މާލޭގައި ބަހަކާއި ކާރެއް ޖެހި ނުރައްކާތެރި އެކްސިޑެންޓެއް ހިނގައިފި އެވެ.
މި އެކްސިޑެންޓު ހިނގީ ބޮޑުތަކުރުފާނު މަގު އެކުވެނި ޓްރެކު ސަރަހައްދުން ދުއްވާފައި ދިޔަ ކާރަކާއި އެމްޓީސީސީގެ ބަހެއް ޖެހިގެންނެވެ.
މި ހާދިސާގައި ހަތަރު މީހަކަށް އަނިޔާވެ އައިޖީއެމްއެޗުގައި ދަނީ ފަރުވާ ދެމުންނެވެ. އެ މީހުންގެ ހާލާ ގުޅޭ އިތުރު މައުލޫމާތެއް ފުލުހުން ހާމަކޮށްފައި ނުވެ އެވެ.
ފޮޓޯތަކުން ފެންނަ ގޮތުގައި ކާރުގެ ފަހަތަށް ވަނީ ބޮޑެތި ގެއްލުންތަކެއް ލިބިފަ އެވެ. އަދި، ބަހުގެ ވިންޑްޝީލްޑް ވެސް ވަނީ ތަޅައިގެން ގޮސްފަ އެވެ.
އެމްޓީސީސީގެ ބަހަށާއި ކާރަށް ވެސް ބޮޑެތި ގެއްލުންތަކެއް ލިބުނު --- ފޮޓޯ: އަބްދުﷲ އިޔާން/އަދަދު
މި އެކްސިޑެންޓުގެ މައުލޫމާތު ލިބުނީ އިރުއޮއްސި 18:09 ހާއިރު ކަމަށް ފުލުހުން ވަނީ މައުލޫމާތު ދީފަ އެވެ. އެވަގުތަކީ މާލެއަށް ވާރޭ ވެހެމުންދިޔަ ވަގުތެކެވެ.
