ސެވިލް، ސްޕެއިން (ޖޫން 2) - ޔުއެފާ ނޭޝަންސް ލީގުގެ ޑިވިޝަން އޭގެ ގްރޫޕް ދޭއްގައި ކުޅުނު މެޗުން ސްޕެއިނުން ގޯލު ޖަހާފައިވަނިކޮށް ޕޯޗުގަލް އިން 1-1 އިން އެއްވަރުކޮށްފި އެވެ.
ސްޕެއިނާއި ޕޯޗުގަލް ކުޅުނު މެޗަކުން އެންމެ ފަހުން ޓީމެއް މޮޅުވީ 10 އަހަރު ކުރިންނެވެ. މި ދެ ޓީމުގެ އެންމެ ފަހުގެ ފަސް ކުރިމަތިލުން ވެސް ނިމުނީ އެއްވަރުވެގެންނެވެ.
ޕޯޗުގަލް އަކީ ޔުއެފާ އިން މީގެ ތިން ވަރަކަށް އަހަރު ކުރިން މުޅިން އަލަށް ފެށި ނޭޝަންސް ލީގުގެ އެންމެ ފުރަތަމަ ޗެމްޕިއަނެވެ. އެންމެ ފަހުން ނޭޝަންސް ލީގު ކާމިޔާބުކުރީ މިދިޔަ އަހަރު ފްރާންސް އެވެ. އެއީ ފައިނަލުގައި 2-1 އިން ސްޕެއިން ބަލިކުރުމަށް ފަހު އެވެ.
ސެވިލްގެ އެސްޓަޑިއޯ ބެނީޓޯ ވިލަމަރީން ސްޓޭޑިއަމްގައި މިރޭ ކުޅުނު މެޗު ފަށައިގެން 25 ވަނަ މިނިޓްގައި ސްޕެއިނުން ލީޑުނެގީ ކައުންޓަ އެޓޭކެއްގައި އަލްވާރޯ މޮރާޓާ ޖެހި ގޯލުންނެވެ. ގޯލު ކުރިމައްޗަށް ޕަބްލޯ ސަރާބިއާ ހުސްކޮށްލާފައި ނަގައިދިން ބޯޅަ މޮރާޓާ ވަނީ ހަމަޖެހިލާފައި ގޯލުގެ ތެރެއަށް ފޮނުވާލައިފަ އެވެ. ސްޕެއިނަށް ލީޑުފުޅާކޮށްދޭން ކާލޮސް ސޮލެއާ އަށް ރަނގަޅު ފުރުސަތެއް ލިބި ބޭނުމެއް ނުކުރެވުނެވެ.
ޕޯޗުގަލް އަށް އެއްވަރުކޮށްދޭން އެ ޓީމުގެ ހުނަރުވެރި ވިންގް، ރަފައެލް ލެއާއޯ ޖެހި ބޯޅަ ސްޕެއިންގެ ކީޕަރު އުނާއި ސިމޯން ވަނީ މަތަކޮށްފަ އެވެ.
ޕޯޗުގަލް އިން ދެ ވަނަ ހާފުގައި ނަތީޖާ ހަމަހަމަކުރަން ކުރަމުން އައި މަސައްކަތުގައި ހައްލެއް ހޯދަން ޓީމުގެ ކެޕްޓަން ކްރިސްޓިއާނޯ ރޮނާލްޑޯ ކުޅެން އެރުވި އެވެ. ޕޯޗުގަލް އަށް މެޗުގެ ނަތީޖާ ހަމަހަމަކޮށްދިނީ ވެސް ބަދަލަކަށް ކުޅެން ނުކުތް ކުޅުންތެރިއެކެވެ.
މެޗުގެ 82 ވަނަ މިނިޓްގައި ސްޕެއިންގެ ޑިފެންޑަރުންގެ އޮފްސައިޑް މަޅިން ސަލާމަތްވެ، ޕޯޗުގަލްގެ ފުލްބެކް، ޔާއޯ ކަންސޭލޯ ނެގި ހުރަހަކުން ޕޯޗުގަލްގެ ގޯލު ޖެހީ ރިކާޑޯ ހޯރްޓާ އެެވެ. އެންމެ ފުރަތަމަ ޒުވާން ކުޅުންތެރިއެއްގެ ގޮތުގައި 2014 ވަަނަ އަަހަރު ޕޯޗުގަލް ޓީމުން ފުރުސަތު ހޯދި ހޯރްޓާ ޖެހި މި ލަނޑަކީ ގައުމީ ޓީމަށް އޭނާ ޖަހައިދިން ފުރަތަމަ ގޯލެވެ.
ސްޕެއިން މޮޅުކޮށްދޭން މެޗުގެ ފަހު ވަގުތުގައި ޖޯޑީ އަލްބާ އަށް ރަނުގެ ފުރުސަތެއް ލިބުނެވެ. ޕޯޗުގަލްގެ ކީޕަރު ޑިއޯގޯ ކޮސްޓާ އަތުގައި ޖެހިފައި އޭރިއާތެރެއިން މުޅިން ހުސްކޮށް ކަހަލަ ގޮތަކަށް ޖޯޑީ އަލްބާ އަށް ލިބުނު ބޯޅަ ބޮލުން ޖެހި ނަމަވެސް ދިޔައީ އަރިމަތިން ބޭރުންނެވެ.
މި ގްރޫޕްގައި މިރޭ ކުޅުނު އަނެއް މެޗުން ޗެކް ރިޕަބްލިކް ވަނީ އަމިއްލަ ދަނޑުގައި 2-1 އިން ސްވިޒަލެންޑް ބަލިކޮށްފަ އެވެ. އާދިއްތަ ދުވަހުގެރޭ ޗެކް ރިޕަބްލިކް ކުޅޭނީ ސްޕެއިނާ އެވެ. އަދި ޕޯޗުގަލް އިން އަމިއްލަ ދަނޑުގައި ސްވިޒަލެންޑާ ބައްދަލުކުރާނެ އެވެ.
