އިނގިރޭސިވިލާތުގެ ކޮންޒަވޭޓިވް ޕާޓީގެ ލީޑާޝިޕުން މިހާރުގެ ބޮޑުވަޒީރު ބޮރިސް ޖޯންސަން ދުރުކުރުމަށް ނެގި އިތުބާރު ނެތް ކަމުގެ ވޯޓު އޭނާ ކާމިޔާބު ކުރައްވައިފި އެވެ.
ބޮރިސްގެ އިތުބާރު އޮތް ކަމަށް ކޮންޒަވޭޓިވް ޕާޓީގެ 211 މެމްބަރުން ވޯޓު ދެއްވި އެވެ. އޭނާ އާ ދެކޮޅަށް 148 މެމްބަރުން ވޯޓު ދެއްވި އެވެ. އެހެންކަމުން އޭނާ ވޯޓު ކާމިޔާބު ކުރެއްވީ 59 ޕަސެންޓުގެ ތާއިދާ އެކު އެވެ.
މި ވޯޓުން މޮޅުވުމުން ބޮރިސްގެ ލީޑާޝިޕްގެ އިތުބާރު ނެތް ކަމަށް ދެން ހުށަހެޅޭނީ ވެސް އެއް އަހަރު ދުވަސް ފަހުންނެވެ.
މިއީ މީޑިއާގައި ދައްކާ ވާހަކަތައް ހަނދާން ނައްތާލައި އެންމެން އެކުގައި ކުރިއަށް ދާން ޖެހޭ ވަގުތު ކަމަށް ބޮރިސް ވަނީ ވޯޓަށް ފަހު ވިދާޅުވެފަ އެވެ.
މި ނަތީޖާއާ އެކު ބޮޑުވަޒީރުގެ މަގާމުގައި ވެސް ބޮރިސް ދެމިހުންނަވާނެ އެވެ. ބޮރިސްގެ އިސްތިއުފާ އަށް ވެސް ބައެއް މެމްބަރުން ގޮވާލެއްވި އެވެ.
މީގެކުރިން ބޮޑުވަޒީރުގެ މަގާމުގައި ހުންނެވި ތެރޭސާ މޭ އަށް ވެސް ޕާޓީގެ އެެތެރޭގައި ނެގި އިތުބާރު ނެތް ކަމުގެ ވޯޓުން 63 ޕަސެންޓު ލިބިވަޑައިގަތެވެ. އެކަމަކު އޭގާ ހަ މަސް ފަހުން މޭ އިސްތިއުފާ ދެއްވި އެވެ.
ކޮވިޑް-19 ގެ ތެރޭގައި ބޮރިސް ގެންގުޅުއްވި ސިޔާސަތުތަކާ ބައެއް މެމްބަރުން ދެކޮޅެވެ. އަދި، ތަކެތީގެ އަގު ބޮޑުވަމުންދާ ދަނޑިވަޅެއްގައި ޓެކްސް ރޭޓުތައް މަތިކުރާތީ ވެސް ދެބަސްވުންތަކެއް ވަނީ އުފެދިފަ އެވެ.
