މެމޯ ހައްދަން ހޮސްޕިޓަލްގެ ކިޔޫގައި ޖެހުމުގައި ހުރި ދަތިތަކަށް ލުއި ގެނެސް ތިމާވެއްޓާ ރަހުމަތްތެރި ގޮތް އިހުތިޔާރުކުރުމުގެ ސިޔާސަތާއެކު އޭޑީކޭ ހޮސްޕިޓަލުން އިއްޔެއިން ފެށިގެން ކޮންސަލްޓޭޝަން މެމޯ ޕްރިންޓްކުރުން ހުއްޓާލައި، ބަލި މީހާގެ ފޯނު ނަންބަރަށް އެސްއެމްއެސް ފޮނުވަން ވަނީ ފަށައިފަ އެވެ. ކުޑަ ކަމަކަށް ވިޔަސް، މި ވާހަކަ ގެނެސް މި ދެނީ މި ބަދަލުގެ އަސަރާއި ނަތީޖާ ބޮޑުވުމުންނެވެ.
"އެންމެ ބޮޑު އަސަރަކީ ކިޔޫގައި ޖެހެން ނުޖެހި މެމޯ ހެއްދުން. މީހުންނަށް ލިބިގެން އެ ދަނީ ވަރަށް ބޮޑު ފަސޭހަ ކަމެއް. ލުޔެއް،" އޭޑީކޭ ހޮސްޕިޓަލްގެ މެނޭޖިން ޑިރެކްޓަރު އަހުމަދު އަފްއާލް ވިދާޅުވި އެވެ.
ރާއްޖޭގައި ހުޅުވި އެންމެ ފުރަތަމަ އަމިއްލަ ހޮސްޕިޓަލް، އޭޑީކޭއިން އެވްރެޖުކޮށް ދުވާލަކަށް 1000 އަށް ވުރެ ގިނަ ކޮންސަލްޓޭޝަން މެމޯ ހައްދާ ކަމަށް އަފްއާލް ވިދާޅުވި އެވެ. އެ މިންވަރުން އެއީ ދުވާލަކަށް 500 ގަނޑުގެ އޭ4 ކަރުދާހެވެ. ނުވަތަ ކަރުދާސް ރީމެކެވެ. ކޮންސަލްޓޭޝަން މެމޯ ހެއްދުން ހުއްޓާލުމުން، އެ ސަލާމަތް ކުރެވުނީ 182,500 ގަނޑެެވެ. ނުވަތަ 365 ކަރުދާސް ރީމެވެ. އަދި އެއާއެކު ބޭކާރުވެދާ ދެއްޔެވެ.
"މިވަގުތަށް ހަމައެކަނި ކޮންސަލްޓޭޝަން މެމޯ ޕްރިންޓްކުރުން ހުއްޓާލިޔަސް، ކުރިއަށް އޮތްތަނުގައި އެހެން މެމޯތަކާއި ރިކްއެސްޓްތައް ޕްރިންޓްކުރުން ހުއްޓާލާނަން،" އަފްއާލް ތިމާވެއްޓާ ރަހުމަތްތެރި ޕްލޭން ކިޔައިދެއްވަމުން ވިދާޅުވި އެވެ.
ހޮސްޕިޓަލުގެ ހިދުމަތްތަކުގެ ތެރެއިން އެންމެ ގިނަ ވަގުތު ހޭދަ ވަނީ ވެސް ކޮންސަލްޓޭޝަން މެމޯ ހެއްދުމަށެވެ. މި ގެނައި ބަދަލާއެކު، ފޯނުން ގުޅައިގެން އެޕޮއިންޓްމެންޓް ލިބި، އޮންލައިންކޮށް ފައިސާ ދެއްކުމާއެކު، އެޕޮއިންޓްމެންޓް ހަމަޖެހިފައިވާކަމުގެ މެސެޖް ފޯނަށް ލިބޭނެ އެވެ. މި ހިދުމަތުގެ ނަތީޖާއަކީ، ހޮސްޕިޓަލްގެ އެހެން ހިދުމަތްތަކަށް ވެސް އަވަސް ކަމެއް ލިބިގެން އަންނާނެ ކަމެކެވެ.
ބަލި މީހާ، ނުވަތަ އެހީތެރިޔާ ވިސްނާލަންޖެހޭނެ މުހިންމު ކަމެއް އެބަ އޮތެވެ. އެސްއެމްއެސް ދާނީ ބަލި މީހާގެ ނަންބަރުގެ ގޮތުގައި އޭޑީކޭ ހޮސްޕިޓަލްގެ ރަޖިސްޓްރީގައިވާ ނަންބަރަށެވެ. ނަންބަރު ޗެކްކޮށް، އަޕްޑޭޓްކުރަން ބޭނުންވާ ނަމަ އެ ބަދަލު ގެންނާށެވެ.
