ޒުވާނުންނަށް މަސައްކަތް ދަސްކޮށްދޭން ސަރުކާރުން ގެންގުޅޭ ސިޔާސަތާ އެއްގޮތަށް، އެޗްޑީސީން 100 ފަރާތަކަށް ފުރުސަތު ލިބޭ އެޕަރެންޓިޝިޕް ޕްރޮގްރާމެއް، 6،000.ރ ގެ އެލަވަންސަކާ އެކު ހުޅުވާލައިފި އެވެ.
އެޗްޑީސީން މިއަދު ބުނީ މިއަދު އިއުލާނު ކުރި މިއަހަރުގެ އެޕަރެންޓިޝިޕް ޕްރޮގްރާމްގައި އެކުންފުނީގެ ވަޒީފާގައި ނޫޅޭ 100 ފަރާތެއްގެ އިތުރުން އެކުންފުނީގައި މަސައްކަތް ކުރާ 30 ފަރާތެއް ވެސް ބައިވެރިކުރާނެ ކަމަށެވެ. އެ ޕްރޮގްރާމް ހިންގާނީ ރާއްޖޭގައި އެފަދަ ޕްރޮގްރާމްތަކުގެ ފެންވަރު ބަލާ އިދާރާ، މޯލްޑިވްސް ސްކިލްސް ޑިވެލޮޕްމެންޓް އޮތޯރިޓީގެ މިންގަނޑުތަކާ އެއްގޮތަށް ކަމަށް ވެސް އެކޯޕަރޭޝަނުން ބުންޏެވެ.
އެޗްޑީސީގެ އެޕަރެންޓިޝިޕް ޕްރޮގްރާމްގައި ބައިވެރިވެ މަސައްކަތް ދަސްކުރާ ޒުވާނުންނަށް މޯލްޑިވްސް ކޮލިފިކޭޝަން އޮތޯރިޓީން ގަބޫލުކުރާ ނެޝަނަލް ލެވެލް03 ގެ ސަނަދެއް ދޭނެ އެވެ. އިކޮނޮމިކް މިނިސްޓްރީއާއި ޔޫތު މިނިސްޓްރީގެ އެއްބާރުލުމާއި އެކު ކުރިއަށް ގެންދާ އެ ޕްރޮގްރާމްގައި 10 ދާއިރާއަކުން މަސައްކަތް ދަސްކޮށްދޭނެ އެވެ. އަދި އެ ޕްރޮގްރާމްގައި ބައިވެރިވެ މަސައްކަތް ދަސްކުރާ ފަރާތްތަކަށް ފުރުސަތު އޮތް ވަރަކުން ވަޒީފާގެ ފުރުސަތުވެސް ދޭނެ ކަމަށް އެޗްޑީސީން ބުންޏެވެ. އެއީ ހަމަސްދުވަހުގެ ޕްރޮގްރާމެކެވެ.
މަސައްކަތް ދަސްކޮށްދޭ ދާއިރާތައް
- ހެވީ ވެހިކަލް އޮޕަރޭޓްކުރުން
- ވެލްޑިން
- ރޭނުމާއި ސިމެންތިޖެހުން
- ކަރަންޓް ވައިރުކުރުން
- ފެން ވައިރުކުރުން
- ވަޑާންކުރުން
- ރެފްރިޖަރޭޝަން އެންޑް އެއާކޮންޑިޝަނިން މެކޭނިކްސް
- އިމާރާތްކުރުމުގެ ސައިޓް ސުޕަވާއިޒްކުރުން
- އިމާރާތްތަކުގެ މެއިންޓެނެންސް ބެލެހެއްޓުން
- ގާޑެނިން
އެޗްޑީސީން ބުނިގޮތުގައި މިއަހަރުގެ އެޕަރެންޓިޝިޕް ޕްރޮގްރާމްގައި އަންހެނުންގެ ބައިވެރިވުން އިތުރުކުރުމުގެ ގޮތުން، އެ ޕްރޮގްރާމްގެ ޖާގައިގެ 20 ޕަސެންޓް ވަނީ އަންހެނުންނަށްް ހާއްސަކޮށްފަ އެވެ. ސަަރުކާރުން ފަށާފައިވާ މަސައްކަތްތެރި 3،000 ޒުވާނުން ބިނާކުރުމުގެ މަސައްކަތަށް އެކޯޕަރޭޝަނުން އެއްބާރުލުން ދޭނެ ކަމަށާއި ޒުވާނުން ބިނާކުރަން ގިނަގުނަ މަސައްކަތްތަކެއް ކުރާނެ ކަމަށް ވެސް އެޗްޑީސީން ބުންޏެވެ.
