ހުޅުމާާލޭ ޚާންޖީ ރެސްޓޯރެންޓް ބަދިގެ ތެރޭގައި މީހަކަށް ހަމަލާދިން ކަމުގެ ތުހުމަތުގައި ޕާކިސްތާނަށް ނިސްބަތްވާ ޝެފެއް ކަމަށްވާ މުހައްމަދު އާބިދު މިރޭ ހައްޔަރުކޮށްފި އެވެ.
ފުލުހުން ބުނެފައިވާ ގޮތުގައި ޕާކިސްތާނަށް ނިސްބަތްވާ މުހައްމަދު އާބިދު, 26 މިހާރު ވަނީ އަތުލައިގަނެވިފަ އެވެ. އޭނާގެ މައްސަލަ ސީރިއަސް މައްސަލައެއްގެ ގޮތުގައި ފުލުހުން ތަހުގީގު ކުރަމުންދާ ކަމަށް ދެންމެ ކުރި ޓްވީޓެއްގައި ފުލުހުން ބުންޏެވެ.
ޚާންޖީ ރެސްޓޯރެންޓް ތެރޭ ހިނގި ދެބަސްވުމުގައި އާބިދު ހަމަލާދީފައިވަނީ އެ ރެސްޓޯރެންޓްގައި ވޭޓަރެއްގެ ވަޒީފާ އަދާކުރާ ބަންގްލަދޭޝްއަށް ނިސްބަތްވާ މީހަކަށެވެ. އޭނާގެ ބޮލަށާއި ކަރަށް އަނިޔާވެފައިވާއިރު ހޮސްޕިޓަލަށް ގެންދިޔައިރު ވެސް އޮތީ މަރުވެފަ އެވެ.
ހަމަލާދިނުމަށްފަހު, އާބިދު އެތަނުން ފިލި އެވެ. އޭނާ ހޯދުމަށް ފުލުހުން ފޮޓޯ އާންމުކޮށް ބުނީ, އެއީ ވަރަށް ނުރައްކާތެރި މީހެއް ކަމަށެވެ. އޭނާގެ ދަންނަ މީހުން ބުނާ ގޮތުގައި ވަރަށް އަވަހަށް ރުޅި އަންނަ, ރުޅި ގަދަ މީހެކެވެ. މީގެކުރިން ވެސް ރެސްޓޯރެންޓް ތެރޭގައި މާރާމާރީއެއް ހިންގާފައިވެ އެވެ.
ހަވީރު ރެސްޓޯރެންޓްގެ ބަދިގެ ތެރޭ ހިނގި ދެބަސްވުމުގެ ސީދާ ސަބަބު ސާފުވެފައި ނުވީ ނަމަވެސް, އެނގިފައިވާ ގޮތުގައި ހަމަލާ ދިން ކަމަށް ތުހުމަތުވާ ޕާކިސްތާނުގެ ކައްކާ އާއި ބަންގްލަދޭޝް މީހާއާ ދެމެދު މީގެ ކުރިން ވެސް ދެބަސްވުންތައް ހިނގަ އެވެ.
"އަދަދު"އަށް ލިބިފައިވާ ވީޑިއޯއަކުން ފެންނަ ގޮތުގައި, ބަންގްލަދޭޝް މީހާ ރެސްޓޯރެންޓްގެ ތަޅުންގަނޑު މަތީ އޮތްއިރު އެތަނުގައި ތިބި އެހެން މުވައްޒަފުން އޭނާއަށް ސީޕީއާރްދީ, މޫނަށް ފެން ޖަހައި ހޭއަރުވަން މަސައްކަޔް ކުރާތަން ފެނެ އެވެ.
އޭނާ ބާއްވާފައި އޮތީ ހަމަލާދިން ތަނުގައި ކަމެއް ސާފެއް ނޫނެވެ. އެތަނުގައި ލޭ ފެންނާކަށް ނެތެވެ. އެކަމަކު ޓީޝާޓް އޮތީ ލެއިން ފޯވެފަ އެވެ.
ވީޑިއޯއިން ފެންނަ ގޮތުގައި ބަންގްލަދޭޝް މީހާއަށް ސީޕީއާރްދީ, އޭނާ ފަރުވާއަށް ހޮސްޕިޓަލަށް ގެންދިޔުމަށްޓަކައި ޕާކިސްތާނަށް ނިސްބަތްވާ އެހެން މުވައްޒަފުންތަކެއް އުޅެ އެވެ. އުރުދޫ ބަހުން އެމީހުން ވާހަކަ ދައްކަމުން ދިޔައިރު, ކަން ހިނގި ގޮތް އެމީހުންނަށް ވެސް އޮޅުންނުފިލައިގެން އުޅޭ ތަން ފެނެ އެވެ.
