ބްލެކްސީގެ ބަނދަރުތަކުން ކާބޯތަކެތި އެކްސްޕޯޓު ކުރުމަށް ރަޝިއާ އިން ހުރަސް އަޅާނަމަ އެތައް މިލިއަން މީހުން ބަނޑަށް ޖެހޭނެ ކަމަށް ޔޫކްރެއިންގެ ރައީސް ވޮލްޑިމިރް ޒިލެންސްކީ ވިދާޅުވެއްޖެ އެވެ.
ފެބްރުއަރީ މަހުން ފެށިގެން ކުރަމުންދާ ހަނގުރާމައިގައި ރަޝިއާ އިން ވަނީ ޔޫކްރެއިންގެ އައްސޭރި ފަށުގެ ގިނަ ސަރަހައްދުތަކެއްގެ ކޮންޓްރޯލް ނަގާފަ އެވެ. އަދި، ގިނަ އަދަދަކަށް ޔޫކްރެއިނުން އުފައްދާ ކާބޯތަކެތީގެ އުފެއްދުންތައް އެކްސްޕޯޓު ކުރުމަށް ދަނީ ހުރަސް އަޅަމުންނެވެ.
ޔޫކްރެއިނާއި ހުޅަނގުގެ ގައުމުތަކުން ތުހުމަތުކުރާ ގޮތުގައި ރަޝިއާ އިން ދަނީ ހަނގުރާމައިގެ ބޭނުމަށް ކާބޯތަކެތީގެ އެކްސްޕޯޓަށް ހުރަސް އަޅަމުންނެވެ.
ރަޝިއާ އިން ބުނާ ގޮތުގައި ޔޫކްރެއިނުން ކަނޑުގެ ސަރަހައްދަށް ދޫކުރި މައިންތަކާއި ބޭރުގެ ދަތިކުރުމުގެ ފިޔަވަޅުތަކަކީ މި މައްސަލައިގެ އަސްލެވެ.
މިހާރު ޔޫކްރެއިންގައި އުފައްދާ ގޮދަނާއި އަދިވެސް އެ ނޫން ބާވަތްތައް އެކްސްޕޯޓު ކުރަނީ ރޭލު މެދުވެރިކޮށެވެ.
ޒިލެންސްކީގެ ވާހަކަތަކަށް މިހާތަނަށް ރަޝިއާ އިން ރައްދު ދީފައެއް ނުވެ އެވެ. ރަޝިއާ އިން ދެކޭ ގޮތުގައި މިއީ ޔޫކްރެއިނަށް ހަނގުރާމަ ކުރުމުގެ ގާބިލުކަން ނައްތާލުމަށް އެގައުމުން ކުރިއަށްގެންދާ ހާއްސަ އަސްކަރީ އޮޕަރޭޝަނެކެވެ.
