ރާއްޖޭގައި ރަޖިސްޓްރީކޮށްގެން ހިންގާ ވިޔަފާރިތައް ގިންތި ކުރުމުގައި ބަލާ މިންގަނޑަށް ބަދަލު ގެންނަން ސަރުކާރުން ހުށަހެޅި އިސްލާހު ރައްޔިތުންގެ މަޖިލީހުން މިއަދު ފާސްކޮށްފި އެވެ.
ކުދި އަދި މެދު ފަންތީގެ ވިޔަފާރީގެ ގާނޫނު އިސްލާހުކުރަން ސަރުކާރުގެ ފަރާތުން މިލަންދޫ ދާއިރާގެ މެމްބަރު އަލީ ރިޒާ ހުށަހެޅުއްވި ބިލު ދިރާސާކުރި މަޖިލީހުގެ އިގުތިސޯދީ ކޮމިޓީން ވަނީ މުހިންމު ބަދަލުތަކެއް އެ ބިލަށް ގެނެސްފަ އެވެ.
މިގޮތުން، އެންމެ ބޮޑު ބަދަލެއް ގެނެސްފައިވަނީ ވިޔަފާރިތައް ގިންތި ކުރުމުގައި މިހާރު ގާނޫނުގައި ބަޔާންކޮށްފައިވާ މިންގަނޑަށެވެ.
ގާނޫނުގެ ދަށުން ވިޔަފާރިތައް ގިންތި ކުރަނީ މުވައްޒަފުންގެ އަދަދާއި، ޖުމްލަ އާމްދަނީގެ އިތުރުން ސާފު ފާދައިގެ މިންވަރަށް ބަލައިގެންނެވެ.
އެންމެ ކުދި ވިޔަފާރި ގާނޫނުގައި ގިންތިކުރާ މިންގަނޑު
މުވައްޒަފުންގެ އަދަދު - 5-0
- ޓޯޓަލް ރެވެނިޔު - 500،000ރ.
- ނެޓް ޕްރޮފިޓް - 75،000ރ.
ކުދި ވިޔަފާރި ގިންތިކުރާ މިންގަނޑު
މުވައްޒަފުންގެ އަދަދު - 30-6
- ޓޯޓަލް ރެވެނިޔު - 500،000ރ. - 5،000،000ރ.
- ނެޓް ޕްރޮފިޓް - 75،000ރ. - 750،000ރ.
މެދު ވިޔަފާރި ގިންތިކުރާ މިންގަނޑު
މުވައްޒަފުންގެ އަދަދު - 100-31
- ޓޯޓަލް ރެވެނިޔު - 5،000،000ރ. - 20،000،000ރ.
- ނެޓް ޕްރޮފިޓް - 750،000ރ. - 3،000،000ރ.
މި ގިންތިކުރުން ބަދަލުކޮށް މިއަދު ފާސްކުރި ބިލު ގާނޫނަކަށް ބަދަލުވުމުން ކުދި ވިޔަފާރިއެއްގެ ބަލާނީ ޖުމްލަ އާމްދަނީ 1،000،000ރ އާ ހަމައަށް ލިބި، ސާފު ފައިދާ އަށް 250،000ރ. ލިބޭ ވިޔަފާރި ތަކެވެ.
ކުދި ވިޔަފާރިތަކުގެ ގޮތުގައި ގިންތިކުރަން ބަލާނީ ޖުމްލަ އާމްދަނީ 1،000،001ރ. އިން ފެށިގެން 10،000،000ރ. ދެމެދުން ލިބި، ސާފު ފައިދާ 250،001ރ. އިން 2،500،000ރ. ދެމެދު ލިބޭ ވިޔަފާރިތަކެވެ.
އޭގެ އިތުރުން މެދު ވިޔަފާރިއެއްގެ ގޮތުގައި ދެން ގިންތި ކުރެވޭނީ 10،000،001ރ. އާ 30،000،000ރ. ދެމެދުގެ ޖުމްލަ އާމްދަނީއެއް އަދި 2،500،001ރ. އާ 5،000،000ރ. އާ ދެމެދުގެ ސާފު ފައިދާއެއް ލިބޭނަމަ އެވެ.
ވިޔަފާރި ގިންތި ކުރުމުގެ މިންގަނޑު ބަދަލުކުރަން ޖެހުނު ސަބަބެއް ކަމަށް ކޮމިޓީން ބުނެފައިވަނީ ވަރަށް ކުޑަ އާމްދަނީ އެއް ލިބޭ ވިޔަފާރިއަކަށް ވެސް އާމްދަނީއަށް އަންނަ ކުޑަ ބަދަލެއްގެ ސަބަބުން ވިޔަފާރީގެ ގިންތި ބަދަލުވާތީ ކަމަށެވެ.
މިގޮތުން، ޓެކުހާއި އެންމެ ކުޑަމިނުންދޭ އުޖޫރަ ފަދަ ކަންކަން ވިޔަފާރީގެ ގިންތިއާ ގުޅިފައި އޮންނާތީ، އާމްދަނީއަށް އަންނަ ކުޑަ ފަރަގެއްގެ ސަބަބުން ގިންތި ބަދަލުވާ ގޮތަށް އޮތުމުގެ ކަންބޮޑުވުން ވިޔަފާރިތަކުގެ އިތުރުން ކަމާގުޅޭ އިދާރާތަކުން ވެސް ފާހަގަކޮށްފައިވާ ކަމަށް ރިޕޯޓުގައި ބުނެފައިވެ އެވެ.
މި ބަދަލާ ގުޅިގެން ގާނޫނުގެ އެހެން ބައެއް މާއްދާތައް އަންނަ ކުދި ބަދަލުތައް ވެސް ކޮމިޓީން ގެނެސްފައިވާއިރު، މަޖިލީހުގެ މިއަދުގެ ޖަލްސާގައި އެ އިސްލާހުތައް ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި މެމްބަރުންގެ އިއްތިފާގުންނެވެ.
