ގަލޮޅު ސްކޫލްގައި ކިޔަވަމުންދިޔަ އުމުރުން އެންމެ ހަތަރު އަހަރުގެ ކުޑަ ކުއްޖަކަށް ޖިންސީ އަނިޔާ ކުރިކަމުގެ ތުހުމަތުގައި ހައްޔަރުކުރި މީހާއަށް ދައުވާ ނުކުރަން ނިންމި ނިންމުން އަލުން މުރަޖައާކޮށްދޭން އެ ކުއްޖާގެ މައިންބަފައިން ޕްރޮސެކިއުޓަ ޖެނެރަލް (ޕީޖީ)އަށް ހުށަހަޅައިފި އެވެ.
ހަތަރު އަހަރުގެ އަންހެން ކުއްޖާއަށް އަނިޔާ ކުރި މައްސަލައިގައި ހައްޔަރު ކުރީ ސްކޫލް ސާފު ކުރުމުގެ ވަޒީފާގައި އުޅޭ އުމުރުން 63 އަހަރުގެ އަންހެނެކެވެ.
ނަމަވެސް، އެ މީހާ ބަންދުގައި ބަހައްޓަން ނުފެންނަ ކަމަށް ޕްރޮސެކިއުޓާ ޖެނެރަލް (ޕީޖީ) އޮފީހުން ލަފާ ދިނުމުން، އޭގެ އަނެއް ދުވަހު އޭނާ ވަނީ ދޫކޮށްލާފަ އެވެ.
މައްސަލަ ފައިލްކުރިކަން ގަލޮޅު ސްކޫލަށް އެޑިއުކޭޝަން މިނިސްޓްރީން އެންގީ މި މަހުގެ އަށްވަނަ ދުވަހު އެވެ. އެ ތުހުމަތު ކުރެވުނު މީހާގެ މައްޗަށް ދައުވާ ނުކުރަން ނިންމީ، ތަހުގީގުން އޭނާއާ މެދު އެއްވެސް ކަމެއް ފާހަގަކުރެވިފައި ނުވާތީ ކަމަށް ޕީޖީން ބުނެފައިވެ އެވެ.
ކުއްޖާގެ މައިންބަފައިންގެ ވަކީލުންގެ ފަރާތުން ރޭ ނެރުނު ބަޔާނެއްގައި ބުނީ ގަލޮޅު ސްކޫލުން ބަޔާން ނެރުނީ ދޮގު މައުލޫމާތުތަކެއް ހިމަނައިގެން ކަމަށް ކުއްޖާގެ އާއިލާއިން ދެކޭ ކަމަށެވެ.
"އެ ހާދިސާގައި ކަން ހިނގި ގޮތް ހާމަކުރުމަކީ މުހިންމު ކަމެއް. ނަމަވެސް މައްސަލަ ރިޕޯޓުކުރުމުން އެކަށީގެންވާ އަވަސް މިނެއްގައި ސްކޫލުން އެއްވެސް ފިޔަވަޅެއް އެޅިކަން އެނގެން ނެތް،" އާއިލާގެ ފަރާތުން ނެރުނު ބަޔާނުގައިވެ އެވެ.
އާއިލާއިން ވަނީ ސަކޫލުން ކުރި މަސައްކަތުގެ މައުލޫމާތު ހާމަ ކުރުމަށްވެސް ގޮވާލާފަ އެވެ. ސަބަބަކީ އެ ހާދިސާއާ ގުޅޭ ހުރިހާ މަރުހަލާއެއްގައި ސްކޫލުން މަސައްކަތް ކުރީ ކިހިނެތްކަން އެ ސްކޫލުން ނެރުނު ބަޔާނުން އެނގެން ނެތުމުން ކަމަށްވެސް އާއިލާއިން ބުންޏެވެ.
ކުއްޖާގެ އާއިލާއިން ވަނީ ސްކޫލުގެ ފަރާތުން އެއްވެސް އެއްބާރުލުމެއް ނުލިބޭ ކަމަށާއި މިއަދާ ހަމައަށް ވެސް ބައްދަލުކޮށް އެއްވެސް މައުލޫމާތެއް ހިއްސާ ކޮށްފައި ނުވާތީ އެކަމާވެސް ކަންބޮޑުވުން ފާޅުކޮށްފަ އެވެ.
"މި ހާދިސާއާ ގުޅިގެން ވަކި މީހަކަށް ޖިނާއީ ދައުވާ އެއް ކުރެވޭ ވަރަށް ހެކި ހޯދިފައި ނެތުމަކީ ސްކޫލުން ކުއްޖާއަށް އަނިޔާ ނުލިބޭ ކަމަށް ނިންމޭނެ ކަމެއް ނޫން. އެކަމުން ދޭހަވަނީ ދައުވާ ސާބިތު ކުރެވޭ ވަރަށް ހެކި ލިބިފައި ނުވާކަން. އެއީ އެެއްވެސް ހާލަތެއްގައި ސްކޫލުގެ އެއްވެސް މުވައްޒަފެއްގެ އިހުމާލު މި ހާދިސާގައި ނެތްކަން ނުވަތަ ސަކޫލުގެ މުވައްޒަފެއްގެ ބައިވެރިވުން ނެތްކަން ދަލީލުކޮށްދޭ ކަމެއް ނޫން،" އެ ބަޔާނުގައިވެ އެވެ.
އޭގައި އިތުރަށް ބުނީ ދައުވާ ކުރެވޭ މިންވަރަށް ހެކި ހޯދިފައި ނުވަނީ ކީއްވެކަމާއި ތުހުމަތު ކުރެވުނު މުވައްޒަފާއި ސްކޫލާ މެދު އެއްވެސް އިދާރާއެއްގެ ކަންބޮޑުވުމެއް ނެތް ކަމަށް އަންގާފައި ނުވާ ކަމަށެވެ.
އެހެންކަމުން ކުއްޖާގެ މައިންބަފައިން ވަނީ އެ މައްސަލަ ރިވިއުކޮށްދޭން ޕީޖީގައި އެދިފަ އެވެ.
"ސްކޫލުގެ ޒިންމާ ސްކޫލުން އަދާކޮށްފައެއް ނުވޭ. އެފަދަ އަނިޔާއެއް ދީފައިވާ މުވައްޒަފަކާ މެދު ކަންބޮޑުވުމެއް ނެތް ކަމަށް ނިންމުމަކީ މިފަދަ ހާދިސާއެއް ތަކުރާރުވުމުގެ ފުރުސަތު ބޮޑުވާނެ ކަމެއް. މިފަދަ ހާދިސާއެއް ހިނގި ގޮތް އެންމެނަށް އެނގުމަކީ މުހިންމު ކަމެއް،" ބަޔާނުގައިވެ އެވެ.
