ރަޝިއާ އިން ޔޫކްރެއިން ހިފުމަށް ކުރަމުންދާ ހަނގުރާމައިގައި މިހާތަނަށް އެ ގައުމުގެ ބިމުގެ 20 ޕަސެންޓު ރަޝިއާގެ ބެލުމުގެ ދަށުގައި އޮތް ކަމަށް ޔޫކްރެއިންގެ ރައީސް ވޮލިޑްމިރް ޒިލެންސްކީ ހާމަކުރައްވައިފި އެވެ.
ލަގްޒެމްބާގުގެ މަޖިލިސް މެމްބަރުންނާ މުހާތަބުކުރައްވާ ވާހަކަ ދައްކަވަމުން ޒިލެންސްކީ ވަނީ ޔޫކްރެއިންގެ 125 ހާސް އަކަ ކިލޯމީޓަރުގެ ސަރަހައްދެއް ރަޝިއާ އިން ހިފާފައިވާ ކަމަށް ވިދާޅުވެފަ އެވެ.
އެއް ހާސް ކިލޯމީޓަރުގެ ސަރަހައްދެއްގައި މިވަގުތު ވެސް ހަނގުރާމަ ކުރަމުންދާ ކަމަށް ޒިލެންސްކީ ވިދާޅުވި އެވެ. އެންމެ ބޮޑަށް މިވަގުތު ހަމަލާ ބަދަލުކުރަމުން ދަނީ ދެކުނު ޔޫކްރެއިންގައި ކަމަށް އޭނާ ވިދާޅުވި އެވެ.
އެގޮތުން "ޔޫރަޕުގެ އެންމެ ވަރުގަދަ އެއް އިންޑަސްޓްރިއަލް ސެންޓަރު" ކަމަށްވާ ޑޮންބާސް ގެ ބޮޑު ބައެއް އެއްކޮށް ސުންނާފަތި ވެފައިވާ ކަމަށް ޒިލެންސްކީ ހާމަކުރެއްވި އެވެ.
މީގެ ތިން މަސް ކުރިން ފެށި ހަނގުރާމައިގައި މިހާތަނަށް ރަޝިއާގެ 30،000 ސިފައިން މަރާލާފައިވާ ކަމަށާއި އެއީ ރަޝިއާ އިން ޗެޗްނިޔާ ގައި ކުރި ދެ ހަނގުރާމައަށް ވުރެ މަތީ އަދަދެއް ކަމަށް ޒިލެންސްކީ ވިދާޅުވި އެވެ. ނަމަވެސް، މި އަދަދުތަކުގެ ސައްހަކަން އަދި ކަށަވަރުވެފައެއް ނުވެ އެވެ.
ޒިލެންސްކީ ވަނީ ރަޝިއާ އާ ދެކޮޅަށް އަޅާފައިވާ ފިޔަވަޅުތައް ހަރުކަށިކޮށް ޔޫކްރެއިނަށް އިތުރު ހަތިޔާރު ފޯރުކޮށްދިނުމަށް ގޮވާލާފަ އެވެ.
ޔޫކްރެއިނަށް ސަޕޯޓު ހޯދުމުގެ ގޮތުން ޒިލެންސްކީ ގެންދަވަނީ ގިނަ ގައުމުތަކެއްގެ ޕާލިމެންޓުގައި ތަގުރީރު ކުރައްވަމުންނެވެ.
