ޔޫކްރެއިނަށް ޔޫރަޕިއަން ޔޫނިއަން (އީޔޫ)ގެ މެމްބަރުކަން ދިނުމާ ގުޅޭގޮތުން ގޮތެއް ނިންމުމަށް ހަމަޖެހިފައިވާ ސަމިޓާ ދިމާކޮށް ރަޝިއާ އިން ދެމުންދާ ހަމަލާތައް ވަރުގަދަ ކުރާނެ ކަމަށް އެ ޔޫކްރެއިންގެ ރައީސް ވޮލްޑިމިރް ޒިލެންސްކީ ވިދާޅުވެއްޖެ އެވެ.
މި ހަފްތާގެ ތެރޭގައި ބާއްވާ އީޔޫ ސަމިޓުގައި ޔޫކްރެއިނަށް މެމްބަރުކަން ދޭން ވޯޓަށް އަހާނެ އެވެ. އެ ގައުމަށް މެމްބަރުކަން ދޭން ފެންނަ ކަމަށް ފާސްކުރި ނަމަވެސް އީޔޫގެ މެމްބަރަކަށް ވާން ފުރިހަމަކުރަން ޖެހޭ ކަންކަން ނިންމަން އެތައް އަހަރެއް ފާއިތުވާނެ އެވެ.
މި ވޯޓާ ގުޅިގެން މޮސްކޯގެ ހަމަލާތައް ވަރުގަދަ ކުރާނެ ކަން އެނގޭ ކަމަށާއި އެކަމަށް އެގައުމުގެ ސިފައިން ވަރަށް ރަނގަޅަށް ތައްޔާރުވަމުންދާ ކަމަށް ވެސް ޒިލެންސްކީ ވިދާޅުވި އެވެ.
ޔޫރަޕިއަން ކޮމިޝަނުން ވެސް ޔޫކްރެއިނަށް މެމްބަރުކަން ދޭން ތާއިދުކޮށްފައިވާއިރު އެ މަސައްކަތް ހުއްޓާނުލައި ކުރިއަށް ގެންދަވާނެ ކަމަށް ޒިލެންސްކީ ވަނީ ވައުދުވެވަޑައިގެންފަ އެވެ.
މިވަގުތު ޔޫކްރެއިނަށް މެމްބަރުކަން ދިނުމުގެ ހުރިހާ ކަމެއް އޮތީ ޔޫރަޕިއަން ކައުންސިލްގެ އަތްމަތީގަ އެވެ. އެ ކައުންސިލްގައި ތިއްބަވަނީ އީޔޫގެ މެމްބަރު ގައުމުތަކުގެ ލީޑަރުންނެވެ. އެ ހުރިހާ ބޭފުޅުން ވެސް މި ހަފްތާ ބަންދުގައި ބްރަސަލްސްގައި ބައްދަލުކުރައްވާނެ އެވެ.
ރަޝިއާ އިން ވަނީ އެ ގައުމަށް މިކަމުގައި އެއްވެސް މައްސަލައެއް ނެތް ކަމަށް ބުނެފަ އެވެ.
"އަޅުގަނޑުމެން އެކަމާ އެއްވެސް ވަރަކަށް ދެކޮޅެއް ނޫން. އެއީ އެ މީހުންނަށް ލިބިފައިވާ އިސްތިގްލާލްގެ ދަށުން ނިންމޭނެ ނިންމުމެއް، އިގްތިސާދީ ޔޫނިއަންތަކުގައި ބައިވެރިވާނީތޯ ނުވަތަ ނުވާނީތޯ. އެއީ އެ މީހުންގެ އަމިއްލަ ކަމެއް، ޔޫކްރެއިން ރައްޔިތުންގެ ކަމެއް،" ޔޫކްރެއިނަށް އީޔޫގެ މެމްބަރުކަން ދިނުމާ ގުޅޭގޮތުން ރަޝިއާގެ ރައީސް ލެޑިމިއާ ޕުޓިން ވިދާޅުވި އެވެ.
ޔޫކްރެއިނުން އީޔޫގެ މެމްބަރަކަށް ވާން އެދި ހުށަހެޅީ ފެބްރުއަރީ 24 ގައި ރަޝިއާ އިން އެގައުމަށް އަރައި ހަނގުރާމަ ފެށިތާ ހަތަރު ދުވަސް ފަހުންނެވެ.
