ސިއްހީ ދާއިރާގެ މަސައްކަތްތެރިންގެ މުސާރައިގެ އޮނިގަނޑަށް ބަދަލު ގެނެސް، މުސާރަތައް ބޮޑުކުރުމުގެ ފަންނީ މަޝްވަރާތަައް ނެޝަނަލް ޕޭ ކޮމިޝަނުން ނިންމާލައިފި އެވެ.
ނެޝަނަލް ޕޭ ކޮމިޝަނުގެ ސެކްރެޓަރީ ޖެނެރަލް ޑރ. މުހައްމަދު ފައިޒަލް "އަދަދު" އަށް ވިދާޅުވީ ސިއްހީ ދާއިރާގައި މަސައްކަތް ކުރާ ފަރާތްތަކުގެ މުސާރަތައް ބޮޑުކުރުމަށް އެ ދާއިރާގެ ފަންނީ ފަރާތްތަކާއެކު ކުރިޔަށްގެންދިޔަ މަޝްވަރާތައް ނިމުމަކަށް އައިސްފައިވާ ކަމަށެވެ.
އޭގެ ތެރޭގައި އެކި ޖަމިއްޔާތަކާއި އެސޯސިއޭޝަންތަކާއެކު ޕޭ ކޮމިޝަނުން ބައްދަލުކުރި ކަމަށް އޭނާ ވިދާޅުވި އެވެ.
"ދެން އޮންނާނީ ޖޮބް މެޓްރިކްސްގެ ކަންކަން ނިންމުން. އެއީ އަނެއްހެން ބުނަންޏާ އޮނިގަނޑު. ދެން އޭގެ އިތުރުން ބަޖެޓް ކަނޑައެޅުމުގެ މަސައްކަތް ވެސް ފިނޭންސް މިނިސްޓްރީން ކުރާނެ،" ފައިޒަލް ވިދާޅުވި އެވެ.
އޭނާ ވިދާޅުވީ އަދިވެސް ޕޭ ކޮމިޝަނުގެ ފަޅިން ކުރަން ހުރި ބައެއް މަސައްކަތްތައް އެބަ ހުރި ކަމަށެވެ. އޭގެ ތެރޭގައި ފަންނީ ފަރާތްތަކުގެ ކިބައިން ލިބުނު ލަފާ އަދި ހުށަހެޅުންތައް ދިރާސާކޮށް ހިމެނުމުގެ މަސައްކަތް ވެސް ހިމެނޭ ކަމަށް އޭނާ ވިދާޅުވި އެވެ.
އޭނާ ވިދާޅުވީ އެ މަސައްކަތްތައް ނިމުމުން އެ އޮނިގަނޑު ފާސްކޮށް، އިއުލާންކޮށް އަދި ތަންފީޒުކުރުމަށް ފޮނުވާނެ ކަމަށެވެ. ނަމަވެސް އަދި އެ މަސައްކަތް ނިމޭނެ ވަކި ދުވަހެއް ޑރ. ފައިޒަލް ވިދާޅެއް ނުވެ އެވެ. އަދި މުސާރައަށް އަންނާނެ ބަދަލުތަކުގެ ތަފްސީލެއް ވެސް އަދި ނިމިފައި ނުވާތީވެ އެކަން ހާމައެއް ނުކުރައްވަ އެވެ.
ހެލްތު މިނިސްޓްރީން ވަނީ ސިއްހީ ދާއިރާގެ މަސައްކަތްތެރިންގެ މުސާރައިގެ އޮނިގަނޑަށް ގެންނަ ބަދަލުތަކުގެ ހުށަހެޅުންތަކެއް މިދިޔަ އަހަރު ތެރޭ ފިނޭންސް މިނިސްޓްރީއަށް ފޮނުވާފަ އެވެ.
