ހުޅުމާލޭގެ މަގުތައް ސާފުކޮށް ބަލަހައްޓަން އެޗްޑީސީން މިއަދު ވެމްކޯއާ ހަވާލުކޮށްފި އެވެ.
ހުޅުމާލެ ސާފުކޮށް ބެލެހެއްޓުމުގެ މަސައްކަތް ވެމްކޯއާ ހަވާލުކުރުމުގެ އެއްބަސްވުމެއްގައި ސޮއިކުރީ، އެޗްޑީސީގެ މައި އޮފީހުގައި މިއަދު ބޭއްވި ރަސްމިއްޔާތެއްގަ އެވެ. އެ އެއްބަސްވުމުގައި ވެމްކޯގެ ފަރާތުން ސޮއިކުރެއްވީ ޑެޕިއުޓީ މެނޭޖިން ޑިރެކްޓަރު ޔޫސުފް ސިރާޖެވެ. އެޗްޑީސީގެ ފަރާތުން ސޮއިކުރެއްވީ މެނޭޖިން ޑިރެކްޓަރު ސުހައިލް އަހުމަދު އެވެ.
މިއަދު ސޮއިކުރި އެއްބަސްވުމުގެ ދަށުން ވެމްކޯއިން މަސައްކަތް ފެށުމުން ހުޅުމާލޭގައި ދިރިއުޅޭ ފަރާތްތަކަށް އިތުރު ވަޒީފާގެ ފުރުސަތު ތަކެއް ލިބޭނެ އެވެ. އެއީ ހުޅުމާލޭގެ މަގުތައް ސާފުކުރުމުގެ ވަޒީފާއަށް 50 ޖާގަ ހާއްސަކުރަން ވެމްކޯއިން ނިންމާފައި ވާތީ އެވެ. ވެމްކޯއިން ހުޅުވާލި 50 ވަޒީފާއަކީ 8،000 ރުފިޔާގެ މުސާރައެއް ލިބޭނެ ވަޒީފާތަކެކެވެ. އެ ވަޒީފާތަކަށް ކުރިމަތިލުމުގެ ފުރުސަތު އަންނަ މަހުގެ ނުވަ ވަނަ ދުވަހާ ހަމައަށް ވެމްކޯއިން ވަނީ ހުޅުވައިލައިފަ އެވެ.
ވެމްކޯއިން ބުނީ އެ އެއްބަސްވުމުގެ ދަށުން ހުޅުމާލޭގެ މަގުތައް ސާފުކުރުމުގެ މަސައްކަތް އަންނަ މަހުން ފެށިގެން އެ ކޯޕަރޭޝަނުން ކުރިއަށް ގެންދާނެ ކަމަށެވެ.
މިއަދު ސޮއިކުރި އެއްބަސްވުމުގެ ދަށުން، ހުޅުމާލެ މަގުތަކާއި، ޕާކުތައް އަދި އަތިރިމަތި ފަދަ ސަރަހައްދުތައް ސާފުކުރުމާއި ވެމްކޯއިން ރަސްމީކޮށް ހަވާލުވެ އެ މަސައްކަތް ކުރާނެ އެވެ. މީގެ ކުރިން އެ މަސައްކަތް ކުރަމުން އައީ އެޗްޑީސީންނެވެ.
