ޔޫރަޕިއަން ޔޫނިއަންގެ ގައުމުތަކަށް ކަނޑުމަގުން އެތެރެކުރާ ރަޝިއާގެ ތެޔޮ މިއަހަރުގެ ނިޔަލަށް ގަތުން ހުއްޓާލުމަށް އެ ޔޫނިއަނުން އެއްބަސްވެއްޖެ އެވެ.
ފެބްރުއަރީ މަހުގެ ފަހުކޮޅުން ފެށިގެން ރަޝިއާއިން ހަނގުރާމަ ކުރަމުންދާއިރު އެކަމާ ގުޅިގެން އެގައުމާ ދެކޮޅަށް ދުނިޔޭގެ ގިނަ ގައުމުތަކަކުން ވަނީ ހަރުކަށި ފިޔަަވަޅުތަކެއް އަޅާފަ އެވެ. އަޅާފައިވާ ފިޔަވަޅުތައް ވަރުގަދަކުރުމުގެ ގޮތުން އީޔޫ އިން ބޭނުންވީ ރަޝިއާއިން ތެޔޮ ގަތުން އެއްކޮށް ހުއްޓާލުމަށެވެ.
ނަމަވެސް، އެގޮތަށް އީޔޫގެ މެމްބަރު ހުރިހާ ގައުމަކަށް އެއްބަސް ނުވެވުނެވެ. އެންމެ ބޮޑަށް ދެކޮޅު ހެދީ ހަންގޭރީންނެވެ.
އޭގެ ބަދަލުގައި ހުރިހާ ގައުމަކުން އެއްބަސްވީ ކަނޑުމަގުން އެތެރެކުރާ ތެޔޮ ގަތުން ހުއްޓާލުމަށެވެ. ޕައިޕްލައިންތައް މެދުވެރިކޮށް އިމްޕޯޓުކުރާ ތެޔޮ ގަތުން ހުއްޓާލުމަށް އެއްބަސްވެވިފައެއް ނުވެ އެވެ.
އޭގެ އިތުރުން ޕޮލެންޑާއި ޖަރުމަނުން ވަނީ ރަޝިއާ އިން ތެޔޮ ގަތުން މުޅިން ހުއްޓާލާނެކަން ހާމަކޮށްފަ އެވެ. އެއާއެކު، ރަޝިއާ އިން އެކްސްޕޯޓުކުރާ ތެލުގެ 90 ޕަސެންޓޫ ބްލޮކުވެގެންދާނެ އެވެ.
އީޔޫގެ ގައުމުތަކުން ބޭނުންކުރާ ތެލުގެ ތެރެއިން އަހަރެއްގެ މައްޗަށް 27 ޕަސެންޓު ފޯރުކޮށްދެނީ ރަޝިއާ އިންނެވެ. އޭގެ ބަދަލުގައި އަހަރެއްގެ މައްޗަށް 400 ބިލިއަން ޔޫރޯ އީޔޫން ރަޝިއާއަށް ދައްކަ އެވެ.
އެހެންކަމުން، ވަރުގަދަކުރި ފިޔަވަޅުތަކުގެ ސަބަބުން ޔޫކްރެއިންގައި ހިންގާ ހަނގުރާމަ ހުއްޓާލުމަށް ރަޝިއާއަށް ވިސްނަންޖެހޭނެ ކަމަށް އީޔޫން ދެކެ އެވެ.
މި ނިންމުމާ އެކު ދުނިޔޭގެ ބާޒާރުގައި ތެލުގެ އަގު ވަނީ ވަރަށް ބޮޑުތަނުން އުފުލިފަ އެވެ.
