ކޮވިޑްގެ ބަލިމަޑުކަމާ ހެދި މެދު ކަނޑައިލުމާ ހަމައަށް އުރީދޫ އިން ކޮންމެ ރޯދަމަހަކު ކުރިއަށް ގެންދި ފޯރިގަދަ މަސް ރޭހުގެ މިއަހަރުގެ ބައި މިއަދު ފަށައިފި އެވެ.
އުރީދޫ އިން މިއަދު ބުނި ގޮތުގައި މިއަދު މެންދުރުފަހު 2:00 ވީ އިރު ހުރިހާ ޓީމްތަކެއް ވީ މަހަށް ފުރައިފަ އެެވެ.
އެއް ވަނައަށް ދާ ޓީމަކަށް ބައިލައްކަ ރުފިޔާގެ އިނާމެއް ދޭ ގޮތަށް ކުރިއަށް ގެންދާ މަސްރޭހުގައި މިއަހަރު 23 ޓީމެއް ބައިވެރިވި އެވެ.
އާންމު އުސޫލެއްގެ ގޮތުން އެކުންފުނިން ކަނޑައަޅާ ޖާގައިގެ އިތުރަށް ޓީމްތަކުން ކުރިމަތިލައިފިނަމަ ބައިވެރިވުމުގެ ފުރުސަތު ދެނީ ގުރުއަތުލުމަށް ފަހު އެވެ. ނަމަވެސް ކޮވިޑުގެ ބަލިމަޑުކަމާ ގުޅިގެން ދެ އަހަރުގެ މެދުކެނޑުމަކަށް ފަހު ބާއްވާ މި ހަރަކާތަށް ބޮޑު ތަރުހީބެއް ލިބިފައިވާތީ މިފަހަރު ރަޖިސްޓްރީވި ހުރިހާ ޓީމަކަށްވެސް ބައިވެރިވުމުގެ ފުރުސަތު އެކުންފުނިން ވަނީ ދީފަ އެވެ.
އުރީދޫ މަސްރޭހުގައި މިއަދު މަހަށް ފުރި ޓީމްތަކަށް މަރުހަބާ ކިޔަން އުސްފަސްގަނޑުގައި ޖަޖުންނާއި އޮފިޝަލުން އިންތިޒާރުގައި ތިބި އިރު އެ ތަނުގައި ފޯރިނަގަމުން އައީ ހަބޭސް ބޮޑުބެރު ޓީމެވެ.
އެކި ސަރަހައްދުތަކުން މަސްބާނައިގެން ޓީމުތައް މާލެއަށް އައީ އެކުއެކީގައި ކަހަލަ ގޮތަކަށް ކަމަށް ވިޔަސް މަސް ކިރުވުމަށް ޓަކައި އުސްފަސްގަނޑަށް އެންމެ ފުރަތަމަ އައީ ޕޯސްޓް އޮފީހުގެ "ޓީމް ޕޯސްޓް" އެވެ. ދެން އައީ ޓީމް އާރްޑީސީ އެވެ. މަސްކިރާ ސަރަހައްދަށް ތިން ވަނައަށް އައީ އުރީދޫން ބުނި ގޮތުގައި ޓީމް ގޯޅިއަންސް އެވެ.
މަސްކިރަން އެންމެ ފަހުން އައީ މަސްރޭހުގެ އެންމެ ފަހުގެ ޗެމްޕިއަނުން ކަމަށްވާ "ޓީމް ބޮއި" އެވެ.
ރާއްޖޭގައި ނެތެމުންދިޔަ ސަގާފަތެއް ދިރުވުމުގައި ބައިވެރިވެ، ޒުވާން ކުދިންގެ މެދުގައި މަސްވެރި ކަމަށް ޝައުގުވެރިކަން އުފެއްދުމުގެ އަމާޒުގައި އުރީދޫއިން ކުރިއަށް ގެންދާ މަސް ރޭސް ބާއްވާނީ ރޯދަ މަހުގެ ކޮންމެ އަންގާރަ އަދި ހޮނިހިރު ދުވަހެއްގެ ރޭގަނޑެވެ. ނަމަވެސް ރޯދަ މަހުގެ ފަހު 10 ގެ ދުވަސްތަކުގައި މުބާރާތް ނޯންނާނެ ކަމަށް އެ ކުންފުނިން ބުނެ އެވެ.
