ރިއޯ ޑި ޖެނެއިރޯ، ބްރެޒިލް (މެއި 29) - ބޯކޮށް ވާރޭވެހުމުގެ ސަބަބުން ހިނގި އެކި ހާދިސާތަކުގައި ބްރެޒިލް އިން 57 މީހުން މަރުވެ 100 އަށްވުރެ ގިނަ މީހުން ގެއްލިފައިވާ ކަމަށް އެގައުމުގެ ސަރުކާރުން ހާމަކޮށްފި އެވެ.
އެގައުމުގެ އުތުރު އިރުމަތީ ސަރަހައްދުތަކަށް ބޯކޮށް ވާރޭވެހުމުގެ ސަބަބުން ބިންގަނޑު ކަނޑައިގެން ދިޔުމުގެ ގިނަ ހާދިސާތަކެއް ވެސް ވަނީ ހިނގާފަ އެވެ. މިއީ މިދިޔަ ފަސް މަސް ދުވަހުގެ ތެރޭގައި ވާރޭވެހުމުގެ ސަބަބުން ފެންބޮޑުވުމުގެ ހާދިސާތައް ހިނގި ހަތަރު ވަނަ ފަހަރެވެ.
އެންމެ ބޮޑަށް މި ހާދިސާގެ އަސަރުކޮށްފައި ވަނީ ޕެނަމްބޫކޯ ސްޓޭޓަށް ކަމަށް ބްރެޒިލްގެ އިދާރާތަކުން ހާމަކޮށްފައިވެ އެވެ. އެގޮތުން، މިހާތަނަށް 6،000 އަށްވުރެ ގިނަ މީހުން ސަރުކާރުން ގާއިމުކޮށްފައިވާ ވަގުތީ ހިޔާތަކަށް ގޮސްފައިވާ ކަމަށް އިދާރާތަކުން ބުނެ އެވެ.
ހޯމަ ދުވަހުގެ ވަގުތެއްގައި ޕެނަމްބޫކޯ ގެ ވެރިރަށަށް ބްރެޒިލްގެ ރައީސް ޖައި ބޮލްސަނާރޯ ވަޑައިގަންނަވާނެ އެވެ.
ބިންގަނޑު ކަނޑައިގެން ދިޔުމުގެ ހާދިސާތައް ބްރެޒިލްގައި އާންމުކޮށް ހިނގަ އެވެ. އެއީ އެގައުމުގެ ސިޓީތައް ތަރައްގީ ކުރުމުގައި އެއްވެސް ޕްލޭނެއް ނެތި ކަންތައްތައް ކުރާތީ ކަމަށް މާހިރުން ދެކެ އެވެ.
މި ހާދިސާތައް ހިނގި ދަނޑި ވަޅަކީ ލެޓިން އެމެރިކާގެ މޫސުމަށް ބޮޑެތި ބަދަލުތަކެއް އައިސްފައިވާ ކަމަށް ސައިންޓިސްޓުން ހާމަކޮށްފައިވާ ދަނޑިވަޅެެއްގަ އެވެ.
މިދިޔަ ފެބްރުއަރީ މަހުގެ ތެރޭގައި ވެސް އެގައުމުގައި ހިނގި މިފަދަ ހާދިސާތަކުގައި 230 މީހުން މަރުވި އެވެ.
