މަގުބޫލު ހާލަތެއް މެދުވެރިވެގެން މި އަހަރު ބާއްވަން ހަމަޖެހިފައިވާ ބާ އިމްތިހާނަށް ރެޖިސްޓާ ނުކުރެވުނު ފަރާތްތަކަށް ރެޖިސްޓާާކުރަން ފަހު ފުރުސަތު މޯލްޑިވްސް ބާ ކައުންސިލުން ހުޅުވާލައިފި އެވެ.
ބާ ކައުންސިލުން ނެރުނު އިއުލާނެއްގައި ބުނީ އަންނަ ޖޫން މަހުގެ 25 ވަނަ ދުވަހު ބާއްވަން ހަމަޖެހިފައިވާ ބާ އިމްތިހާނަށް ރެޖިސްޓާ ކުރަން ވަގުތު ހަމަވިއިރު، މަގުބޫލު ސަބަބަކާހުރެ ރެޖިސްޓާ ނުކުރެވުނު ފަރާތްތަކަށް އިތުރު ފުރުސަތެއް ހުޅުވާލަން ނިންމާފައިވާ ކަމަށެވެ.
އެފަދަ ހާލަތެއް މެދުވެރިވި ފަރާތްތަކުން އަންނަ ބުދަ ދުވަހުގެ 12:00 ގެ ކުރިން ބާ ކައުންސިލްގެ ރެޖިސްޓްރޭޝަން ލިންކް މެދުވެރިކޮށް ރެޖިސްޓާކުރަން އެ ކައުންސިލުން ވަނީ އިރުޝާދު ދީފަ އެވެ.
ބާ އިމްތިހާނުގައި ބައިވެރިވޭނީ ގާނޫނީ ރޮނގުން ފުރަތަމަ ޑިގްރީއެއް ހާސިލުކޮށް ސެޓްފިކެޓް ލިބިފައިވާ ފަރާތްތަކަށެވެ. ބާ ކައުންސިލުން ބުނީ އިމްތިހާނަށް ރެޖިސްޓްރީވެވުނު ކަމަށް ބަލާނީ އިމްތިހާނުގެ ކެންޑިޑެޓް ނަމްބަރު އެ ކެންޑިޑޭޓަކަށް ލިބުމުންނެވެ.
ބާ ކައުންސިލުން އިތުރަށް ބުނީ މިދިޔަ އަހަރު އެ ކައުންސިލުން ގާނޫނީ ވަކީލުންނަށް ދޫކުރި ވަގުތީ ލައިސަންސް، މިފަހަރުގެ ބާ އިމްތިހާނުގައި ބައިވެރިނުވާނަމަ ހިފެހެއްޓޭނެ ކަމަށެވެ.
އެހެންކަމުން އެ ވަގުތީ ލައިސަންސް އޮތް ފަރާތްތަކުން މިފަހަރުގެ ބާ އިމްތިހާނުގައި ބައިވެރިވުމަށް ހާއްސަ ސަމާލުކަމެއް ދިނުމަށް އެ ކައުންސިލުން އެދެ އެވެ.
މިދިޔަ އަހަރު ވަގުތީ ލައިސަންސް ދޫކުރީ، އޭރު ބާ އިމްތިހާނުގެ ތައްޔާރީތައް ނިމިފައިނުވާތީވެ، އެ އަހަރު ގްރެޖުއޭޓްވި ގާނޫނީ ފަންނުގެ ދަރިވަރުންނަށެވެ.
ބާ އިމްތިހާނުގައި ބައިވެރިވުމަށް މި އަހަރު 10،000ރ. ގެ ފީ އެއް ނަގަން ބާ ކައުންސިލުން ނިންމާފައިވާއިރު، އަންނަ އަހަރުން ފެށިގެން 20،000ރ. ގެ ފީއެއް ނަގަން އެ ކައުންސިލުން ވަނީ ނިންމައިފަ އެވެ.
