އޭޝިއަން ކަޕް ކޮލިފައިން ގްރޫޕް ސްޓޭޖުގައި މިރޭ އުޒްބެކިސްތާނާ ދެކޮޅަށް ރާއްޖޭގެ ގައުމީ ޓީމު ކުޅޭ މެޗަށް ނުކުންނައިރު، އުޒްބެކިސްތާނަކީ ގްރޫޕްގެ ފޭވަރިޓުންކަން އެނގޭ ކަމަށާއި ވަރުގަދަ ޓީމުތަކާ ދެކޮޅަށް، ރާއްޖޭގެ ގައުމީ ޓީމަށް ވެސް ރަނގަޅަށް ކުޅެވޭނެ ދުވަސް އަންނާނެ ކަމަށް ގައުމީ ކޯޗު އިޓަލީގެ ފްރެންޗެސްކޯ މޮރިއޭރޯ ބުނެފި އެވެ.

އުޒްބެކިސްތާންގައި ސެންޓްރަލައިޒްކޮށް ކުރިއަށްދާ ކޮލިފައިން ގްރޫޕް ސްޓޭޖުގައި ރާއްޖޭން ކުޅުނު ފުރަތަމަ މެޗުގައި ބުދަ ދުވަހު ހަވީރު ވަނީ ތައިލެންޑް އަތުން 3-0 އިން ބަލިވެފަ އެވެ. އެރޭ ކުޅުނު ގްރޫޕްގެ އަނެއް މެޗުގައި ސްރީ ލަންކާގެ މައްޗަށް އުޒްބެކިސްތާން ކުރިހޯދީ 3-0 އިންނެވެ.

ގްރޫޕް ސްޓޭޖުގައި މިއަދު ހަވީރު ތައިލެންޑާއި ލަންކާ ވާދަކުރާއިރު، ރާއްޖޭން މިރޭ ކުޅޭނީ އުޒްބެކިސްތާނާ އެވެ. އަންނަ އަހަރުގެ އޭޝިއަން ކަޕަށް ކޮލިފައިވާނީ ކޮންމެ ގްރޫޕެއްގެ އެއް ވަނަ ޓީމުގެ އިތުރުން ކޮލިފައިން ހަ ގްރޫޕްގެ ދެ ވަނަ ޓީމުތަކުގެ ތެރެއިން އެންމެ ރަނގަޅު ނަތީޖާ ނެރޭ ފަސް ޓީމެކެވެ.

ރޭގެ ޕްރެކްޓިހަށް ފަހު ގައުމީ ކޯޗު މޮރިއޭރޯ "އަދަދު" އަށް ދިން އިންޓަވިއުއެއްގައި ބުނީ ރާއްޖެ އަތުން ތައިލެންްޑް މެޗު ގެއްލުނީ ގޯސްތަކެއް ހެދިގެން ކަމަށާއި މި ލެވަލްގައި ކުޅޭއިރު، އެ ފަދަ ކަންކަން ދިމާވުމުން ޖެހޭނީ މެޗަކަށް ފަހު މެޗެއް ރަނގަޅުކުރަން ކަމަށެވެ.

"އަހަރެމެން ވިސްނަން ޖެހޭ މި ލެވަލްގައި މިސްޓޭކެއް ހަދައިފިއްޔާ، މާފެއް ނެތް، އެއީ އިދިކޮޅު ޓީމުން ހުންނާނީ އެ ފަދަ ކަންކަމަށް ތައްޔާރުވެގެން، އެ ފަދަ ފުރުސަތުގައި ގޯލު ވެސް ޖަހާނެ،" މޮރިއޭރޯ ބުންޏެވެ.

މޮރިއޭރޯ ބުނީ ފެންނަން އޮތް ހަގީގަތަކީ ރާއްޖެ އަށް މި ގްރޫޕްގައި ވަރުގަަދަ ދެ ޓީމު އެބައޮތް ކަމަށެވެ. އެއީ އުޒްބެކިސްތާނާއި ތައިލެންޑެވެ.

އުޒްބެކިސްތާނަކީ ވަރަށް މޮޅު ޓީމެއް ކަމަށާއި އެކަން އެ ޓީމުގެ ކުޅުމުން ވެސް ފެންނަ ކަމަށް މޮރިއޭރޯ ވަނީ ބުނެފަ އެވެ.

"އުޒްބެކިސްތާނަކީ ފޭވަރިޓުން، ވަރަށް މޮޅަށް އެ މީހުން ކުޅޭ، އެ މީހުންގެ އެބަތިބި ފެންވަރު ރަނގަޅު ކޮލިޓީ ކުޅުންތެރިން. އެކަމަކު، މިއީ އަހަރެމެން މި ވަގުތު ވިސްނަން ޖެހޭ ކަމެއް ނޫން. އަހަރެމެން ޔަގީންކަން މި ދެނީ އަހަރެމެން ނަތީޖާ ނެރެން ފުރިހަމަ އަށް މަސައްކަތް ކުރާނަން،" މޮރިއޭރޯ ބުންޏެވެ.

އުޒްބެކިސްތާން ޓީމުގެ ކެޕްޓަނަކީ އިޓަލީގެ ރޯމާ އަށް ހޯސޭ މޮރީނިއޯގެ ކޯޗުކަމުގައި ކުޅޭ ފޯވާޑް އެލްޑޯ ޝޮމުޑޯރޯފް އެވެ. ފީފާ އިން އެންމެ ފަހުން ނެރުނު ރޭންކިންގައި އުޒްބެކިސްތާނަކީ 83 ވަނަ އެވެ.

