ޔޫރަޕިއަން ޔޫނިއަނުން ދަތިކުރުމުގެ ގިނަ ފިޔަވަޅުތަކެއް އަޅާފައި ވަނިކޮށް ރަޝިއާ އިން ގޭސް ގަތުމުގެ އެއްބަސްވުމެއްގައި ސާބިއާ އިން ރަޝިއާއާއެކު ސޮއިކޮށްފި އެވެ.
ރަޝިއާ އިން ޔޫކްރެއިނަށް ހަމަލާދީ ހަނގުރާމަ ފެށުމާ ގުޅިގެން އެ ގައުމާ ދެކޮޅަށް ޔޫރަޕިއަން ޔޫނިއަނުން ވަނީ ދަތިކުރުމުގެ ވަރުގަދަ ފިޔަވަޅުތަކެއް އަޅައިފަ އެވެ. މައިގަނޑު ގޮތެއްގައި އެ ފިޔަވަޅުތައް އަމާޒުކުރީ އެ ގައުމުގެ ހަކަތަ އުފައްދާ އިންޑަސްޓްރީއަށެވެ.
އިއްޔެ ސާބިއާގެ ރައީސް އެލެކްޒެންޑާ ވުސިޗް ވަނީ ރަޝިއާ އެކު ސޮއިކުރި އެއްބަސްވުމަކީ ސާބިއާ އަށް ހުރިހާ ގޮތަކުން ވެސް ފައިދާވާ ގޮތަށް އެކުލަވާލާފައިވާ އެއްބަސްވުމެއް ކަމަށް ހާމަކުރައްވާފަ އެވެ. ވުސިޗް ވަނީ މި އެއްބަސްވުން ގާއިމުކުރުމުގެ މަޝްވަރާތައް ރަޝިއާގެ ރައީސް ލެޑިމިއާ ޕުޓިންއާ އެކު އިއްޔެ ފޯނުން ކުރައްވާފަ އެވެ.
ވުސިޗް އަކީ ޕުޓިންގެ ސަރުކާރަށް ތާއިދުކުރައްވާ ބޭފުޅެކެވެ. ސާބިއާއަށް ޔޫރަޕިއަން ޔޫނިއަނުން ފުރުސަތު ހޯދައިދޭނެ ކަމަށް އެމަނިކުފާނު ވިދާޅުވި ނަމަވެސް, މިފަހުން ގެންދަވަނީ ރަޝިއާ އާއެކު ގުޅުން ބަދަހި ކުރައްވަމުންނެވެ.
ރަޝިއާ އިން ޔޫކްރެއިނަށް ހަމަލާ ދޭން ފެށުމުން އެކަން ސާބިއާ އިން ކުށްވެރި ކޮށްފައެއް ނުވެ އެވެ. އަދި، ހުޅަނގުގެ ގައުމުތަކުން އެޅި ދަތިކުރުމުގެ ފިޔަވަޅުތަކުގައި ވެސް އެގައުމުން ބައިވެރިވެފައެއް ނުވެ އެވެ.
ސާބިއާއަށް ގޭސް ސަޕްލައި ކުރަން ރަޝިއާއިން އެއްބަސްވިއިރު އެ ގައުމުން ވަނީ ޕޮލެންޑް، ބަލްގޭރިއާ އަދި ފިންލޭންޑަށް ގުދުރަތީ ގޭސް ސަޕްލައި ކުރުން ހުއްޓާލާފަ އެވެ. އަންނަ ޖޫން މަހުގެ ތެރޭގައި ސާބިއާ އާއެކު މި އެއްބަސްވުމުގައި ރަޝިއާއިން ރަސްމީކޮށް ސޮއިކުރާނެ އެވެ.
ސާބިއާއިން ގޭސް ހޯދުމަށް ބަރޯސާ ވަނީ ރަޝިއާއަށެވެ. އަދި، ސާބިއާގެ ހަކަތަ އުފައްދާ ކުންފުނިތަކުގެ މެޖޯރިޓީ ހިއްސާ ކޮންޓްރޯލް ކުރަނީ ރަޝިއާގެ ކުންފުނިތަކުންނެވެ.
