ވިލިމާލެ ދާއިރާގެ އަންހެނުންގެ ތަރައްގީއަށް މަސައްކަތްކުރާ ކޮމިޓީއަށް މެމްބަރަކު ހޮވުމަށް އިއްޔެ ބޭއްވި ބައި- އިލެކްޝަންގައި ރަނގަޅު ނޫން ގޮތަކަށް ގުނި ކަމަށް އެމްއެންޕީން ބުނާ ދެ ވޯޓު ކަރުދާސް އަލުން ބަލަން އިލެކްޝަންސް ކޮމިޝަން (އީސީ) އިން ނިންމައިފި އެވެ.
މިދިޔަ ހޮނިހިރު ދުވަހު ބޭއްވި އެ ބައި އިލެކްޝަން އެމްއެންޕީގެ ކެންޑިޑޭޓް އާމިނަތު ޝީޒާ ބަލިކޮށް ޕީޕީއެމްގެ ކެންޑިޑޭޓް ފާތިމަތު ނާޒިމާ ކާމިޔާބު ކުރީ އެންމެ ވޯޓެއްގެ ތަފާތުންނެވެ. ޝީޒާއަށް 358 ވޯޓު ލިބުނު އިރު ނާޒިމާއަށް ލިބުނީ 359 ވޯޓެވެ.
އަލުން ވޯޓު ގުނައިދޭން އެދި އެމްއެންޕީން ހުށަހަޅާފައިވަނިކޮށް އީސީން ނިންމާފައިވަނީ އެ ކޮމިޝަނަށް ޝަކުވާ ހުށަހަޅާފައިވާ ދެ ވޯޓު ކަރުދާހެއް އަލުން ބަލައި ޗެކު ކުރުމަށެވެ. އެ ކަން ހާމަކޮށް އީސީން ވަނީ ޓްވީޓެއް ވެސް ކޮށްފަ އެވެ.
އީސީގެ ރައީސް ފުއާދު ތައުފީގް މި ނޫހަށް އިތުރަށް މައުލޫމާތު ދެއްވަމުން ވިދާޅުވީ އެއީ ސައްހަ ވޯޓެއް ބާތިލް ވޯޓެއް ގޮތުގައި ކަނޑައެޅި ވޯޓު ކަރުދާހަކާއި ބާތިލް ވޯޓެއް ސައްހަ ވޯޓެއް ކަމުގައި ކަނޑައެޅި ވޯޓު ކަރުދާހެއް ހިމެނޭ ކަމަށް ބުނެ އެމްއެންޕީން ހުށަހެޅި މައްސަލައަށް ނިންމާފައިވާ ކަމެއް ކަމަށެވެ.
"އަޅުގަނޑުމެން ނިންމީ އެ ދެ ވޯޓު ކަރުދާސް އަލުން ޗެކް ކުރަން، އަލުން ވޯޓު ގުނަން އެދުނު ނަމަވެސް ކޮމިޝަނުން ނިންމާފައި ވަނީ އަލުން ހުރިހާ ވޯޓުތަކެއް ނުގުނާ ގޮތަށް،" ފުއާދު ވިދާޅުވި އެވެ.
އެމްއެންޕީން ވޯޓު އަލުން ގުނަން އެދުނީ އެންމެ ވޯޓެއްގެ ފަރަގުން އިންތިހާބުގެ ނަތީޖާ ކަނޑައެޅުނުއިރު ވޯޓުގައި ގިނަ މައްސަލަތަކެއް ފާހަގަވެފައިވާތީ ކަމަށް އެ ޕާޓީން ވަނީ ބުނެފަ އެވެ.
އެ ޕާޓީގެ ނައިބު ރައީސް ވިލިމާލެ ދާއިރާގެ މެންބަރު އަހްމަދު އުޝާމް މި ނޫހަށް ވިދާޅުވެފައިވަނީ ގިނަ އަދަދެއްގެ ބާތިލް ވޯޓު ގުނީ އެންމެ ރަނގަޅަށް ނޫން ކަމަށް އެ ޕާޓީގެ އޮބްޒާވަރުން ބުނެފައިވާ ކަމަށެވެ.
މި އިންތިހާބު ބޭއްވީ ހުޅުމާލޭގައި ހިނގައިދިޔަ ނުރައްކާތެރި އެކްސިޑެންޓެއްގައި ސީރިއަސް އަނިޔާތަކެއްވެ، މާލެ ސިޓީ ކައުންސިލްގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގައި ވިލިމާލެ ދާއިރާ ތަމްސީލު ކުރައްވަމުން ގެންދެވި މެމްބަރު، އައިމިނަތު އީމާން ނިޔާވުމާ ގުޅިގެންނެވެ.
މާލެ ސިޓީ ކައުންސިލްގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީގައި ޖުމްލަ 17 މެމްބަރުން ތިބޭއިރު، އޭގެ މެޖޯރިޓީ އޮތީ އެމްޑީޕީއަށެވެ. އެއީ އެމްޑީޕީގެ 12 މެންބަރުންނެވެ. ދެން ތިބެނީ ޕީޕީއެމްގެ މެމްބަރަކާއި އަދާލަތު ޕާޓީ އާއި އެމްއާރުއެމްގެ މެމްބަރެއްގެ އިތުރުން މިނިވަން ދެ މެމްބަރެކެވެ.
