ސިއްހީ ފަރުވާގެ ނަމުގައި، ރާއްޖޭގައި ހިޖާމާ ޖަހަމުންގެންދާ ތަންތަނަކީ ރަސްމީކޮށް ރަޖިސްޓްރީ ކޮށްގެން ހިންގަމުންދާ ތަންތަން ނޫން ކަމުގައި އެހެންކަމުން އެ ހިދުމަތް ހޯދުމުގައި ސަމާލުވާން ހެލްތު މިނިސްޓްރީން އިލްތިމާސްކޮށްފި އެވެ.
"ފަޒީސް ހިޖާމާ ތެރެޕީ" ގެ ނަމުގައި ހިންގަމުން އަންނަ ތަނެއްގެ މައްސަލަ ވަރަށް ބޮޑަށް ހޫނުވެފައިވަނިކޮށް މިނިސްޓްރީން އިއްޔެ ކުރި އިއުލާނެއްގައި ބުނީ ސިއްހީ ހިދުމަތް ދޭ ތަންތަން ހިންގުމާބެހޭ ގަވައިދުގައިވާ ގޮތުގެމަތިން ސިއްހީ ހިދުމަތެއް ދޭންވާނީ ރަޖިސްޓްރީވެ، ލައިސަންސް ހޯދުމަށް ފަހުގައިކަން ބަޔާން ކޮށްފައިވާނޭ ކަމަށެވެ.
މީގެ އިތުރުން ސިއްހީ ހިދުމަތުގެ ފަންނީ މަސައްކަތް ތެރިންގެ ގާނޫނުގައިވާ ގޮތުގެމަތިން ސިއްހީ ހިދުމަތެއް ދޭންވާނީ އެފަންނަކަށް ނިސްބަތްވާ ކައުންސިލުގައި ސިއްހީ ފަންނުވެރިން ރަޖިސްޓްރީ ވުމަށް ފަހުގައިކަން ބަޔާން ކޮށްފައިވާ ކަމަށް މިނިސްޓްރީން އިތުރަށް ބުންޏެވެ.
"އެހެންކަމުން، ސިއްހީ ފަރުވާގެ ނަމުގައި، ހިޖާމާ ޖަހަމުންގެންދާ ތަންތަނަކީ މިމިނިސްޓްރީގައި ރަޖިސްޓްރީ ކޮށްގެން ހިންގަމުންދާ ތަންތަން ނޫންކަމުގައި އާންމުކޮށް އަންގާ އިއުލާނު ކުރަމެވެ،" މިނިސްޓްރީން ބުނެފައިވެ އެވެ.
އެ އިއުލާނުގައި އިތުރަށް ވަނީ ސިއްހީ ހިދުމަތް، މިނިސްޓްރީގައި ރަޖިސްޓްރީވެ ލައިސަންސް ލިބިފައިވާ ތަންތަނުން ހޯދުމަށް އިލްތިމާސްކޮށްފަ އެވެ.
މައްސަލަ ބޮޑުވީ ކީއްވެ؟
"ފަޒީސް ހިޖާމާ ތެރަޕީ" އަކީ ރާއްޖޭގައި އެންމެ ފުޅާދާއިރާއެއްގެ ހިޖާމާގެ ފަރުވާ ދެމުން އަންނަ އެއް ތަނެވެ. 2019 ވަނަ އަހަރު ވެސް ހެލްތު މިނިސްޓްރީން ވަނީ އެ ތަން ބަންދު ކުރުމަށް އަންގާފަ އެވެ. ނަމަވެސް އެ ފަހުން އެކަން ހުއްޓުވުމަށް އިތުރު ކަމެއް ނުކުރެ އެވެ.
މި ފަހުން އަނެއްކާވެސް ހިޖާމާގެ ވާހަކަ ފެންމަތިވެފައި މި ވަނީ "ފަޒީސް ހިޖާމާ ތެރަޕީ" އިން ހަކުރު ބައްޔަށް ޖަހަމުން އަންނަ އިންސުލިންގެ ބަދަލުގައި ހިޖާމާ ޖެހުމުން ހަކުރުބަލި ރަނގަޅުވާނެ ކަމަށް ބުނެފައިވާތީ އެވެ.
އެކަމާ ޑޮކްޓަރުންނާއި ޑައިބެޓިކްސް އެސޯސިއޭޝަންގެ އިތުރުން އާންމުން ވެސް އަންނަނީ ނުރުހުން ފާޅުކޮށް ވާހަކަ ދައްކަމުންނެވެ.
ރަޖިސްޓްރީ ނުކޮށް ހިންގާ ތަނަކަށްވީ ނަމަވެސް, މިނިސްޓްރީއަށް އެތަން ބަންދު ކުރުމުގެ ބާރެއް ނުލިބެ އެވެ. އެހެން ކަމުން އެ މައްސަލަ ފުލުހަށް އަންގާފައި ވާނެ ކަމަށާއި މައްސަލަ ބަލާ އެތަން ބަންދު ކޮށްދިނުމަށްވެސް ފުލުހުގައި އެދިފައިވާނެ ކަމަށް މިނިސްޓްރީން ވަނީ ބުނެފަ އެވެ.
