ރަޝިއާ އިން ޔޫކްރެއިނަށް އަރައި ކުރަމުންދާ ހަނގުރާމައިގެ ފުރަތަމަ 100 ދުވަސްތެރޭ ތެޔޮ ވިއްކައިގެން އެ ގައުމަށް 98 ބިލިއަން ޑޮލަރު ލިބިފައިވާ ކަމަށް ދިރާސާއަކުން ދައްކައިފި އެވެ.
ފިންލޭންޑުގެ ސެންޓާ ފޯ ރިސާޗު އޮން އެނާޖީ އެންޑް ކްލީން އެއާ އިން ނެރުނު ރިޕޯޓުން އެނގޭ ގޮތުގައި އެ މުއްދަތުގެ ތެރޭގައި އެންމެ ގިނައިން ރަޝިއާގެ ތެޔޮ ގަތީ ޔޫރަޕިއަން ޔޫނިއަނުންނެވެ.
މި ދިރާސާއިން އެނގޭ ގޮތުގައި ފުރަތަމަ 100 ދުވަހުގެ ތެރޭގައި ރަޝިއާ އިން އެކްސްޕޯޓުކުރި ތެލުގެ 61 ޕަސެންޓު ހިއްސާކުރަނީ އީޔޫ އެވެ. އެއީ ގާތްގަނޑަކަށް 60 ބިލިއަން ޑޮލަރެވެ. ޗައިނާ އިން 13.2 ބިލިއަން ޑޮލަރުގެ ތެޔޮ ގަތް އިރު އިންޑިއާ އިން ގަތީ 3.6 ބިލިއަން ޑޮލަރުގެ ތެލެވެ.
ރަޝިއާ އިން ގެންދަނީ ޔޫކްރެއިންގެ އިރުމަތީގެ ޑޮންބާސް ސަރަހައްދު ހިފުމަށް ވަރުގަދައަށް ހަމަލާ ދެމުންނެވެ. އީޔޫ އާއި އެމެރިކާ އިން ދަނީ ހަތިޔާރާ އަދި އެ ނޫން ގޮތްގޮތުން ވެސް ޔޫކްރެއިނަށް އެހީތެރިކަން ފޯރުކޮށްދެމުންނެވެ.
ޔޫކްރެއިނުން ވަނީ ރަޝިއާ އާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް ވަރުގަދަ ކުރުމަށް ގޮވާލާފަ އެވެ. ހަނގުރާމަ ފެށުމުގެ ކުރިން އީޔޫ އިން އިމްޕޯޓުކުރާ ގޭހުގެ 40 ޕަސެންޓު ގެންނަނީ ރަޝިއާ އިންނެވެ. އަދި އިމްޕޯޓު ކުރާ ތެލުގެ 27 ޕަސެންޓު ހިއްސާކުރަނީ ރަޝިއާ އެވެ.
މި މަހުގެ ކުރީކޮޅު އީޔޫން ވަނީ ރަޝިއާ އިން ތެޔޮ އެތެރެކުރުން ހުއްޓާލުމަށް އެއްބަސްވެފަ އެވެ.
