދަތުރު ވެގެން ދިޔައީ އަމާނީގެ ފަހު ދަތުރަށެވެ.
އުމުރުން އެންމެ 24 އަހަރުގައި އަމާނީ މަރުވީ އޭނާއަށް ލިބުނު ގިނަ އަނިޔާތަކުގެ ސަބަބުންނެވެ. އޭނާގެ ކޮނޑާއި ކަނދުރާ ބިންދައިގެން ގޮސްފައިވާއިރު، ވާތް ފަރާތުން ބޮލުގެ ނާށިގަނޑަށާއި ލޮލަށް ވެސް އެތައް ގެއްލުމެއް ލިބިފައިވެ އެވެ. ހަމައެއާއެކު ކާކުކަން ވަކިކުރަން ނޭނގޭ ވަރަށް އޭނާގެ މޫނު ވަނީ ދުޅަވެފަ އެވެ.
އެކްސިޑެންޓުގައި އަމާނީ މެން ތިބި ކާރަށް ބޮޑެތި ގެއްލުންތަކެއް ލިބިފައި ވާއިރު، އޭނާ ހޮސްޕިޓަލަށް ގެންދިޔައިރުވެސް ނިޔާވެފައިވާ ކަމަށް މައުލޫމާތު ލިބެ އެވެ. އެ ކާރަކީ ދެ ދޮރުފަތް ހުންނަ ކާރަކަށް ވެފައި، ކާރުގެ ފަހަތުބައި އެއްކޮށް ފުނޑުފުނޑުވެފައި ވުމުން، ކާރުގެ ތެރޭގައި ތިބި މީހުން ނެރެން ޖެހުނީ އެމްއެންޑީއެފް ފަޔާ އެންޑް ރެސްކިއު އިން ގޮސް އެހީތެރިކަން ފޯރުކޮށްދީ، ކާރުގެ ދޮރު ހަލާކުކޮށްލައިގެންނެވެ.
ރޭ އިރުއޮއްސި 6:09 ހާއިރު ހިނގި އެ އެކްސިޑެންޓުގައި އަމާނީއާއެކު ކާރުގައި ދެން ތިބި ތިން މީހުންނަށް ވެސް ވަނީ ސީރިއަސް އަނިޔާތަކެއް ލިބިފަ އެވެ. ސިކުނޑިއާއި ފުއްޕާމެއަށް ލޭ އެޅި، އެތެރެހައްޓަށް ސީރިއަސް އަނިޔާތަކެއް ލިބުމުގެ ސަބަބުން އޭގެ ތެރެއިން ދެ މީހުންނަށް ދަނީ އައިސީޔޫގައި ފަރުވާ ދެމުންނެވެ.
އެކްސިޑެންޓު ހިނގީ ކިހިނެތް؟
ޖުމްލަ ހަ މީހަކަށް އަނިޔާވި މި އެކްސިޑެންޓު ހިނގި މަންޒަރު ފެންނަ ސީސީޓީވީ ފޫޓޭޖު މިހާރު ވަނީ ސޯޝަލް މީޑިއާގައި އާންމުވެފަ އެވެ. އެއީ ބޮޑުތަކުރުފާނު މަގު ޓްރެކާ ދިމާލުން ހުރި ސީސީޓީވީގެ ފޫޓޭޖެވެ.
ސީސީޓީވީގެ ފުޓޭޖުން ފެންނަ ގޮތުގައި ބޯކޮށް ވާރޭވެހެމުން ދަނިކޮށް ކާރު އައީ ބޮޑުތަކުރުފާނު މަގުން އިރަށެވެ. އެވަގުތު ބަސް ދަތުރުކުރަމުން ދިޔައީ ބަސް ޓާމިނަލާ ދިމާލަށް ހުޅަނގަށެވެ. ބާރު ސްޕީޑުގައި ދުއްވާފައި ދަނިކޮށް ރަތް ކާރުގެ ކޮންޓްރޯލް ނެއްޓި ދެފަހަރަކު އެނބުރުމަށްފަހު ގޮސް އެންމެ ފުރަތަމަ ޖެހުނީ ބަހުގެ ކުރިން ދުއްވާފައި ދިޔަ ހުދު ކާރެއްގައެވެެެ. އެ ކާރުގެ ފަހަތު ބަމްޕަރަށް ގެއްލުންވި ނަމަވެސް ރަތްކާރު ކޮންޓްރޯލް ވާގޮތެއް ނުވި އެވެ.
ރަތް ކާރު ކޮންޓްރޯލް ކުރެވުނީ، ބާރު ސްޕީޑުގައި ގޮސް ބަހުގައި ޖެހުމުންނެވެ. ބަހުގައި ޖެހި، ކަރު މައިތިރިވުމާއެކު އެއިން ދުން އަރަން ފަށާ މަންޒަރު ސީސީޓީވީ ފޫޓޭޖުން ފެނެ އެވެ.
ފޮޓޯތަކުން ފެންނަ ގޮތުގައި ކާރުގެ ފަހަތަށް ވަނީ ބޮޑެތި ގެއްލުންތަކެއް ލިބިފަ އެވެ. އަދި، ބަހުގެ ވިންޑްޝީލްޑް ވެސް ވަނީ ތަޅައިގެން ގޮސްފަ އެވެ.
