ޔޫކްރެއިނަށް ހަމަލާދީ ހަނގުރާމަ ފެށުމާއި ގުޅިގެން ރަޝިއާ އާ ދެކޮޅަށް އަޅާފައިވާ ފިޔަވަޅުތައް ވަރުގަދަ ކުރުމުގެ ގޮތުން އެ ގައުމުގެ ތެޔޮ މުސްތަގުބަލުގައި ގަތުން ހުއްޓާލުމަށް ޔޫރަޕިއަން ޔޫނިއަން އިން ކުރި މަޝްވަރާތައް ނާކާމިޔާބުވެއްޖެ އެވެ.
ފެބްރުއަރީ މަހުގެ ފަހުކޮޅުން ފެށިގެން ރަޝިއާއިން ހަނގުރާމަ ކުރަމުންދާއިރު އެކަމާ ގުޅިގެން އެގައުމާ ދެކޮޅަށް ދުނިޔޭގެ ގިނަ ގައުމުތަކަކުން ވަނީ ހަރުކަށި ފިޔަަވަޅުތަކެއް އަޅާފަ އެވެ. ނަމަވެސް، ދުވަސްތައް ފާއިތުވަމުންދާ ވަރަކަށް ގައުމުތަކުން އެ ފިޔަވަޅުތަކަށް އެއްބަސް ނުވެވޭ މަންޒަރު ދަނީ ފެންނަމުންނެވެ.
އީޔޫގެ ސަމިޓުގައި އެ ފިޔަވަޅު އެޅުމަށް ދެކޮޅު ހެދީ ހަންގޭރީންނެވެ. އެ ގައުމަކީ ރަޝިއާގެ ތެޔޮ އެންމެ ގިނައިން ގަންނަ އެއް ގައުމެވެ. އެ ގައުމުގެ ރައީސް އަކީ ރަޝިއާގެ ރައީސް ލެޑިމިއާ ޕުޓިންއާ ގާތް ގުޅުމެއް ބާއްްވަވާ ބޭފުޅެކެވެ.
ހަންގޭރީން ބުނާ ގޮތުގައި ރަޝިއާގެ ތެޔޮ ގަތުން ހުއްޓާލައިފިނަމަ އެ ގައުމުގައި މުދަލުގެ އަގުތައް މަތިވެ އިގްތިސާދު ފުން ވަޅުގަނޑަށް ވެއްޓިގެންދާނެ އެވެ. ރަޝިއާގެ ތެޔޮ ގަތުން ހުއްޓާލުން ވެގެންދާނީ އިގްތިސާދަށް ވައްޓާލާ "އެޓޮމިކް ބޮމެއް" ގެ ގޮތުގައި ހަންގޭރީ ސަރުކާރުން ސިފަކުރެ އެވެ.
ބްރަސަލްސްގައި މިހާރު ކުރިއަށްދާ ސަމިޓުގައި އެ ފިޔަވަޅު ތަންފީޒުކުރަން ނިންމޭނީ އީޔޫގެ މެމްބަރު 27 ގައުމުން ވެސް އެއްބަސްވުމުންނެވެ.
މި ސަމިޓުގައި ވީޑިއޯ ކޮންފަރެންސް މެދުވެރިކޮށް ވާހަކަ ދައްކަވަމުން ޔޫކްރެއިންގެ ރައީސް ޒިލެންސްކީ ވަނީ އެތެރޭގެ ބައިބަވުންތައް ނައްތާލައި އެއްބައިވުމަށް ގައުމުތަކުގެ ލީޑަރުންނަށް ގޮވާލާފަ އެވެ.
ރަޝިއާގެ ސިފައިން ގެންދަނީ ޔޫކްރެއިންގެ އިރުމަތީގެ ސިޓީތަކަށް ވަރުގަދަ ހަމަލާތަކެއް މިހާރު ވެސް ދެމުންނެވެ.