"ފަޒީސް ހިޖާމާ ތެރެޕީ"ގެ ވެރިޔާގެ ފަޒީގެ ބަސް
"ފަޒީސް ހިޖާމާ ތެރަޕީ" ހިންގާ ފަޒީލާ އުސްމާނު (ފަޒީ) މި ނޫހަށް ބުނީ 2018ވަނަ އަހަރު ފެށި އެ މަސައްކަތް، މިނިސްޓްރީގައި އެ ތަން ރަޖިސްޓާ ކޮށްދިނުމަށް އެތައް ފަހަރަކު އެދިފައިވާނެ ކަމަށެވެ. ނަމަވެސް އެކަން ކޮށްދީފައި ނުވާ ކަމަށް އޭނާ ބުންޏެވެ.
މީގެ ކުރިން 2019ވަނަ އަހަރުވެސް މިނިސްޓްރީއަށް ފަޒީ ހާޒިރުކޮށް ވަނީ ސުވާލު ކޮށްފަ އެވެ. އެއީ ސެޓްފިކެޓް ނެތި ހިންގަމުން އަންނާތީ ކަމަށާއި ލޭ ގެންގުޅޭ ތަނަކަށްވާތީ ސާފުތާހިރު ވެއްޓެއްގައި އެކަން ކުރުމަށް ބުނެ ކަމަށެވެ.
އެގޮތުން 2019ވަނަ އަހަރު ކްލިނިކެއް ހުޅުވުމަށް ރަޖިސްޓާ ކުރަން ދިއުމުން ސެޓްފިކެޓެއް ނެތި ނުދެވޭނެ ކަމަށް މިނިސްޓްރީން ބުނި ކަމަށާއި ބޭރުން މީހުން ގެނެސްގެންވެސް ކުރުމަށް ހުއްދަ ނުދޭނެ ކަމަށް މިނިސްޓްރީން އޭރު އެންގި ކަމަށް ފަޒީ ބުންޏެވެ.
"ރާއްޖޭގަ މެޑިކަލް ޑޮކްޓަރުން ނޫން މީހުންނަށްވެސް ކްލިނިކްތައް ހިންގޭ. އަޅުގަނޑަށް ކީއްވެތޯ ހިޖާމާ ކްލިނިކެއް ނުހިންގެންވީ އެކަމުގެ މާހިރުން ގެނެސްގެން. އެކަމަކު އަޅުގަނޑަކަށް އެ ހުއްދައެއް ނުދިން އެތާ ފަޒީލާ އުސްމާން ހިޖާމާ ޖަހައޭ ކިޔާފަ،" އޭނާ ބުންޏެވެ.
"ހުއްދަ ނުދޭން އުޅެނީ އަޅުގަނޑުމެން އަތުން މީހަކު މަރުވެއްޖާ މިކަން ހުއްޓުވާލެވޭނެތީ. އަޅުގަނޑުވެސް ބޭނުންވަނީ ހުއްދަ ނަގައިގެން ޕްރޮފެޝަނަލްކޮށް މެޑިކަލް ޑޮކްޓަރުން ކުރާ ގޮތަށް ހުއްދައާއެކު ކުރަން،"
އެހެން ނަމަވެސް އޭނާއަކީ ދެ ކުދިން ތިބޭ މީހެއް ކަމަށްވާތީ ޔޫކޭގައި ދެ އަހަރު އެ ކިޔެވުމަށް ނުހުރެވޭނެ ކަމަށް ފަޒީ ބުންޏެވެ. ފަޒީ އިތުރަށް ބުނީ މިނިސްޓްރީން ހިޖާމާ ކޯސް ހިންގައި ނުދޭތީ ބޭރުން ގެންނަ ސެޓްފިކެޓު ގަބޫލުރަން ޖެހޭނެ ކަމަށެވެ.
"އަޅުގަނޑު މިހާރު މި ދަނީ ހިޖާމާ ޑިޕްލޮމާ ކޯހެއް ހަދަމުން ބޭރުން. އޮންލައިންކޮށް،"
ރަޖިސްޓާ ކޮށްގެން ރާއްޖޭގައި ހިޖާމާ ޖަހައިދޭ އެއްވެސް ތަނެއް މިވަގުތު ނެތް ކަމަށާއި ރަޖިސްޓާ ކޮށްގެން ހިންގުމުގެ ހުއްދަ ދިނުމުގެ ބާރު މިނިސްޓްރީއަށް ނޯންނާނެ ކަމަށް ފަޒީ ބުންޏެވެ. ސަބަބަކީ މިއީ މުސްލިމް ގައުމަކަށް ވެފައި ހިޖާމާއަކީ ރަސޫލާގެ ސުންނަތުން ސާބިތުވާ ކަމަކަށްވާތީ ކަމަށް އޭނާ ބުންޏެވެ.
