ވިލިމާލެ ދާއިރާގެ އަންހެނުންގެ ތަރައްގީއަށް މަސައްކަތްކުރާ ކޮމިޓީއަށް މެމްބަރަކު ހޮވުމަށް ބޭއްވި ބައި- އިލެކްޝަން ވޯޓު އަލުން ގުނަން މޯލްޑިވްސް ނޭޝަނަލް ޕާޓީ (އެމްއެންޕީ) އިން އިލެކްޝަންސް ކޮމިޝަން (އީސީ) އަށް ހުށަހަޅަން މިއަދު ނިންމައިފި އެވެ.
މިއަދު ކުރިއަށް ދިޔަ މި ބައި އިލެކްޝަން އެމްއެންޕީގެ ކެންޑިޑޭޓް އާމިނަތު ޝީޒާ ބަލިކޮށް ޕީޕީއެމްގެ ކެންޑިޑޭޓް ފާތިމަތު ނާޒިމާ ކާމިޔާބު ކުރީ އެންމެ ވޯޓެއްގެ ތަފާތުންނެވެ. ޝީޒާއަށް 358 ވޯޓު ލިބުނު އިރު ނާޒިމާއަށް ލިބުނީ 359 ވޯޓެވެ.
އެމްއެންޕީގެ ނައިބު ރައީސް އަދި ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު އަހްމަދު އުޝާމް "އަދުދު" އަށް ވިދާޅުވީ، އެ ގޮތަށް އެދެން ޕާޓީން ނިންމީ އެންމެ ވޯޓެއްގެ ފަރަގުން އިންތިހާބުގެ ނަތީޖާ ކަނޑައެޅުނުއިރު ވޯޓުގައި ގިނަ މައްސަލަތަކެއް ފާހަގަވެފައިވާތީ ކަމަށެވެ.
"ވޯޓުލާ މަރުކަޒު ކައިރީ ހަރަކާތްތެރިވި އަޅުގަނޑުމެންގެ އޮބްޒާވަރުން އެބަ ބުނޭ، ގިނަ އަދަދެއްގެ ބާތިލް ވޯޓު ގުނީ އެންމެ ރަނގަޅަށް ނޫން ކަން، އެހެންވެ އަޅުގަނޑުމެން ނިންމީ އަލުން ވޯޓު ގުނަން އެދެން،" އުޝާމް ވިދާޅުވި އެވެ.
ޖުމްލަ 729 މީހަކު މިއަދުގެ އެ ވޯޓުގައި ބައިވެރިވިއިރު އެއިން 12 ވޯޓަކީ ބާތިލް ވޯޓެވެ.
މި އިންތިހާބު ބޭއްވީ ހުޅުމާލޭގައި ހިނގައިދިޔަ ނުރައްކާތެރި އެކްސިޑެންޓެއްގައި ސީރިއަސް އަނިޔާތަކެއްވެ، މާލެ ސިޓީ ކައުންސިލްގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގައި ވިލިމާލެ ދާއިރާ ތަމްސީލު ކުރައްވަމުން ގެންދެވި މެމްބަރު، އައިމިނަތު އީމާން ނިޔާވުމާ ގުޅިގެންނެވެ.
މާލެ ސިޓީ ކައުންސިލްގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީގައި ޖުމްލަ 17 މެމްބަރުން ތިބޭއިރު، އޭގެ މެޖޯރިޓީ އޮތީ އެމްޑީޕީއަށެވެ. އެއީ އެމްޑީޕީގެ 12 މެންބަރުންނެވެ. ދެން ތިބެނީ ޕީޕީއެމްގެ މެމްބަރަކާއި އަދާލަތު ޕާޓީ އާއި އެމްއާރުއެމްގެ މެމްބަރެއްގެ އިތުރުން މިނިވަން ދެ މެމްބަރެކެވެ.
