މިދިޔަ ފެބްރުއަރީ މަހުގެ 24 ވަނަ ދުވަހު ރަޝިއާ އިން ޔޫކްރެއިނަށް އަރައި ހަނގުރާމަ ފެށި ފަހުން ފުރަތަމަ ފަހަރަށް އެ ގައުމުގެ އިރުމަތީގައި އޮންނަ ހާރްކީވް އަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ޒިޔާރަތް ކުރައްވައިފި އެވެ.
ހާރްކީވްއަކީ ރަޝިއާ އިން އެންމެ ވަރުގަދައަށް ހަމަލާ ދެމުން އަންނަ ސިޓީ އެވެ. އެ ސިޓީގެ ބޮޑު ބައެއް މިހާރު ވަނީ ބިމާ ހަމަކޮށްފަ އެވެ.
ހާރްކީވްއަށް ލިބިފައިވާ ގެއްލުންތައް ޒެލެންސްކީ އިއްޔެ ބައްލަވާލެއްވީ ބުލެޓް ޕްރޫފް ވެސްޓެއް އަޅުއްވައިގެން ހުރެ އެވެ. އެމަނިކުފާނު ވަނީ ރަޝިއާގެ ހަމަލާތަކުން ޔޫކްރެއިން ދިފާއުކުރުމަށް ހަރަކާތްތެރިވާ ސިފައިންނަށް ޝުކުރު ވެސް އަދާކުރައްވާފަ އެވެ.
ހަމަލާ ދިނުން މަދުވެފައި އޮތުމަށް ފަހު ރަޝިއާ އިން ވަނީ އަނެއްކާ ވެސް ހާރްކީވް އަށް ވަރުގަދަ ހަމަލާތަކެއް ދޭން ފަށައިފަ އެވެ. އެއީ ޔޫކްރެއިންގެ ދެވަނައަށް އެންމެ ބޮޑު ސިޓީ އެވެ.
ޒިލެންސްކީގެ ޒިޔާރަތަށް ފަހު ބާރުގަދަ ގޮވުންތަކެއް ގޮވި ކަމަށް ރިޕޯޓުކޮށްފައިވެ އެވެ. މިދިޔަ އެޕްރީލް އަދި މެއި މަހު ރަޝިއާ ސިފައިން އެ ސިޓީން ފަހަތަށް ޖެއްސި ނަމަވެސް، އަދިވެސް ހަމަލާތައް ހުއްޓިފައެއް ނުވެ އެވެ.
ހާރްކީވްގައި ހުރި 2،200 އަށް ވުރެ ގިނަ އިމާރާތްތައް ވަނީ ބޭނުން ނުކުރެވޭ ވަރަށް ހަމަލާތަކުގައި ހަލާކުވެފަ އެވެ.
މިއީ ހަނގުރާމަ ފެށިފަހުން ވެރިރަށް ކިއޭވް އިން ބޭރުން ޒިލެންސްކީ ފެނިވަޑައިގެންނެވި ފުރަތަމަ ފަހަރެވެ.
ހާރްކީވް ސަރަހައްދުގެ 31 ޕަސެންޓު ކޮންޓްރޯލް އަދިވެސް އޮތީ ރަޝިއާގެ އަތް ދަށުގަ އެވެ.