ގައުމީ ޓީމުގެ ޕްރެކްޓިހުގެ ތެރެއިން ފްރެންޗެސްކޯ މޮރިއޭރޯ.-- ފޮޓޯ: އިބްރާހިމް ފާއިދު/ އެފްއޭއެމް

ބޭނުންވާ މިސްރާބަށް ދެވޭ ކަމުގެ މަންޒަރުތަކެއް އެބަފެނޭ

މިދިޔަ އަހަރުގެ އޮކްޓޫބަރު މަހުގައި ރާއްޖޭގެ ކޯޗުކަމާ ހަވާލުވި މޮރިއޭރޯގެ އިރުޝާދުގެ ދަށުން ރާއްޖޭން މިހާތަނަށް ކުޅެފައިވަނީ ފަސް މެޗެވެ. އެއީ ފޯ ނޭޝަންސް ކަޕްގައި ލަންކާއާ 4-4 އިން އެއްވަރުވި މެޗާއި ސީޝެލްސްއާ 0-0 ވި މެޗާއި ބަންގްލަދޭޝް އަތުން 1-0 އިން ބަލިވި މެޗުގެ އިތުރުން، މިދިޔަ މާޗް މަހު ބަންގްލަދޭޝް އަތުން މާލޭގައި 2-0 އިން މޮޅުވި މެޗު އަދި ތައިލެންޑް އަތުން 3-0 އިން ބަލިވި މެޗެވެ.

މޮރިއޭރޯ ބުނީ މާޗް މަހު ބަންގްލަދޭޝް އަތުން މޮޅުވި މެޗު ބަލަން ގަލޮޅު ދަނޑަށް އައި ގިނަ ބަޔަކަށް ގައުމީ ޓީމުގައި އޭނާ ކުރަމުން އަންނަ މަަސައްކަތް ފެނި ރާއްޖޭން ކުޅެން މަސައްކަތް ކުރާ ގޭމް ވެސް ފެންނާނެ ކަމަށެވެ. އެ ގޭމްޕްލޭނާ އެކު ބޮޑެތި ޓީމުތަކާ ދެކޮޅަށް ކުޅޭއިރު، ނަތީޖާ ނެރެން މެޗުތަކެއް ކުޅެގެން ކަންކަން ދަސްކުރަން ވަގުތު ނަގާނެ ކަމަށެވެ. އަމުދުން މިހާރު މި ކުޅެނީ ބޮޑެތި ޓީމުތަކާ ދެކޮޅަށް ކަމަށްވާތީ، އުނދަގޫތަކެއް ހުންނާނެ ކަމަށް މޮރިއޭރޯ ވަނީ ބުނެފަ އެވެ.

"އަހަރެން އައިސް މަސައްކަތް މި ކުރަނީ މައިގަނޑު ދެ ކަމަކަށް، ފުރަތަމަ ކަމަކަށް ފިޒިކަލީ ކުޅުންތެރިން ރަނގަޅުކުރަން، އެއީ މި ފަހުގެ ފުޓްބޯޅައިގައި ގިނަ ވަގުތު ދުވެގެން، މެޗު ކޮންޓްރޯލް ކުރެވޭނީ. ދެ ވަނަ ކަމަކަށް ޓެކްޓިކަލް ފުޓްބޯޅަ. ޑިފެންސިވް ފޭސް އާއި އެޓޭކިން ފޭސްގައި އަހަރެމެން ކަންކަން މި ބަދަލުކޮށްލާއިރު، ޓީމު ރަނގަޅަށް ކުޅެވޭތޯ މި ބަލަނީ،" އިޓަލީ ގައުމީ ޓީމާއި އިންޓަ މިލާނަށް ކުރިން ކުޅުނު މޮރިއޭރޯ ބުންޏެވެ.

"މި ޓީމުގެ ތަޖުރިބާކާރު ކުޅުންތެރިންނާއި ޒުވާން ކުޅުންތެރިން ވެސް އެ ދަނީ މި ކަންކަން ދަސްކުރަމުން. އެކުގައި ޓީމު ކުރިއަރަން އެބަ ބޭނުންވޭ. އަހަރެމެން މި މަސައްކަތް ކުރާ ގޮތަށް މަސައްކަތް ކުރަމުން ކުރިއަށް ގޮސްފިނަމަ އަަހަރެމެންނަށް ބޮޑެތި ޓީމުތަކާ ވާދަކުރެވޭ ދުވަސް ވެސް އަންނާނެ، އެ ދުވަހުން އަހަރެމެންގެ އެންމެން ވެސް ވަރަށް އުފާވާނެ،"

މޮރިއޭރޯ ބުނީ ކޮންމެ މެޗަކަށް ނުކުންނައިރު ވެސް އަޒުމަކަށް ވާން ޖެހޭނީ ދެވެން ހުރި ހުރިހާ އެއްޗެއް ދަނޑުމަތީގައި ދީގެން ނަތީޖާ އެއް ނެރެން މަސައްކަތް ކުރުމަށް ކަމަށެެވެ. އެއީ މި ފަދަ ބޮޑެތި ވަރުގަދަ މެޗުތަކުން ލިބޭނީ ރަނގަޅު ތަޖުރިބާ ކަމަށާއި ނަތީޖާ ނެރެން ކުރާ މަސައްކަތުގައި އަލިމަގެއް ފެންނާނީ ވެސް ކުރިއަށް ފިޔަވަޅުތަކެއް އަޅައިގެން ކަމަށް މޮރިއޭރޯ ބުންޏެވެ.

އުޒްބެކިސްތާންގެ މަރްކަޒީ ސްޓޭޑިއަމްގައި ރާއްޖެ އާއި އުޒްބެކިސްތާން ކުޅޭ މެޗު ފަށާނީ ރާއްޖެ ގަޑިން 20:30 ގަ އެެވެ.