ސްރީލަންކާގެ ހާލަތު ގޯސްވެ ގިނަ ހިސާބުތަކުގައި ހަމަނުޖެހުން ހިނގަމުން ދިއުމާއި ގުޅިގެން އެގައުމުގައި ދިރިއުޅެމުން އަންނަ ދިވެހިން ސަމާލުވެ ތިބުމަށް ފޮރިން މިނިސްޓްރީން އިލްތިމާސް ކޮށްފި އެވެ.
މުޅި ސްރީލަންކާ ހިމެނޭ ގޮތަށް މިވަގުތު ސްރީލަންކާގައި ވަނީ ކާފިއު އިއުލާނު ކޮށްފަ އެވެ. އަދި، މިއަދު ސްރީލަންކާގެ ބޮޑު ވަޒީރު މަހިންދަ ރާޖަޕަކްސަ ވަނީ މަގާމުން އިސްތިއުފާ ދެއްވައިފަ އެވެ.
މިނިސްޓްރީން ވަނީ ލަންކާގައި ދިރިއުޅޭ ދިވެހިންނާއި ލަންކާއަށް ދަތުރުކުރާ ދިވެހިން އެ ގައުމުގެ ކަމާބެހޭ ފަރާތްތަކުން ދެއްވާ އިރުޝާދުތަކަށް ސަމާލުކަންދިނުމަށް އިލްތިމާސް ކޮށްފަ އެވެ.
ފޮރިން މިނިސްޓްރީން އިތުރަށް ބުނީ، އެގައުމުގައި ދިރިއުޅެމުންދާ މީހުންގެ ތެރެއިން ފަރާތަކަށް އިމަޖެންސީ ހާލަތެއް ދިމާވެއްޖެނަމަ، ހައިކޮމިޝަނުގެ ހޮޓްލައިން ނަމްބަރު 0768816666 އަށް ގުޅުއްވާ އެކަމަށް ވީ އެންމެ އަވަހަކަށް ހިއްސާ ކުރުމަށް އެދޭ ކަމަށެވެ.
މިއަދު ހެނދުނު އޭއެފްޕީން ވަނީ ދަގަނޑު ހޮޅިބުރި އާއި ލަޓިބުރި ފަދަ ތަކެތި ބޭނުންކޮށްގެން ރައީސް އޮފީސް ބޭރުގައި ޓެންޓު ޖަހައިގެން ސުލްހަވެރިކަމާ އެކު މުޒާހަރާ ކުރަމުންދިޔަ ރައްޔިތުންނަށް ގޮތަބަޔާގެ ސަޕޯޓަރުން ހަމަލާ ދީފައިވާ ކަމަށް ރިޕޯޓުކޮށްފަ އެވެ.
އެއަށްފަހު، ސަރުކާރަށް ތާއިދުކުރާ މީހުންނާއި މުޒާހަރާގެ ބައިވެރިންނާ ދެމެދު ހަމަނުޖެހުންތައް އުފެދި ބައެއް ތަންތަނުގައި ވަނީ ހުޅުޖަހާފަ އެވެ. އޭގެ ތެރޭގައި ވެރިކަންކުރާ އެސްއެލްޕީޕީގެ މަޖިލިސް މެމްބަރުންގެ ގެތައް ހިމެނެ އެވެ. ކުރީގެ ކެބިނެޓު ވަޒީރުން ވެސް އޭގެ ތެރޭގައި ހިމެނޭއިރު އެމީހުން ދުއްވާ ވެހިކަލްތަކަށް ވެސް ވަނީ ގެއްލުން ދީފަ އެވެ.
މި ހަމަނުޖެހުންތައް ހުއްޓުވުމަށް ލަންކާގެ ފުލުހުން ކުރަމުންދާ މަސައްކަތަށް އެއްވެސް ވަރެއްގެ ކުރިއެރުމެއް މިހާތަނަށް ލިބިފައެއް ނުވެ އެވެ. ކަރުނަ ގޭހާއި ޕްރެޝަރުގައި ފެން ޖަހައިގެން ވެސް މުޒާހަރާތައް މައިތިރި ނުކުރެވި ހަމަނުޖެހުންތަކަށް ވަނީ ބަދަލުވެފަ އެވެ.
މިހާތަނަށް މި ހަމަނުޖެހުންތަކުގައި 100 އަށްވުރެ ގިނަ މީހުންނަށް އަނިޔާވެފައިވާ ކަމަށް ރިޕޯޓުކޮށްފައިވެ އެވެ. މަރުވި މީހުންގެ ޔަގީން އަދަދެއް މިހާތަނަށް ލަންކާގެ މީޑިއާތަކުން ރިޕޯޓުކޮށްފައެއް ނުވެ އެވެ.
