ފިލިޕީންސްގެ ނައިބު ރައީސްގެ މަގާމުގެ ހުވާ އެ ގައުމުގެ ރައީސްގެ މަގާމުގައި ހުންނެވި ރޮޑްރިގޯ ޑުޓާޓޭގެ ދަރިކަނބަލުން ސާރާ ޑުޓާޓޭ ކުރައްވައިފި އެވެ.
އޭނާ އިންތިހާބުވީ ފާޑިނާންޑް މާކޯސް ޖޫނިއާގެ ނައިބު ރައީސަކަށެވެ. އެ ދެ ބޭފުޅުންގެ ހަ އަހަރުގެ ދައުރު ރަސްމީކޮށް ފެށޭނީ މި މަހުގެ 30 ގަ އެވެ. ފިލިޕީންސްގައި ރައީސް އާއި ނައިބު ރައީސް އިންތިހާބު ކުރަނީ ވަކިވަކިންނެވެ.
މަގާމުގައި ހުވައި ސާރާ ކުރެއްވިއިރު އަރިހުގައި އޭނާގެ މަންމަ އާއި ބައްޕަ ތިއްބެވި އެވެ. އޭނާ ސިޔާސީ މަގާމަށް ވަދެވަޑައިގެންނެވީ ޑަވާއޯ ސިޓީގެ މޭޔަރުގެ ގޮނޑި މީގެ 10 ވަރަކަށް އަހަރު ކުރިން ކާމިޔާބު ކުރައްވައިގެންނެވެ.
ސާރާ ޑުޓާޓޭ އަށް ނައިބު ރައީސްކަން ލިބިވަޑައިގެންނެވިއިރު ރޮޑްރިގޯ ވަނީ ސިޔާސީ ދާއިރާ އިން ރިޓަޔާ ކުރައްވާފަ އެވެ.
2016 ވަނަ އަހަރު ވެރިކަމަށް ވަޑައިގެންނެވި ޑުޓާޓޭގެ ވެރިކަމަކީ ފިލިޕީންސް ދުށް އެންމެ އަނިޔާވެރި އެއް ވެރިކަމެވެ. ޑުޓާޓޭ ވެރިކަމަށް ވަޑައިގަތީ މަސްތުވާތަކެއްޗާ ދެކޮޅަށް ވަރުގަދަ މަސައްކަތްތަކެއް ކުރައްވާނެ ކަމުގެ ވައުދާ އެކު އެވެ.
ނަމަވެސް، އެމަނިކުފާނުގެ ވެރިކަމުގައި އެތައް ހާސް ބަޔަކު ފުލުހުން ވަނީ މަރާލާފަ އެވެ. އެކަން ތަހުގީގު ކުރުމަށް ބައިނަލްއަގްވާމީ ކްރިމިނަލް ކޯޓުން ވެސް ވަނީ ގޮވާލާފަ އެވެ.
