ދިވެހިރާއްޖޭގެ ބާ ކައުންސިލުގެ އެކްސްކޯއަށް ތިން މެންބަރުން ހޮވައިފި އެވެ.
އެކަމަސް ހާއްސަކޮށް މިއަދު ބޭއްވި އެ ކައުންސިލުގެ އަހަރީ އާންމު ޖަލްސާގައި، އެކްސްކޯ މެންބަރުންގެ ގޮތުގައި ހޮވާފައި ވަނީ އަލީ އަބްދުއްލަތީފް، ދީނާ ހުސެއިން އަދި އައިޝަތު މުނީޒާ އެވެ. އެ މެންބަެުން އިންތިހާބު ވެފައި ވަނީ ކުރިއަށް އޮތް ތިން އަހަރު ދުވަހަށެވެ.
ބާ ކައުންސިލުގެ އެގްޒެކެޓިވް ކޮމިޓީއަށް އަލީ އަބްދުއްލަތީފް ހޮވުނީ 234 ވޯޓުންނެވެ. އަދި ދީނާ ހުސެއިނަށް 241 ވޯޓު ލިބިފައި ވާއިރު، މއައިޝަތު މުނީޒާއަށް ލިބުނީ 171 ވޯޓެވެ.
އެ އިންތިހާބުގައި ވޯޓުލުމަށް ޖުމްލަ 884 މެންބަރުން ރަޖިސްޓްރީވެފައިވާއިރު، ވޯޓުގައި ބައިވެރިވީ 402 މެންބަރުންނެވެ.
ބާ ކައުންސިލުގެ އެގްޒެކެޓިވް ކޮމިޓީގެ މެންބަރުން ހޮވުމަށް ބޭއްވުނު އިންތިހާބުގެ ދެވަނަ ބުރަށް ވާދަކުރީ ޖުމްލަ ފަސް ވަކީލުންނެވެ. އޭގެ ތެރޭގައި ހިމެނެނީ، އެކްސްކޯއަށް ހޮވުނު ތިން ވަކީލުންގެ އިތުރުން މަރްޔަމް ނިހާޔަތާއި، ހަސަން ފަލާހު އެވެ.
ގާނޫނުގައި އޮންނަ ގޮތުން، ބާ ކައުންސިލްގެ އެކްސްކޯގައި ތިބެނީ ވަކީލުންގެ ތެރެއިން އިންތިހާބު ކުރާ ރައީސްއަކާއި ނައިބު ރައީސްއަކާއި މެންބަރުންގެ ގޮތުގައި ހަ ވަކީލެކެވެ. އޭގެ އިތުރަށް ބަންޑާރަ ނައިބު ވެސް އެކްސްކޯގައި އިންނަވާނެ އެވެ.
މި މަހުގެ 11 ވަނަ ދުވަހު ބޭއްވި ފުރަތަމަ ބުރުގައި ބާ ކައުންސިލްގެ ރައީސަކަށް ވަކީލު އިސްމާއީލް ވިޝާމް އަދި ނައިބު ރައީސަކަށް މިޒްނާ އަހްމަދު ވަނީ އިންތިހާބުކޮށްފަ އެވެ.
އެންމެ ގިނަ ވޯޓު ހޯދައިގެން އެކްސްކޯގެ މެންބަރުންނަށް އެ ދުވަހު އިންތިހާބު ކުރީ، ކުރީގެ ޕްރޮސެކިއުޓާ ޖެނެރަލް އަހްމަދު މުއިއްޒުއާއި، އިބްރާހިމް ޝަމީލް އަދި ސާދިހު ނަސީރު އެވެ.
ބާ ކައުންސިލް ވުޖޫދަށް އައީ 2019 ގަ އެވެ. މިއީ ބާ ކައުންސިލްގެ އެކްސްކޯއަށް މެންބަރުން އިންތިހާބު ކުރާ ދެވަނަ ފަހަރެވެ. އެކްސްކޯ މެންބަރުންގެ ދައުރަކަށް އޮންނަނީ ތިން އަހަރު ދުވަހުގެ މުއްދަތެކެވެ.
ބާ ކައުންސިލް ވުޖޫދު ކުރުމުގެ ކުރިން ވަކީލުންގެ ކަންކަން ބަލަހައްޓަމުން ގެެންދިޔައީ ސުޕްރީމް ކޯޓުންނެވެ. އަދި ބަންޑާރަ ނައިބުގެ އޮފީހުން ވެސް ވަކީލުން ރެގިއުލޭޓް ކުރި ދުވަސްވަރެއް ވެސް ދިޔަ އެވެ.
